5
Vaetaruhnaw Vizin: Azoupaw Ccakue
1 Bua ka dothung zah a zou cciamangpaw ccakue kha ka muih.
2 Te vaawpaw nynh kae kha, “Pawmou na muih?” cite yn khia zah, kae nynh, “A zou cciamangpaw ccakue kha ka muih; tuh-e tuh dong kuin sae zah dong haw ako,” ka cipya.
3 Tetuh aning nynh kae kha, “E hynh ram pynpi kya a thuapaw thyalawnaw nynh thua; a ruhpaw miakaw tuh hynh-e ccakue voikheit lang azeiku thyhte vua athua cih zah, hynhute bya a kinkuhpaw miakaw tuh ccakue voikheit lang azeiku thyhte vua athua cih.
4 Vaaw Bawipaw nynh a hopaw tuh, tuh-e ccakue tuh phe ka saw vae zah, miruh inn lungkhu lang te ka min phyate hynhute bya a kinkuhpaw miakaw inn lungkhu lang a tee cih; te tuh-e inn kya a um cih zah, inn kya-e thing te lung ryte inn tuh a roh cih,” yn cipya.
Vaesarinaw Vizin: Abawng lungkhu e Nopinung
5 Te bya kae hokuhpaw vaawpaw tuh yn toikuh zah kae kha, “Dothung lah, yn langkuhpaw uccaw khuh dotua,” yn cipya.
6 Kae nynh, “Khuh-e khuh pawmou athua?” cite ka khia zah aning nynh, “Oun langkuhpaw abawng bawng kheit nynh thua. E tuh ram pynpi kya um hae paw mih hoyleinaw nynh thua,” yn cipya.
7 Kuee te raekuhpaw ahu tuh hungkuh zah, abawng lungkhu kya nopinung lu kheit a haung!
8 Te vaawpaw nynh, “E nopinung hynh Hoyleinaw nynh thua,” a ci. Te tuh-e nopinung tuh abawng lungkhu lang nohde zah, abawng kha kuee te raekuhpaw ahu kha a hu.
9 Te ka dothung zah nopi hae lu ning oun pou hae paw kha ka muih. Mih sake kya muisaw a um; minmin tuh kaepaw-pavaw sake alopaw sake kha hoi hae zah, abawng kha laephi te vaawlui laku lang a zoukhae hae.
10 Tetuh bya kae hokuhpaw vaawpaw kha, “Teilangmou abawng khuh a zoukhae hae?” cite ka khia.
11 Aning nynh, “Abawng hanlan inn sakpya khylan Shinarnote5.11 Shinar ram tuh Babilonia ram nynh thua. ram lang nynh a zoukhae hae; inn a paccynpah kou hae te, abawng kha tuin kya nungnawpaw kya a nung cih hae,” yn cipya.