38
Maee-u te Pyanawpaw Silawhang
(Exo 27.1-8)
1 Maee-ute silawnawpaw silawhang kha mah eri thing te a rae; tuh-e tuh dong pangaw sae zah dong pangaw ako; asaepaw te akopaw phe lokuh zah dong thum ahang.
2 Apaki ki pali vawlan khe a ki hae kha a rae; a ki hae tuh silawhang te ccangkheit lang po akyngkuh lante sohin te a thei.
3 Beikhang kya-e uccaw hae balyn, buhhaw nungnawpaw ang hae, luanawpaw kawpia hae, pakepi hae, sivaw ccungthy te maee-e nungnawpaw pake hae kha sohin te a rae.
4 Beikhang hanlan pasaryh ccangkheit kha a ccu zakaw angankunaw khe sohin khate a rae.
5 Puihnawpaw ccong hae kha ruh nawlan sohin pasaryh apaki ki pali kyakhe bawtary ccangpali kha a rae;
6 puihnawpaw ccong hae kha eri thing te rae zah sohin te a thei.
7 Te silawhang voikheit voikheit lang umpaw bawtary hae kyakhe puihnawpaw ccong hae kha puih nawlan a ruh hae; tuh-e silawhang tuh alungkhu kya akua a um lante thingphe te a rae.
8 Tungkunaw bu thuakaw kya ryalah hae paw nopi hae kya-e sohin muinsado khate sohin pakepi te sohin ccu kha a rae.
Beikbu Voidu Raenaw
(Exo 27.9-19)
9 Beikbu voidu kha a rae; voidu alia lang zokhawpaw kha nebaleihpaw laaw te kuakuhpaw ahoypaw boei khate dong za kheit asae lante arae;
10 beikbu tung tungkuin te ccusy ccangkuin tuh sohin te raepaw nynh thua hae, thuasalama tung kya umpaw bawnawpaw hae te ccong hae kha tuh ngun te raepaw nynh thua hae.
11 Palung langkhe dong za kheit asaepaw zokhawpaw a um; tuh-e atung tung kuin te ccusy ccangkuin tuh sohin nynh athua hae, thuasalama tung kya-e bawnawpaw hae te ccong hae tuh ngun nynh athua hae.
12 Niccaw lang e zokhawpaw boei tuh dong sung pangaw sae zah atung tung haw te ccusy ccanghaw a um; tung kya-e bawnawpaw hae te mih ccong hae tuh ngun nynh athua hae.
13 Nithua lang a sangpaw voidu a malang tuh dong sung pangaw ako cih.
14 Sakoih voikheit lang kya zokhawpaw boei tuh dong haw lae pangaw sae zah, tung tungthum te ccusy ccangthum a um hae.
15 Ccangpaw voikheit lang mah tuhmaminte a um; voidu voikheit voikheit lang umpaw sakoih kya tuh dong haw lae pangaw asaepaw zokhawpaw boei hae um zah tung tungkuin te ccusy ccangthum a um.
16 Voidu kya po voilu lan zokhawpaw boei balyn tuh nebaleihpaw laaw te kuakuhpaw boei hae nynh athua hae.
17 Tung hae elang ccusy hae tuh sohin nynh thua hae, thuasalama tung kya-e bawnawpaw hae te mih ccong hae tuh ngun nynh thua hae; tung alu hae kha mah ngun te ccaanpaw nynh athua hae, voidu a tung hae balyn kha ngun te theipaw ccong hae te piade athua hae.
18 Voidu sakoih kya zo lanpaw boei tuh meizong, sephaphuhpaw, asepaw law te nebaleihpaw laaw khate phynbang te kou puithya lan ccaanpaw nynh thua. Tuh-e tuh dong kuin sae zah dong pangaw ahang, voidu kya zokhawpaw boei te po angin hae.
19 Tung tungpali a um; mih ccusy ccangpali tuh sohin thua hae zah, mih bawnawpaw hae tuh ngun nynh athua hae, mih tung alu hae te mih ccong hae tuh ngun nynh athua hae.
20 Beikbu hanlan te voidu balyn hanlan po voilu lan mangpaw pangreih balyn tuh sohin te raepaw nynh thua hae.
21 Hynh-e hae tuh Moses kawbya kya zei athua vae thyhte ranpibawi Aaron ccapaw Ithamar kuihkaw ryalah hae paw Levi phin hae nynh a rae hae paw byakinnaw kya-e beikbu ccazing nynh thua.
22 Bawipaw nynh Moses kya kaw a pyapaw balyn kha Judah phin a thuapaw Hur ccapaw Uri a ccapaw Bezalel nynh a rae;
23 Bezalel ryte Dan phin a thuapaw Ahisamak ccapaw Oholiab mah a umbua; aning tuh lung te raenaw kya a puakuhpaw, accinccang a soi thyapaw, meizong, sephaphuhpaw, asepaw law te nebaleihpaw kya haetapaw a soi thyapaw nynh thua.
24 Beikinnthyaa saknaw balyn kya ryalaw nawlan mang lan cite a hlu hae paw sui tuh talent kuin ccangtakua te shekel za sari sung thum acih, tuh-e tuh beikinnthyaa kya-e tounawpaw shekel te a tou hae paw nynh thua.
25 Milu ria a thuapaw ccungccaw zapi nynh a pya hae paw ngun tuh talent za kheit te shekel thong kheit za sari sung sari ccangpangaw acih, tuh-e tuh beikinnthyaa kya-e shekel te a tou hae paw nynh thua; - Ref 38.25-26: Exo 30.11-16
26 Milu rianaw kyaze ria a thua hae paw, kum kuin te palung lang pise balyn tuh thong za taruh thong thum za pangaw sung pangaw cih hae zah, tuh-e hae lu kheit cci nynh beka ccangkheit cci (tuh-e tuh beikinnthyaa kya-e shekel te tou lanze shekel angankuh nynh thua) kha a pya hae.Ref 38.26: Mat 17.24
27 Ngun talent za kheit tuh beikinnthyaa ccusy hae hanlan te zokhawpaw boei ccusy hae hanlan nynh thua; talent ccangkheit tuh ccusy ccangkheit hanlan thua zah talent za kheit tuh ccusy za kheit hanlan nynh thua.
28 Alaepaw ngun shekel thong kheit za sari sung sari ccangpangaw kha tung hae hanlan bawnawpaw hae lang thuasah, mih tung alu hae thei nawlan thuasah, tuh-e hae elang ccong hae lang thuasah a rae hae.
29 A hlu hae paw sohin tuh talent sung sari te shekel thong ning za pali acih;
30 tuh-e sohin khate tungkunaw bu thuakaw hanlan ccusy hae kha thuasah, sohin silawhang te sohin pasaryh kha thuasah, silawhang a uccaw balyn kha thuasah,
31 Voidu po voilupaw ccusy hae, voidu thuakaw a ccusy hae kha thuasah, beikbu pangreih balyn kha thuasah, voidu po voilupaw pangreih balyn kha thuasah a rae hae.