3
Sabbath Nin A Dansah hae
(Mat 12.9-14; Luk 6.6-11)
1 Jesu tuh sinakok lungkhu lang bua tee zah, tuin kya a kuih voikheit lang achihpaw lu kheit a la um.
2 Minmin nynh Jesu kha seibe khylan, sabbath nin kyakhe tuh-e paw tuh yn dansah ta, yn dansah khyh ta cite a dokhaw hae.
3 Jesu nynh a kuih achihpaw ccungccapaw kha, “Malang yn cceih,” a cipya.
4 Tukoute Jesu nynh minmin kha, “Sabbath nin kya ahoypaw cyi lan kawbya nynh a ua tou? Tuhkhyhze ahoy leipaw cyi lan tou a ua? Hiinnaw kha so khum lan a ua tou? Tuhkhyhze chia lan tou a ua?” cite a khia hae. Thuasalama minmin tuh yccae khyh hae.
5 Thinriate minmin kha po lekuh lan a do hae, mih lungkhungpaw elang a ngaethah zah tuh-e paw tuh, “Na kuih kha dyngtua,” a cipya. A kuih kha dyng zah phe a dan vae.
6 Te Farasi hae tuh pou hae zah Jesu kha pawtemou chia lan cipaw tuh Herod ccungccaw hae ryte palou khua a khanku hae.
Ccungccaw Patae A Dan hae
(Luk 6.17-19)
7 Jesu te a zuitu hae tuh rili kalan cceih hae zah Galilee pee um hae paw ccungccaw patae nynh amaw kha a zui hae;
8 Judea pee Jerusalem khua, Idumea pee, Jordan vaw khuraw lang, Tair khua te Sidon khua pepan um hae paw ccungccaw zapi tuh Jesu nynh a cyipaw balyn kha thae hae zah amaw kalan oun thua hae.
9 Ccungccaw zapi nynh amaw kha a eihsei khyh nawlan hae, Jesu nynh a zuitu hae kha amaw elang kohlung ccangkheit nungdaepya lan a hopya hae.Ref 3.9-10: Mar 4.1; Luk 5.1-3
10 Ccungccaw patae a dansah hae keiccuze ccinaw hoipaw ccungccaw miakaw nynh amaw kha hae khylan a kalan a tuh-eihku hae.
11 Athyaa leipaw muisaw bahkuh hae paw nynh amaw kha he muih hae tuh a malang bakhung hae zah, “Nang tuh Pachia Ccapaw nynh na thua!” cite a sia hae.
12 Jesu nynh amaw kong kha na nysah lan khyh oh cite tynkaring lan bya a kin hae.
Locceihtu Lu Haw Lae Ning A Po
(Mat 10.1-4; Luk 6.12-16)
13 Jesu tuh mua vawlan kaethung zah a rypaw ccungccaw hae kha ko hae zah minmin tuh amaw kalan a cceih hae.
14 Jesu nynh locceihtu hae cite mah min a phu hae paw lu haw lae ning kha amaw ryte umkheih khylan, phungho lan saw khylan te
15 raerangsaro hae dee khonaw kaw hoi khylan a khang hae.
16 Tuh-e a khang hae paw tuh: Simon (Peter cite min a phupaw);
17 Zebedi ccapaw hae James te a neitaw Johan (minmin kha Boaneke cite min a phu hae, asuilan tuh ‘Ria ccapaw hae’ cipaw nynh thua);
18 Andru, Filip, Bartholomew, Matthai, Thomas, Alfeas ccapaw James, Taddias, Kanaan khuapaw Simon,
19 te Jesu pheetupaw Judas Iskariot nynh thua hae; tukoute Jesu tuh inn lang a cceih.
Jesu te Beelzebul
(Mat 12.22-32; Luk 11.14-23; 12.10)
20 Ccungccaw zapi nynh bua oun thua hae keiccuze Jesu te a zuitu hae tuh ae san ae man khyh hae.
21 Ccungccaw hae nynh, “Jesu tuh a lungkyh vae khyh,” a ci hae paw kha a vaeccaw hae nynh a thae hae keiccuze amaw kha oih lan a cceih hae.
22 Jerusalem kyate oun cceihbung hae paw kawbya sazae hae nynh, “Aning tuh Beelzebul a hoi, raerangsaro hae uktu bawi liate nynh raerangsaro hae kha a dee kho,” a ci hae.Ref 3.22: Mat 9.34, 10.25
23 Tetuh Jesu nynh minmin kha a kalan ko hae zah tousenaw phungpaw te a hopya hae paw tuh: “Pawtemou Satan nynh Satan tuh a dee kho cih?
24 Ram ramkheit nynh amaw te amaw phiakuh zah a rhawku ze, tuh-e ram tuh tyn kho lan khyh.
25 Innbyn byn kheit nynh amaw te amaw phiakuh zah a rhawku ze, tuh-e innbyn tuh tyn kho lan khyh.
26 Satan nynh amaw te amaw kha rawsekuh zah a phiaku ze tyn kho lan khyh zah phe azo cih.
27 A thawsaepaw lu kheit kha a khiide ty khyh ze, pawcihtemou tuh-e paw inn lungkhu lang a tee kho cih zah a uccaw hae kha a lua kho cih? A khiide ty ze nynh a inn kha a lua kho cih.
28 “Byaccaccing kae hopya oh, ccungccaw hae hynh mih seinaw te saryapaw bya a ho hae paw miakaw kha ngaethya athua cih.
29 Thuasalama Thyaa Muisaw kha saryanaw bya a hopaw miakaw tuh seingaethyanaw papin mue lan khyh, pawccecize zungzae tynpaw seinaw a raepaw nynh thua,” a ci.Ref 3.29: Luk 12.10
30 Pawccemou hynhte a ho ci ze minmin nynh, “Aning tuh athyaa leipaw muisaw nynh a hoi,” a ci hae keiccu nynh thua.
Jesu Vaeccaw hae Ccaccing
(Mat 12.46-50; Luk 8.19-21)
31 Jesu a nung te a neitawpaw hae tuh oun thua hae zah atolang khe a thadyn hae, te ccungccaw saw hae zah amaw kha a kosah hae.
32 Jesu pepan a haung hae paw ccungccaw zapi nynh amaw kha, “Dotua, na nung te na neitaw hae te na ccianung hae nynh tungku ae ry hae zah atolang nynh a um hae,” a cipya hae.
33 Jesu nynh, “Hum hae mou ka nung te ka neitaw hae tuh?” cite a khung hae.
34 Te a pepan a haung hae paw kha po do hae zah, “Dotua oh, e hae hynh ka nung te ka neitaw hae!
35 Humhung zemah Pachia rynaw a raepaw tuh ka neitaw, ka ccianung te ka nung nynh thua,” a ci.