2
Kuihccu Chihpaw A Dansah
(Mat 9.1-8; Luk 5.17-26)
1 Nin beihtaraw aro koute Jesu tuh Kapernaum khua lang yn ki zah aning tuh innvaw nynh a um cipaw kha a thae hae.
2 Vaekheihmawte ccungccaw patae tuh oun sueluakuh hae, tukeiccuze thuakaw kin cia umnaw um lei lan inn nynh ccawng khyh hae; te Jesu nynh minmin kha phung a hopya hae.
3 Ccungccaw lu pali nynh oun puih hae paw a kuihccu chihpaw lu kheit kha Jesu kalan oun cciakhae hae.
4 Ccungccaw alung keiccuze Jesu kalan naekuh kho khyh hae zah a umnaw luki innccukaly kha a kiabia hae; poh a uasah kou hae te ngeccihpaw kha a inawpaw iphae ryte a sawbung hae.
5 Jesu nynh mih zynnaw kha he a muih tuh kuihccu chihpaw kha, “Ka ccapaw, na seinaw tuh ngaethya athua vae,” a cipya.
6 Tuin kya a haung hae paw kawbya sazae hae abang nynh mih lungkaw te,
7 “E Paw hynh pawccemou tuhte Pachia saryapaw bya a ho? Pachia laelan hummou seinaw a ngaethya kho,” cite a tua hae.
8 Jesu nynh mih lungkaw te a tua hae paw kha a thinlung te palou nyh zah, “Nae thinlung kya pawccemou tuhte na tua oh?
9 Kuihccu chihpaw ngeccihpaw kha, ‘Na seinaw tuh ngaethya athua vae,’ cipya tou azoihua, tuhkhyhze ‘Thokuh lah na iphae kha lawkuh lah cceih ccavae,’ cipya tou azoihua?
10 Ccungccaw Ccapaw tuh laephi vawlan seingaethya kaw a hoi cipaw na ny nawlan oh nynh thua,” cite a hopah kou hae te,
11 Jesu nynh kuihccu chihpaw kha “Nang kae hopya, thokuh lah na iphae kha lawkuh lah na inn lang cceih ccavae,” a cipya.
12 Tuh-e paw nynh thokuh zah vaekheihmawte a iphae kha lawkuh zah tuh-e hae balyn malang khe a cceih vae, mih balynte mih ngaeangthua zah, “Hynhcihawpaw hynh kharouh kae muih boi khyh!” ci hae zah Pachia kha a phu-esah hae.
Jesu nynh Levi A Ko
(Mat 9.9-13; Luk 5.27-32)
13 Jesu tuh rili kin lang bua a cceih; ccungccaw zapi balyn tuh a kalan oun thua hae zah minmin kha a ccangpya hae.
14 A ccia lyakhe ngunto khoinaw zung kya a haungpaw Alfeas ccapaw Levi kha muih zah, “Yn zui,” a cipya. Levi nynh thokuh zah a zui.
Jesu Misei hae ryte A Ae
15 Jesu tuh Levi inn kya zete zerya a mang lyakhe, ngunto khoitu hae te misei hae patae mah Jesu ry, a zuitu hae ryte pynkheihlan a koihbua hae, pawccecize tuin kyakhe amaw a zui hae paw ccungccaw patae a um hae.
16 Kawbya sazae hae te Farasi hae nynh Jesu tuh ngunto khoitu hae te misei hae ryte a aekheih hae paw he a muih hae tuh a zuitu hae kyakhe, “Pawccemou aning nynh ngunto khoitu hae te misei hae ryte a aekheih hae?” cite a khia hae.
17 Tuh-e bya tuh Jesu nynh he a thae tuh minmin kha, “A dan hae paw nynh sibawi peki khyh hae, ngeccih hae rou nynh khaw a peki hae, kae tuh miding hae ko khylan kae thua khyh, misei hae ko khylan nynh kae thua,” a cipya hae.
Looh-aesungnaw Kong Khianaw
(Mat 9.14-17; Luk 5.33-39)
18 Johan zuitu hae te Farasi hae zuitu hae tuh looh-ae leih a sung hae, te minmin nynh oun cceih hae zah Jesu kha, “ Johan zuitu hae te Farasi hae zuitu hae tuh looh-ae kae sung, pawccemou nang na zuitu hae ze looh-ae a sung khyh hae?” a cipya hae.
19 Jesu nynh minmin kha, “Zudy ccangvaepaw tuh zudy poi oun too hae paw kya a umbua lungkhu tuh tuh-e ccungccaw hae tuh looh-ae a sung cih hae zawtou? Zudy ccangvaepaw tuh minmin ryte a um lungkhu balyn tuh looh-ae sung lan khyh hae.
20 Thuasalama zudy ccangvaepaw kha minmin kyate lawpya ccyh yn thua cih, tuin ccyh vae tuh looh-ae oun sung vae cih hae.
21 “Humhung nynh mah arynpaw boeining kha athawpaw boeibia te bia boi khyh, tuhte a bia lanze bianawpaw nynh arynpaw boeining kha po lah zah houh aseiikuh paleih vae.
22 Humhung nynh mah athawpaw misutui kha arynpaw misutui-saphuabawng lungkhu lang ruin boi khyh. A ruin lanze misutui athawpaw nynh misutui-saphuabawng kha phae pawsah zah misutui azu, te misutui-saphuabawng tuh aroh; thuasalama athawpaw misutui tuh athawpaw misutui-saphuabawng kya nynh ruin lan accan,” a cipya hae.
Sabbath Bawipaw
(Mat 12.1-8; Luk 6.1-5)
23 Jesu tuh sabbath nin kya loo kyakhe po a cceih; a ccia lya hae khe a zuitu hae nynh looh avui kha a zuku hae.Ref 2.23: Deu 23.25
24 Farasi hae nynh Jesu kha, “Dotua, pawccemou sabbath nin kya kawbya nynh a kheepaw kha minmin nynh a cyi hae?” cite a khia hae.
25 Jesu nynh, “David nynh amaw te a umkheih hae paw ryte mih vuelaw zah looh a ry lya hae ze, paw nynh a cyi cipaw kha na ria boi khyh oh tou?Ref 2.25-26: 1 Sam 21.1-6
26 Ranpibawi lupi Abiathar ccyh lyaze aning nynh Pachia inn lungkhu lang tee zah kawbya nynh ranpibawi laelan humhung mah ae lan a ua leipaw Nungpyapaw sanlou kha ae zah amaw ryte umkheih hae paw kha mah a pyabua hae,” cite a khung hae.Ref 2.26: Lev 24.9
27 Jesu nynh, “Sabbath tuh ccungccaw hanlan raepaw nynh thua, ccungccaw tuh sabbath hanlan raepaw thua khyh.
28 Tukeiccuze Ccungccaw Ccapaw tuh sabbath Bawipaw mah athua,” a cipya hae.