JOHAN
CCAKY KYNINGNAW
John
Johan Ccaky Kyningnaw hynh “Khriccaaw piccan” nynh “sungsahpaw Bawinung te a ccaaw hae” kalan kypaw nynh thua, asuilan tuh khriccaawbuu te a lungkhu kya um hae paw Khriccaaw hae cipaw nynh athua cih. Dyntari te a zeipaw nynh a ho rypaw tuh lu kheit te lu kheit sungsaku lanpaw te ccangpahseitu hae te mih ccangpyanaw hae raeringku lanpaw kha nynh athua.
1
Beihlangnaw
1 A kum tang vae paw kae, Johan nynh byaccing kya ka sungsah hae paw, popaw bawinung te a ccaaw hae kalan ccaw kae ky oh. Kae kyalya nynh thua leite byaccing a nyh hae paw balyn nynh ae sungsah oh.
2 Kae kya um zah kaening ryte zungzae a um cih paw byaccing keiccu nynh kae sungsah oh.
3 Paaw Pachia kyate thuasah, Paaw a Ccapaw, Bawipaw Jesu Khri kyate thuasah byaccing te sungsakunaw ryte thawccinaw, ngaethyaumsahnaw te daenaw tuh nae kya la um sah.
Byaccing te Sungsakunaw
4 Paaw nynh kaw oun pya thyhawte na ccaaw hae abang nynh byaccing kya a hiin hae paw kha ka muih tuh myarya ka lungtua.
5 Bawinung, kawbya thawpaw kha na kalan kae zei khyh, atakaw te kae hoi vae paw kawbya kha nynh kae zei. Atu nang kae ngia rypaw tuh aening lu kheit te lu kheit sungsakuh oh sih cipaw nynh thua.Ref 5: Joh 13.34, 15.12, 17
6 Sungsakunaw cipaw tuh aening nynh a kawbya hae thyhte ah hiin oh paw kha nynh thua; atakaw te na thae vae oh hawte, tuh-e kawbya tuh sungsakunaw kya hiinpaw kha nynh athua.
7 Pawccecize ccungccaw lingtu hae patae tuh laephi vawlan oun langkuh vae hae; minmin nynh Jesu Khri tuh pynsaw lante yn thua cipaw ccaekiakhan khyh hae; khahcihawpaw ccungccaw tuh ccungccaw a lingtu te antikhri nynh thua.
8 Nanning nynh rya na law oh paw kha shung leite, accingpaw ryalaw mee kha na mue nawlan oh, la raeringkuh oh.
9 Humhung zemah Khri ccangpyanaw kya tyn leite, kaw a ngae leipaw ccungccaw tuh Pachia hoi khyh; Khri ccangpyanaw kya atynpaw ccungccaw tuh Paaw te Ccapaw kha parouh mawte a hoi.
10 Tuh-e ccangpyanaw a ccyngkuh leipaw ccungccaw lukhakheit nynh nae kalan yn thua ze, nae inn kya la thuasah nan oh, bya mah la beih nan oh.
11 Pawccecize tuh-e paw kha bya a beihpaw ccungccaw tuh tuh-e paw kya-e ahoy leipaw cyisahnaw kha a neethungkuh buapaw nynh thua.
Nyathyakou Beihlangnaw
12 Nanning kalan zei lanpaw patae ka hoi zemah ccanaw te ccatui te ka zei ry vae khyh. Aening ah lungtuanaw accing nawlan nae kalan kae thua cih zah, nanning ryte hawiliakute byabeihku lan cipaw ka ngaehoi.
13 Po athuapaw na neitawnung a ccaaw hae nynh nang kha ae beihlang hae. Amen.