6
Vaetaryanaw Vizin: Marangle Ccangpali
1 Te bua ka dothung zah sohin mua ccangning laku kyate oun pou hae paw marangle hae ccangpali kha ka muih.
2 Ccangkheitnaw marangle kya asepaw marang hae, ccangningnaw marangle kya amanpaw marang hae,Ref 6.2: Bya 6.4, 5
3 ccangthumnaw marangle kya arawpaw marang hae, ccangpalinaw marangle kya tuh puakakae lante apyaapaw marang hae a um hae.Ref 6.3: Bya 6.2
4 Te bya kae hokuhpaw vaawpaw kha, “Ka bawipaw, e hae hynh pawmou athua hae?” cite ka khia.
5 Vaawpaw nynh, “E marangle hae tuh laephi pynpi kya-e Bawipaw malang te a poupaw, vaawlui khivae ccangpali nynh thua.Ref 6.5: Bya 7.1
6 Amanpaw marang hae kya-e marangle tuh thahlang ram lang a cceih, arawpaw marang hae tuh niccaw ram lang cceih hae zah, apyaapaw marang hae tuh alia ram lang a cceih hae,” yn cipya.
7 Marang hae he oun pou hae te, laephi kya ccia bungthung lan thawte a zuaku hae. Te vaawpaw nynh, “Cceih oh lah, laephi kya la cceih bungthung oh,” a cipya hae. Tukeiccuze minmin nynh laephi kya a cceih bungthung hae.
8 Te vaawpaw nynh kae kha yn ko zah, “Thahlang ram lang a cceih hae paw nynh ka muisaw kha thahlang ram kya a haeungsah vae hae,” a ci.
Siapharan lang Khangnaw
9 Bawipaw bya tuh ka kya yn thua zah:
10 Kyngte cciakhae hae zah Babilon langte oun ki vae hae paw Heldai, Tobijah te Jedaiah kya-e sui te ngun kha suelua hae; tuin nin khe Zefaniah ccapaw Josiah inn lang cciatua.
11 Sui te ngun kha lah lah, bawilukhung kha na rae koute Jehozadak ccapaw ranpibawi lupi Joshua lu kya khungsah tua;
12 te Joshua kyakhe vaaw Bawipaw nynh hynhte a ho: E kya a min Thingkaran cikuhpaw ccungccapaw a um: aning tuh a umnaw hmin kya a toih cih zah, Bawipaw beikinn kha a sak cih.Ref 6.12: Jer 23.5, 33.15; Zek 3.8
13 Bawipaw beikinn a sak cih paw tuh amaw nynh thua; aning tuh siapharan phu-enaw kha a ccou cih zah a bawitungkhung vawlan haungte a uk cih. A bawitungkhung pe khe ranpibawi lu kheit a um cih zah, mih lu ning laku kya daenaw te ngingnaw a um cih.
14 Tuh-e bawilukhung tuh Heldai, Tobijah, Jedaiah te Zefaniah ccapaw Josiah nynh a do-oih cih hae zah, Bawipaw beikinn kya liathuinaw uccaw lante a um cih.
15 Laansaw lang um hae paw tuh oun cceih cih hae zah Bawipaw beikinn saknaw kya a bawm cih hae; te vaaw Bawipaw nynh kae hynh nae kalan yn saw cipaw na nyh cih oh. Nanning nynh Bawipaw nae Pachia bya kha zuakute na zui oh zetuh, e hynh acyihkuh cih.