4
Ahmepaw te Ahme leipaw Muisaw
1 Ka sungsah hae, muisaw miakaw kha la zyn nan oh; muisaw hae kha Pachia kyate yn thuapaw tou, yn thua leipaw tou cipaw kha la syntawtua oh; pawccecize lingthya profeh hae patae tuh laephi vawlan oun langkuh vae hae.
2 Pachia Muisaw tuh hynhte na nyh cih oh: Jesu Khri tuh pynsaw lante nynh yn thua cite ccaekia a khanpaw muisaw miakaw tuh Pachia kya-e nynh thua.
3 Jesu Khri tuh pynsaw lante nynh yn thua cite ccaekia a khan leipaw muisaw miakaw tuh Pachia kya-e thua khyh. Tuh-e muisaw tuh antikhri kya-e nynh thua; antikhri tuh yn thua cih cite na thae vae oh hawte atu laephi kya a um vae.
4 Ka ccaaw hae, nanning tuh Pachia kya-e na thua oh zah minmin kha phe na tae vae oh; pawccecize nae kya a umpaw Muisaw tuh laephi kya a umpaw muisaw laeze alehua.
5 Minmin tuh laephi kya-e nynh athua hae, tukeiccuze minmin nynh laephi te asekuhpaw uccaw hae kong kha a hothya hae. Laephi ccungccaw hae nynh mih bya kha a ngaepya hae.
6 Aening tuh Pachia kya-e nynh ah thua oh. Pachia a nyhpaw ccungccaw nynh ah bya kha a ngae. Pachia kya-e athua leipaw ccungccaw nynh tuh aening bya kha ngae khyh. Tuhcite aening nynh ahmepaw muisaw te ahynpaw muisaw kha ah ny oh.
Pachia tuh Sungsakunaw
7 Ka sungsah hae, lu kheit te lu kheit sungsakuh oh sih, pawccecize sungsakunaw tuh Pachia kyate yn thuapaw nynh thua. Ccungccaw a sungsahpaw miakaw tuh Pachia kyate yn puipaw thua zah Pachia kha a ny.
8 Ccungccaw a sungsah leipaw tuh Pachia kha nyh khyh; pawccecize Pachia tuh sungsakunaw nynh thua.
9 Pachia nynh aening oun sungsahnaw alangkunawpaw tuh: Ccapaw liate aening nynh hiinnaw ah mue nawlan oh, Pachia nynh a hoi thypaw Ccapaw kha laephi vawlan yn saw.
10 Sungsakunaw cipaw tuh: Aening nynh Pachia kha ah sungsah oh cipaw thua leite, Pachia nynh aening kha oun sungsah zah a Ccapaw kha aening seinaw ngaethyanaw elang yn saw.
11 Ka sungsah hae, Pachia nynh aening hynh myarya oun sungsah lanze, aening mah lu kheit te lu kheit sungsaku lan accan.
12 Hum nynh sanmah Pachia kha muih boi khyh. Aening nynh lu kheit te lu kheit ah sungsaku oh ze, Pachia tuh aening kya um zah, a sungsahnaw tuh aening kya accing.Ref 4.12: Joh 1.18
13 Pachia nynh a Muisaw kha aening oun pya vae keiccuze aening tuh Pachia kya ah um oh zah Pachia tuh aening kya a um cipaw ah ny oh.
14 Paaw nynh Ccapaw kha laephi Khumtu lang yn saw cipaw kaening nynh kae muih zah ccaekia kae khan.
15 Humhung zemah Jesu tuh Pachia Ccapaw nynh thua cite ccaekia a khanpaw tuh a kya Pachia um zah aning mah Pachia kya a um.
16 Pachia nynh aening hanlan a hoipaw sungsahnaw kha aening nynh ah nyh oh zah ah zyn oh.
Pachia tuh sungsakunaw nynh thua; sungsakunaw kya a tynpaw ccungccaw tuh Pachia kya tyn zah, Pachia mah tuh-e paw kya atyn.
17 Aening nynh byapia nin kya rawhoynaw ah hoi nawlan oh, sungsakunaw kha aening kya a ccingsah vae. Pawccecize e laephi vawlan aening tuh Khri hawte ah hiinbua oh.
18 Sungsakunaw kya tuh rinaw um khyh, accingpaw sungsakunaw nynh tuh rinaw kha ccaring a dee. Pawccecize rinaw tuh detahnaw te akyngkuhpaw thua zah, rinaw a hoipaw ccungccaw tuh sungsakunaw phe ccing lan hoi loh khyh.
19 Pachia nynh aening kha oun sungsah ty keiccuze aening nynh amaw kha ah sungsah oh.
20 Ccungccaw lu kheit nynh, “Pachia ka sungsah,” ci zah, a uno kha a hua lanze, aning tuh mihynpaw nynh thua. Pawccecize phang a muihpaw a uno kha a sungsah leipaw ccungccaw nynh a muih leipaw Pachia kha pawtemou a sungsah kho cih?
21 Pachia a sungsahpaw nynh tuh a uno kha mah a sungsah hahe cih, acikuhpaw kawbya hynh Khri kyate ah mue oh.