4
1 Bawipaw nynh a hopaw tuh: Pou Israel, nae ki ze, ka kalan nae ki cih.
Na kya-e anungsikuh hae paw kha
ka malang te na vua zah,
na cciasei khyh ze thuasah,
2 “Bawipaw tuh a hiin thyhte!” cite
byaccing te, byading te dingnaw khate
bya na kinku ze thuasah
minphuin hae tuh tuh-e Pachia liate
hythua a ccou cih hae zah,
tuh-e Pachia liate
a pookuh cih hae, a ci.
3 Judah hae te Jerusalem um hae paw kalan
Bawipaw nynh hynhte a ho:
Athuekuh boi leipaw lei kha thue oh,
hinpaw hae laku khe
ccacii kha vua nan oh.Ref 4.3: Hos 10.12
4 Pou Judah hae te
Jerusalem um hae paw,
Bawipaw hanlan
vingdungawkuh oh lah,
nae thinlung vingdung kha awkuh oh,
tuhkhyhze tuh na rae oh paw
hoyleinaw keiccuze
ka thinrianaw tuh
maee lang arua cih zah,
humhung nynh mah
the kho lei lan ciate arua cih.
Judah kha Rhawthiingnaw
5 Judah ram kya te Jerusalem kyakhe siatua oh:
Ram pynpi balyn kya mungkae tuu oh;
“Pynkheihlan sueluakuh oh sih lah,
rhawlungrua akoihkuhpaw
khuapi hae kalan tee oh sih!”
cite siatua oh.
6 Zion lang ccianaw laanpi
a muihsahpaw alan kha saetua oh,
khyn khylan ccuetua oh,
nae thysung nan sah,
pawccecize hoyleinaw te
myarya lepaw ronaw kha
thahlang te kae thuakhae cih.
7 Chindeih tuh a umnaw
thabu kyate yn pou vae,
minphuin hae a rohtu tuh yn cceih vae;
nae ram kha ccungccaw adaenaw
ram lang rae khylan
a umnaw kyate yn pou vae;
nae khuapi hae tuh ccungccaw
um lei lan ciate aroh cih.
8 E keiccuze buriboei kha zingkuh oh lah,
ngaethyate rah oh:
“Bawipaw thinrianaw myarya lepaw tuh
aening kyate maekuh khyh,” cite rah oh.
9 Tuin nin kya tuh siapharan te a kuihkaw e bawi hae tuh mih rawthah cih; ranpibawi hae tuh a siikuh cih hae zah, profeh hae tuh myarya mih ngaeangthua cih.
10 Tetuh kae nynh, “Pou Bawipaw PACHIA, thaloi kha mih nging kya phang nungde athua lya heize, ‘Nae kya daenaw a um cih,’ cite na ho zah, e ccungccaw hae te Jerusalem kha ccadya na ling vae hae!” ka ci.
11 Tuin ccyh lyakhe e ccungccaw hae te Jerusalem khuaccaaw hae kha hynhte hopya athua cih hae: Asopaw khisan tuh ramkaw e ahangnaw hmin kyate ka ccungccaw ryachi hae kalan azaw; tuh-e khisan tuh vaekang mungsah khylan thua khyh, thyaasah nawlan mah thua khyh.
12 Tuh-e khisan laeze a thawsaepaw khisan tuh Bawipaw kyate yn thua cih. Atu minmin kha bya ka pia cih hae.
13 Dotua! Rhaw tuh
maeking hawte yn thua cih zah,
rhaw a marangle hae tuh
khiccung hawte yn thua cih hae;
a marang hae tuh mosi laeze aranghua hae,
aening hanlan ngaethya lan kou um,
pawccecize ro ah thua vae oh!
14 Pou Jerusalem, khum na thua nawlan,
na thinlung kya-e hoyleinaw kha
thyaasahku tua.
Ahoy leipaw na paccynkunaw kha
na lungkhu kya hohseciamou
a um ung cih?
15 Dan ram kyate roi roikheit
yn ccae zah, Efraim Mua kyate
shethya kong kha a siakhae.
16 “E kya rhaw hae a um hae!” cite
minphuin hae kha hopah hae.
Jerusalem kha rawsete,
“Rhaw hae tuh asawnaw kyate
oun thua hae zah,
Judah ram e khuapi hae kha
a sianua hae.
17 Loo a ngaw hae paw hawte,
rhaw hae nynh Judah kha a koihlu vae hae,
pawccecize Judah nynh kae kha yn rawse vae,
18 Na umtu te na cyisahnaw nynh
e hynh na tungvaw a thuakhae vae.
E hynh na ronaw nynh thua;
pawcih baban mou acci!
Tuh-e tuh na bung lungkhu lang
phe athua vae,” a ci.
Arohpaw Ram hanlan Ngaethyanaw
19 Ka thin tuhlou, ka thin tuhlou!
Ccinaw keiccuze ka khang ka tua khyh!
Ka thinlungcci tuhlou!
Ka bung tuh thawte asohkuh;
“Daebabi lan ka um kho khyh;
pawccecize rhaw roi,
mungkae roi kha ka thae.
20 Shethya ccangkheit koute
ccangkheit yn thua, ram pynpi tuh aroh.
Ka bu hae tuh vaekheihmawte aroh hae,
zokhawpaw ka boei hae tuh
sosoh taraw kya aroh hae.
21 Hohseciamou alan kha
ka muih ung cih zah,
mungkae roi kha ka thae ung cih?
22 “Ka ccungccaw hae tuh a ngaee hae,
kae kha yn nyh khyh hae;
minmin tuh angaeepaw ccaaw thua hae zah,
nythyanaw hoi khyh hae.
Minmin tuh ahoy leipaw kha
myarya raethya hae,
thuasalama ahoypaw kha
pawtemou rae lan cipaw nyh khyh hae.”
23 Laephi kha ka do zah
pawpaw mah um leite accawnghan;
vaawlui kha mah ka do zah
awnaw um khyh.
24 Mua hae kha ka do zah ahy hae,
sangpyng balyn tuh
hebung hethung a hekuh hae.
25 Ka do zah ccungccaw lu kheit san um khyh,
vaawlang e pavaw balyn tuh a zou vae hae.
26 Ka do zah looh voipaw ram tuh
laesia ram lang tang zah,
khuapi balyn tuh Bawipaw malang aroh hae,
myarya a thinrianaw malang khe aroh hae.
27 Bawipaw nynh hynhte a ho: Ram pynpi tuh aroh cih; tuhzemah athangnaw ccaccing tuh ka thuasah lan khyh.
28 E keiccuze laephi tuh
a rah a khui cih zah,
vaawlang e vaawlui tuh aman cih;
ka ho vae paw te ka paccyn vae paw
thua zah, ka ngaesikuh lan khyh,
ka thinlung mah paleihkuh lan khyh.
29 Marang rhawkaw hae te
li rhawkaw hae siho keiccuze
khua miakaw tuh a ccue hae;
ramkaw lang a ccue hae;
lungpi hae kalan a kae hae;
khua hae balyn kha ccuetaw thua hae zah,
tuin kya ccungccaw lu kheit san um khyh.
30 Pou a lanmepaw nang,
boei sepaw kha zingkute
ccaankunawpaw sui te na ccaankuh zah,
na mit kha thuhkuhpaw si
na thuhkuhpaw hynh
paw suilan mou athua?
Alakaw lan na ccaanku.
Na sungsah hae paw nynh
nang kha ae dothatheih hae zah,
na hiinnaw kha chia lan ae ccung hae.
31 Neitangia accihpaw
nopinung roi hawte siaruanaw roi,
ccatawccaw a saahpaw nopinung roi hawte
teingnaw roi kha ka thae,
tuh-e tuh a hysue a vawsawkhaekuhpaw
Zion ccanung a rawnaw roi nynh thua,
a kuih kha dyng zah,
“Ka hanlan ngaethya lan kou um!
Kae tuh ccungccaw theihtu hae malang
ka thawthang!” a ci.