JOHAN
CCAKY KYTHUMNAW
John
Johan Ccaky Kythumnaw hynh “Khriccaaw Piccan” nynh Khriccaaw cciakhaetu Kaias ci hae paw kalan a kypaw nynh thua. Ccawzeitu nynh Kaias kha a luung, pawccecize Kaias nynh ccangpaw Khriccaaw hae a bawmnaw hae te Diotrefes a ci hae paw ccungccapaw kha raeringnaw a pya keiccu nynh athua.
1
1 A kum tang vae paw kae, Johan nynh ka sungsahpaw, byaccing kya kou ka sungsahpaw Kaias, na kalan ccaw kae ky.Ref 1: Loc 19.29; Rom 16.23; 1Ko 1.14
2 Ka sungsahpaw, pawpaw kya balyn hiinhoyte na um nawlan te na ngedan nawlan saw kae sangpya; na thinlung tuh daebabi lan a um cipaw ka ny.
3 Pawccecize nang nynh byaccing kya na hiin thyhawte, uno hae nynh oun thua hae zah na kya umpaw byaccing kong kha ccaekia he a khan hae tuh myarya ka lungtua.
4 Ka ccaaw hae nynh byaccing kya a hiin hae cipaw ka thaepaw lungtuanaw laeze ale huapaw lungtuanaw ka hoi khyh.
5 Ka sungsahpaw, uno hae hanlan thuasah, abyapihua lante mikhia hae hanlan thuasah rya na lawpya hae paw miakaw kya zyn lan um lante rya na law.
6 Minmin nynh sungsakunaw na hoipaw kong kha khriccaawbuu malang ccaekia a khan hae. Nang nynh minmin kha khua a ccongnaw hae kya Pachia rynaw hawte na saw hae ze, ahoypaw rya na lawpaw athua cih.
7 Pawccecize minmin tuh Khri min hanlan cceih hae zah Zenta hae kyate pawsang mah lawkuh khyh hae.
8 Tukeiccuze aening tuh byaccing rya a lah buapaw ah thua nawlan oh, khahcihawpaw ccungccaw hae kha bawm lan accan.
Diotrefes te Demetrias
9 Khriccaawbuu kalan ccaw syntaraw ka zei vae; thuasalama minmin lakuze lupi huapaw lang tang a rypaw Diotrefes nynh kaening kha kaw oun ua khyh.
10 Tukeiccuze kamaw he kae thua te, a cyisahnaw kha a liathui nawlan a cyipaw kha ka dianah cih. Aning nynh ahoy leipaw bya te kaening kha sarisarya oun ci, tuh-e te a lungryachih khyh zah uno hae kha mah innccong a ua khyh hae apiaze innccong a ua ry hae paw kha mah khee hae zah khriccaawbuu kyate a dee hae.
11 Ka sungsahpaw, ahoy leipaw kha kaheihlawku leite ahoypaw kha lawkuh. Ahoypaw rya a lahpaw ccungccaw tuh Pachia kya-e nynh thua, ahoy leipaw rya a lahpaw tuh Pachia kha muih khyh.
12 Ccungccaw miakaw nynh Demetrias a hoynaw kong kha ccaekia a khan hae, byaccing nynh mah amaw kong kha ccaekia a khan. Kaening nynh mah amaw kong kha ccaekia kae khan, ccaekia kae khanpaw tuh akyh cipaw phe na ny oh.
Nyathyakou Beihlangnaw
13 Na kalan zei lanpaw patae ka hoi ung, thuasalama bawpe te ccatui te ka zei ry vae khyh.
14 Aro maw nang kha kae muih cih zah hawiliakute byahoku lan cite ka ngaehoi.
15 Na kya daenaw la um vae sah. Ruiban hae nynh nang kha ae beihlang hae. Ruiban hae kha lu raveihte la beih hae.