2
Khri tuh Oun Bawmtu
1 Ka ccaaw taraw hae, nanning nynh na sei khyh ccaw oh cite hynh-e hae hynh nae kalan kae zei. Lukhakheit nynh a sei ze, aening oun bawmtupaw ah hoi oh; aning tuh Paaw ryte a umkheih hae paw adingpaw Jesu Khri nynh thua.
2 Aning tuh aening seinaw hanlan seishawnaw silawnawpaw nynh thua; aening seinaw hanlan kyalya thua leite, laephi ccungccaw hae balyn mih seinaw hanlan mah athua.
3 Aening nynh a kawbya hae kha ah zui oh ze, amaw kha ah ny oh cipaw phe ria lan ah ho kho oh.
4 Amaw kha ka nyh cite ho zah a kawbya hae a zui leipaw ccungccaw tuh mihynpaw nynh thua; tuh-e paw kya byaccing um khyh.
5 Thuasalama humhung zemah a bya a zuipaw tuh Pachia sungsahnaw kha a kya accing ccaccing. Hynhcite nynh aening tuh amaw kya ah um oh cipaw ah ny oh.
6 Pachia kya ka um cite a hopaw nynh tuh Jesu Khri a hiin hawte a hiinbua aho.
Kawbya Thawpaw
7 Ka sungsah hae, nae kalan kawbya thawpaw kha ka zei khyh; atakaw te na hoi vae oh paw kawbya rynpaw kha nynh ka zei. Kawbya rynpaw tuh atakaw te na thae vae oh paw bya kha nynh thua.
8 Amaw kya te nanning kya ahmepaw kawbya thawpaw kha nae kalan ka zei, pawccecize mohnaw tuh zo zah ahmepaw awnaw tuh atu a aw vae.
9 Awnaw kya nynh ka um ci zah a uno kha a huapaw tuh mohnaw kya nynh a um ung.
10 A uno a sungsahpaw tuh awnaw kya tyn zah, ccungccaw khuliasaku lanpaw kha a lungkhu kya um khyh.
11 Thuasalama a uno a huapaw ccungccaw tuh mohnaw kya um zah mohnaw kya nynh a ccia.Tuh-e mohnaw nynh a mit a mohsah keiccuze teilang nynh ka ccia cipaw nyhkuh khyh.
12 Ka ccaaw hae, Bawipaw min liate
nae seinaw kha ngaethya
athua vae keiccuze
nae kalan ccaw ka zei.
13 Paaw hae, atakaw te
a la um vae paw amaw kha
na ny vae oh keiccuze
nae kalan ccaw ka zei.
Ccangvae hae, Satan kha
na tae vae oh keiccuze
nae kalan ccaw ka zei.
Ka ccaaw hae, Paaw kha
na ny vae oh keiccuze
nae kalan ccaw ka zei.
14 Paaw hae, atakaw te
a la um vae paw amaw kha
na ny vae oh keiccuze
nae kalan ccaw ka zei.
Ccangvae hae, nae thawsae zah
Pachia bya tuh nae kya
atyn keiccuze Satan kha
na tae vae oh, tukeiccuze
nae kalan ccaw ka zei.
15 Laephi te laephi kya a umpaw uccaw hae hynh sungsah nan oh. Ccungccaw lukhakheit nynh laephi kha a sungsah ze, Paaw sungsahnaw tuh tuh-e paw kya um khyh.
16 Pawccecize laephi kya a umpaw uccaw hae athuapaw pynsaw rynaw, mit te rynaw, te hiinnaw kong lante lysakunaw balyn tuh Paaw kya-e thua leite, laephi kya-e nynh thua hae.
17 Laephi te laephi uccaw duaanaw tuh azothya; thuasalama Pachia rynaw hawte a hiinpaw ccungccaw tuh zungzae atyn.
Antikhri
18 Ka ccaaw hae, atu ccyh tuh nyathyakou ccyh nynh thua. Antikhri yn thua cih cite na thae vae oh hawte, atu lya antikhri patae um vae hae; tukeiccuze atu ccyh tuh nyathyakou ccyh nynh thua cipaw ah ny oh.
19 Minmin tuh aening kyate a pou hae, thuasalama aening te sekuh bua khyh hae; pawccecize minmin tuh aening te aseku hae ze, aening ryte po a um cih hae. Thuasalama minmin nynh a pou hae paw tuh, aening te minmin balyn tuh ah sekuh vae khyh oh cipaw a langsaku hae paw nynh thua.
20 Thuasalama Athyaapaw nynh nanning kha chitui ae thuh vae oh zah, pawpaw balyn kha na ny oh.
21 Nanning nynh byaccing kha na ny khyh oh keiccu nae kalan ccaw ka zei cipaw thua khyh. Nanning nynh byaccing kha na nyh oh zah, hynbya tuh byaccing te sekuh khyh cipaw na ny keiccu oh nynh nae kalan ccaw ka zei.
22 Hummou mihynpaw tuh? Jesu tuh Khri thua khyh cite a eipaw ccungccaw tuh mihynpaw nynh thua. Paaw te Ccapaw kha a eipaw ccungccaw tuh antikhri nynh thua.
23 Humhung zemah Ccapaw a eipaw ccungccaw tuh Paaw kha hoi khyh. Ccapaw kha a lehkhanpaw tuh Paaw kha mah a hoi.
24 Tukeiccuze atakaw te na thae vae oh paw bya kha nae kya la tynsah oh. Atakaw te na thae vae oh paw bya nynh nae kya atyn lanze, nanning mah Ccapaw kya te Paaw kya na tyn cih oh.
25 Khri nynh aening oun kinpyakupaw tuh zungzae hiinnaw nynh thua.
26 Nanning ling lan ae ry oh paw ccungccaw hae kong te asekuhpaw hynh-e ccaw hynh nae kalan ka zei.
27 Thuasalama Athyaapaw kyate na mue oh paw chitui thuhnaw tuh nae kya atynpaw thua zah, nanning tuh lukhakheit nynh ccangpyaku na ho vae khyh oh. Tuh-e chitui thuhnaw nynh pawpaw balyn kha nanning ae ccangpya oh, tuh-e tuh akyhpaw thua zah hynpaw thua khyh; tuh-e nynh ae ccangpya oh thyhawte nanning nynh amaw kya na tyn cih oh.
28 Ka ccaaw hae, atu Ccapaw kya la tyn oh, tuhteze tuh Ccapaw he yn langku vae ze aening nynh zynkunaw ah hoi cih oh zah, he yn thua vae ze amaw malang maethyanaw ah ccou lan khyh oh.
29 Khri tuh ading cipaw na ny oh ze, dingnaw a raepaw ccungccaw miakaw tuh Pachia kyate a puipaw nynh thua cipaw na ny oh.