3
1 Aening tuh Pachia ccaaw hae cite ko ah thua nawlan oh, pawcihawpaw sungsahnaw mou Paaw Pachia nynh oun pya cipaw kha tuatua oh; aening tuh Pachia ccaaw hae nynh ah thua ccaccing oh. Laephi ccungccaw hae nynh Pachia kha a ny khyh hae keiccuze aening kha mah oun nyh khyh hae.Ref 3.1: Joh 1.12
2 Sungsah hae, atu aening tuh Pachia ccaaw hae nynh ah thua oh. Nyalang aening tuh pawte nynh ah thua cih oh cipaw langkuh loh khyh. Thuasalama Khri he yn langkuh te, aening tuh amaw te loku bua lan cipaw ah ny oh; pawccecize aening nynh amaw kha athuanaw thathyhte ah muih cih oh.
3 Khri kya ngaehoinaw a hoipaw miakaw tuh Khri nynh ccipapya lan a um hawte ccipapya lan nynh a umbua.
4 Humhung zemah a seipaw tuh kawbya a lawepaw nynh thua; seinaw tuh kawbya lawenaw nynh thua.
5 Khri tuh ccungccaw seinaw cciakhae khylan nynh yn langku cipaw na ny oh, amaw kya seinaw um khyh.Ref 3.5: Joh 1.29
6 Khri kya atynpaw miakaw tuh seinaw rae khyh; seinaw palei a raepaw miakaw tuh Khri kha muih khyh zah ny mah nyh khyh.
7 Ka ccaaw hae, hum sanmah la lingsakuh nan oh. Khri tuh ading hawte dingnaw rya a lahpaw tuh miding nynh thua.
8 Seinaw a raepaw ccungccaw tuh Satan kya-e nynh thua, pawccecize Satan tuh atakaw te palei a seipaw nynh thua. Pachia Ccapaw yn langkupaw tuh Satan ryalaw kha ro khylan nynh thua.
9 Pachia kyate yn puipaw ccungccaw miakaw nynh tuh seinaw kha rae khyh; pawccecize Pachia ccacii kha tuh-e paw kya atyn, aning tuh Pachia kyate yn puipaw athua keiccuze sei kho khyh.
10 Pachia ccaaw hae te Satan ccaaw hae tuh hynhcite alangkuh: Humhung zemah dingnaw rya a lah leipaw te a uno a sungsah leipaw ccungccaw tuh Pachia kya-e thua khyh.
Sungsakuh Oh
11 Pawccecize atakaw te na thae vae oh paw phungbya tuh hynhte nynh thua: Aening lu kheit te lu kheit sungsaku lanpaw nynh thua.Ref 3.11: Joh 13.34
12 Satan kya-e thua zah amaw a neitaw a theihpaw Kain hawte thua nan oh sih. Pawccemou a neitaw kha a chia ci ze, amaw a cyisahnaw tuh hoy khyh zah, a neitawpaw a cyisahnaw tuh ading keiccu nynh thua.Ref 3.12: Gen 4.8
13 Uteno hae, laephi ccungccaw hae nynh ae hua oh ze nae ngaeangthua nan sah.
14 Aening nynh ah uno hae kha ah sungsah oh keiccuze chinaw kyate hiinnaw kalan ah thua vae oh cipaw ah ny oh. A uno a sungsah leipaw ccungccaw tuh chinaw kya nynh atyn.Ref 3.14: Joh 5.24
15 Humhung zemah a uno a huapaw tuh ccungccaw a theihtu nynh thua; ccungccaw a theihtupaw kya tuh zungzae hiinnaw um khyh cipaw na ny oh.
16 Khri nynh a hiinnaw kha aening hanlan a pyaku; tuhcite aening nynh Pachia sungsahnaw kha ah nythya oh; aening mah ah uno hae hanlan ah hiinnaw kha pyaku lan accan.
17 Thuasalama ccungccaw lu kheit nynh e laephi uccaw hae hynh mang a hoi pite a ryachipaw a uno kha muih zah ngaethyaumsahnaw a hoi khyh lanze, pawtemou Pachia sungsahnaw tuh tuh-e paw kya a um kho cih?
18 Ka ccaaw hae, aening nynh ah bya te kyalya, khalang te kyalya sungsaku leite cyisahnaw te thanccingte sungsakuh oh sih.
19 Tuhteze nynh aening tuh byaccing te ah sekuh oh cipaw ah nyh cih oh zah Pachia malang ah thinlung zynkunaw ah hoi cih oh.
20 Pawccecize ah thinlung nynh ahmaw kha sei oun be lanze, Pachia tuh aening thinlung laeze lesaehua zah pawpaw balyn kha pong a nyhpaw nynh thua.
21 Ka sungsah hae, ah thinlung nynh ahmaw hynh sei oun be khyh ze, Pachia malang zynkunaw ah hoi oh.
22 Aening nynh a kawbya hae kha ah zui oh zah a lungrythuapaw ryalaw hae kha ah law oh keiccuze ah ngiaku oh paw miakaw kha amaw kyate ah mue oh.
23 A kawbya tuh e hynh nynh thua: Aening nynh a Ccapaw Jesu Khri min kha zyn lanpaw te Khri nynh kaw yn pya thyhawte lu kheit te lu kheit sungsaku lanpaw nynh thua.Ref 3.23: Joh 13.34, 15.12, 17
24 Pachia kawbya a zuipaw ccungccaw tuh Pachia kya tyn zah Pachia mah tuh-e paw kya atyn. Aening oun pyapaw Thyaa Muisaw liate Pachia tuh aening kya atyn cipaw ah ny oh.