4
Thing hae
1 Bya kae hokuhpaw vaawpaw tuh bua yn thua zah, a ihpaw ccungccaw tho hawte, kae kha yn tho.
2 Aning nynh kae kha, “Pawmou na muih?” cite yn khia zah, kae nynh, “Sui mawcci te raepaw maeekhuatung kha ka muih, tuh-e a dung khe pakekhupaw ccangkheit, maeekhua ccangsari, tuh-e pakekhupaw te tuh-e maeekhua ccangsari piadenawpaw paih ccangsari a um.
3 Maeekhuatung a pe khe oliv thingku ku ning um zah, pakekhupaw a voi a rang khe ku kheit cci a um,” cite ka ho.Ref 4.3: Bya 11.4
4 Bya kae hokuhpaw vaawpaw kha, “Ka bawipaw, e hae hynh pawmou athua hae?” cite ka khia.
5 Bya kae hokuhpaw vaawpaw nynh kae kha, “E hae hynh pawmou athua hae cipaw na nyh khyh hae tou?” yn cipah zah, kae nynh, “Ka bawipaw, ka nyh khyh hae,” ka cipya.
6 Vaawpaw nynh kae kha, “E hynh Zerubbabel kalan yn thuapaw Bawipaw bya nynh thua: Thungnaw liate thua khyh, huhan liate mah thua khyh, ka muisaw liate nynh thua, cite vaaw Bawipaw nynh a ci.Ref 4.6: Ezr 5.2
7 Pou mua lepaw, nang tuh pawmou na thua? Zerubbabel malang khe bialae lang na tang cih; ccungccaw hae nynh, ‘Apuithya, Apuithya!’ cite a sia lya hae khe, aning nynh beikinn adungparyh lung kha a khang cih,” a ci.
8 Bawipaw bya tuh ka kya yn thua zah,
9 “E inn aleihpaw kha Zerubbabel nynh a bing vae; aning nynh inn hynh phe a lyn cih. Tetuh vaaw Bawipaw nynh kae hynh nae kalan yn saw cipaw na nyh cih oh.
10 Ryalaw adihpaw law ccyh lyaze pawlang a ria lei hae paw miakaw nynh mih lungtua cih zah, Zerubbabel kuih kya-e tounawpaw arui kha a muih cih hae.
“E maeekhua ccangsari tuh laephi pynpi po lekuh lan a muih hae paw Bawipaw mit hae nynh athua hae,” a ci.
11 Te kae nynh, “Maeekhuatung a voi a rang um hae paw hynh-e oliv thingku ku ning hae hynh pawmou athua hae?Ref 4.11: Bya 11.4
12 Te chitui bunawpaw sui paih ccangning nynh chitui a bu hae paw hynh-e oliv ku akaran ran ning hae hynh pawmou athua hae?” cite ka khia.
13 Vaawpaw nynh kae kha, “E hae hynh pawmou athua hae cipaw na nyh khyh tou?” cite yn khia zah kae nynh, “Ka bawipaw, ka nyh khyh,” ka cipya.Ref 4.10b: Bya 5.6
14 Tetuh aning nynh, “E hae tuh laephi pynpi kya-e Bawipaw pe a thadyn hae paw chitui thuh athua hae paw lu ning nynh thua hae,” a ci.