5
Zynnaw nynh Laephi A Tae
1 Humhung zemah Jesu tuh Khri nynh thua cite a zynpaw miakaw tuh Pachia ccaaw nynh thua. A saahtupaw Paaw kha a sungsahpaw miakaw nynh tuh Paaw kyate yn puipaw ccaaw kha mah a sungsah.
2 Aening nynh Pachia kha ah sungsah oh zah a kawbya hae kha ah zui oh ze, Pachia ccaaw hae kha ah sungsah oh cipaw ah ny oh.
3 Pawccecize Pachia sungsah cipaw tuh aening nynh a kawbya hae kha ah zui oh paw hynh nynh thua. A kawbya hae tuh phuripaw thua khyh.Ref 5.3: Joh 14.15
4 Pawccecize Pachia kyate a puipaw miakaw nynh tuh laephi kha a tae. Laephi a tae khopaw taenaw tuh aening zynnaw nynh athua.
5 Laephi a taepaw tuh hummou? Jesu tuh Pachia Ccapaw nynh thua cite a zynpaw ccungccaw kha thua khyh tou?
Pachia Ccapaw Kong Ccaekia
6 Tui te chiise te yn thuapaw tuh Jesu Khri nynh thua. Tui te kyalya thua leite tui te chiise te nynh yn thua; ccaekia a khantupaw tuh Muisaw nynh thua, pawccecize Muisaw tuh byaccing nynh thua.
7 Pawccecize vaawlang kya ccangthum a um hae:
8 Muisaw, tui te chiise thua hae zah tuh-e ccangthum hae tuh mih lungnging.
9 Ccungccaw nynh ccaekia a khanpaw kha aening nynh ah lawku oh ze, Pachia ccaekia tuh houh alesaepaw nynh thua; pawccecize hynh-e tuh Pachia nynh a Ccapaw kong ccaekia a khanpaw Pachia ccaekia nynh thua.
10 Pachia Ccapaw a zynpaw tuh a lungkhu kya ccaekia a hoi. Pachia a zyn leipaw tuh Pachia kha hynbya a hosah, pawccecize Pachia nynh a Ccapaw kong ccaekia a khanpaw kha aning nynh zyn khyh.
11 Ccaekia tuh e hynh nynh thua: Pachia nynh aening kha zungzae hiinnaw oun pya vae, tuh-e hiinnaw tuh a Ccapaw kya nynh a um.Ref 5.11: Joh 3.36
12 Ccapaw a hoipaw tuh hiinnaw a hoi. Pachia Ccapaw kha a hoi leipaw tuh hiinnaw hoi khyh.
Thangsahnaw
13 Pachia Ccapaw min na zyn oh paw nanning nynh zungzae hiinnaw na hoi oh paw kha na nyku nawlan oh, hynh-e ccaw hynh nae kalan kae zei.
14 Pachia kya aening rawhoynaw ah hoi oh paw tuh e hynh nynh thua: Aening nynh amaw rynaw thyhte ccangkhakheit kha ah ngiaku oh ze, Pachia nynh oun thaepya.
15 Aening nynh ah ngiaku oh paw miakaw kha aning nynh oun thaepya cipaw ah ny oh ze, amaw kalan ah ngiaku oh paw kha ah mue oh cipaw ah ny oh.
16 Chinaw kalan a phyasah leipaw seinaw a rae cciamangpaw a uno kha lukhakheit nynh a muih lanze, a hanlan saw a sangpah cih. Chinaw kalan a phyasah leipaw seinaw a raetu hae kha Pachia nynh hiinnaw a pya cih hae. Chinaw kalan a phyasahpaw seinaw a um, tuh-e seinaw hanlan sawsangpah sah cite ka ho khyh.
17 Cyiseinaw miakaw tuh seinaw nynh thua, thuasalama chinaw kalan a phyasah leipaw seinaw a um.
18 Humhung zemah Pachia kyate a puipaw tuh sei khyh cipaw ah ny oh. Pachia kyate a puipaw tuh amaw te amaw rinkuh zah, Satan nynh ty kho khyh.
19 Aening tuh Pachia kya-e nynh ah thua oh cipaw te laephi balyn tuh Satan kuih kya nynh a um cipaw ah ny oh.
20 Ahmepaw Pachia kha ah ny nawlan oh, Pachia Ccapaw tuh yn thua vae zah, aening kha thaethyanaw oun pya vae cipaw ah ny oh; aening tuh ahmepaw Pachia kya te a Ccapaw Jesu Khri kya nynh ah um oh. Aning tuh ahmepaw Pachia thua zah zungzae hiinnaw mah athua.
21 Ka ccaaw hae, zohtuh hae kha la sibia oh. Amen.