5
Pachia Ccungccaw hae Seinaw
1 Jerusalem e laanpi hae kya
ccia bungthungte,
ngawdo oh lah, ccungtua oh!
Jerusalem kha ka ngaethya kho nawlan,
hmerarih lan hiin zah
byaccing a ccungpaw lu kheit kha
khualae e laanpi hae kya
hoyte ccungtua oh.
2 Minmin nynh, “Bawipaw tuh
a hiin,” a ci hae zemah,
ahme lei lante thyalawkute
bya a kinku hae.
3 Pou Bawipaw , na mit nynh
byaccing kha a ccung khaw?
Minmin kha de na tah hae zemah
pawlangria khyh hae;
minmin kha na ro hae zemah
thuiheinaw kha a vua hae.
Mih mae kha lungpi laeze
tansakuh hae zah,
kithui lan a mya vae hae.
4 Te kae nynh, “E hae hynh
ryachi hae thua hae zah,
nythyanaw hoi khyh hae;
Bawipaw laanpi te
mih Pachia phung kha nyh khyh hae.
5 Alesae hae paw kalan ka cceih cih zah,
ka hopah cih hae;
minmin nynh Bawipaw laanpi te
mih Pachia phung kha
a ny ccaccing hae,” ka ci.
Thuasalama minmin nynh
Pachia kya-e puihnawpaw ccong kha
khya hae zah,
heenawpaw arui kha a paeku vae hae.
6 Tukeiccuze ramkaw e chindeih nynh
minmin kha a theih cih hae zah,
laesia ram e suizaw nynh a roh cih hae.
Kaesing nynh mih khuapi hae kha
phang buh zah,
khua atolang a poupaw miakaw kha
zoihtatyh lan a tei cih hae,
pawccecize mih cyiseimenaw tuh
myarya lung zah,
lungzinaw thyhsan hoi khyh hae.
7 Pawtemou nang kha
kae ngaethya kho cih?
Na ccaaw hae nynh kae kha
yn vua hae zah,
pachia athua lei hae paw min kha
phyate bya a kinku vae hae.
Minmin kha phe byn lan
looh he ka dang hae tuh,
nopi pise seinaw rae hae zah,
ohhuanung hae inn khe a sueluakuh hae.
8 Minmin tuh thobaleih lan
looh dangpaw rangtepaw
athungpaw hawte thua hae zah,
minmin nynh mih innpaw hae raveih zu kha
seikhae rynaw te soihnaw bya a hopya hae.
9 E cyisahnaw hanlan minmin kha
de ka tah lan khyh hae tou?
Hynhcihawpaw minphuin tungvaw khe
liarunaw ka thuasah lan khyh tou?
10 A misu karan hae laku khe
po cceihthung lah rotua hae,
thuasalama marya thangsah nan;
akaran hae tuh Bawipaw kya-e
athua khyh keiccuze bae hae.
11 Israel phin te Judah phin hae tuh
ka tungvaw papinmaw mih lungzi khyh,
12 Minmin nynh Bawipaw kong kha
ahme lei lante ho hae zah,
“Bawipaw nynh pawpaw mah
cyih lan khyh.
Hoyleinaw nynh oun thuanua lan khyh,
thaloi rhaw khyhze ccakannaw kha
ah tung lan khyh oh,” a ci hae.
13 Profeh hae tuh accakaepaw
khivae nynh thua hae,
minmin kya Pachia bya um khyh.
Minmin nynh a ho hae thyhte
mih tungvaw cyi athua cih!
14 Tukeiccuze Bawipaw ,
vaaw Pachia nynh hynhte a ho:
Minmin nynh e bya a ho hae keiccuze,
ka bya kha na khalang kya
maee lang ka tangsah cih,
e ccungccaw hae hynh maeething lang
ka tangsah cih hae zah,
maee nynh a u cih hae.
15 Pou Israel phin, asawnaw e
minphuin phuin kheit kha
na kalan kae thuakhae cih,
Tuh-e tuh athungpaw minphuin,
langmawlya te a la um vae paw minphuin,
a bya na thaepya leipaw minphuin,
a hopaw kha na thaethyapya leipaw
minphuin nynh thua.
16 Mih the bawng tuh
shaw ahungkuhpaw te nynh aloku;
mih balyn mawte
a thungpaw nynh thua hae.
17 Minmin nynh na thingthae-eccang te
na looh kha a ae cih hae;
na ccapaw hae te
na ccanung hae kha a ae cih hae;
na tuu hae te na vaetua hae kha mah
a ae cih hae; na misu ku te
na thaeku ku hae kha mah a ae cih hae;
na doliakupaw khuapi hae
akoihkhawkuhpaw kha mah
mih thaloi te a roh cih hae.
18 Thuasalama tuin nin kya heize na thangnaw ccaccing kha ka thuasah loh lan khyh, cite Bawipaw nynh a ci.
19 Te na ccungccaw hae nynh, “Pawccemou Bawipaw ah Pachia nynh e uccaw hae balyn hynh aening tungvaw a cyi?” cite ae khia hae ze, “Nanning nynh amaw kha na vua oh zah, nae ram kya ramccang pachia hae kha na beik oh, tukeiccuze nae ram athua leipaw ram kyakhe ramccang hae kha rya na lawpah cih oh,” cite na hopah cih hae.
20 Jakob ciihan te Judah ram kya
hynhte ho oh lah siakhae oh:
21 Mit a hoi hae zemah a muih lei hae paw,
nakaring a hoi hae zemah a thae lei hae paw,
pou mingaee hae te tuanaw hoi lei hae paw,
e hynh ngaetua oh.Ref 5.21: Isa 6.9-10; Eze 12.2; Mar 8.18
22 Kae hynh nae rih khyh oh tou? cite
Bawipaw nynh a ci.
Ka malang na thyngkuh khyh oh tou?
Rili hanlan laesia kha ramri lang ka nung,
tuh-e tuh tui nynh a lawe kho leipaw
zungzae tynpaw khawtu nynh thua;
tuileih atho zemah lawe kho khyh,
tuileih nynh a siarua zemah
po khung kho khyh.Ref 5.22: Job 38.8-11
23 Thuasalama e ccungccaw hae tuh
mih lungkhung zah,
dou rynaw thinlung a hoi hae;
ccanglang maekuh hae zah a cceih vae hae.
24 Minmin nynh, “Kumvaelori thyhte
khuaarawsah zah,
khuaatui te hawkhuaa kha
amaw accyh thyhte a rawsahpaw,
loohrue ccyh kha aening hanlan a tynsahpaw
Bawipaw ah Pachia kha rih oh sih,”
cite mih thinlung kya cikuh khyh hae.
25 Nae hoyleinaw nynh
tuh-e ccyh hae kha pong paleih zah,
nae seinaw nynh hoynaw kha
phang ae khawpya oh.
26 Pawccecize ccungccaw hoylei hae paw kha
ka ccungccaw hae laku a umbua hae;
minmin nynh milae hae uccaw kha
a luade hae;
kaangsyatu hae hawte kaangsya hae zah,
ccungccaw hae kha a kyng hae.
27 Pavaw phe abeihpaw awbu hawte
mih inn tuh hynhunaw te phe abeih;
tukeiccuze minmin tuh alesaepaw te
mihoipaw lang a tang hae,
28 mih ngesaw tuh tho zah anae.
Hoyleinaw raenaw kya
azaw ci nykuh khyh hae;
ngawraw hae byathan kha
a tae nawlan hae ahmete
byapiapah khyh hae,
a nyaa hae paw nynh mue lan
accan hae paw kha
pankhae khyh hae.
29 E cyisahnaw hanlan minmin kha
de ka tah lan khyh hae tou?
Hynhcihawpaw minphuin tungvaw khe
liarunaw ka thuakhae lan khyh tou?
30 Siiku lan umpaw te
ri lan umpaw uccaw kha
ram lungkhu kya acyihkuh:
31 profeh hae nynh ahme leipaw
bya kha ho hae zah,
ranpibawi hae nynh mah
profeh hae bya thyhte a uk hae;
ka ccungccaw hae nynh mah
tuhcihawpaw tuh a ry hae,
thuasalama athangnaw he yn thua te,