1 Khaix an aux yaog ngai tix jhak mai yaox ka bua lai pa po tix bua heue. 2 Nawh chawk ka aux ah nin, “Mawh yaox maix patix lie? “Aux deeh pawk ah nin, “Aux yaox ka bua lai pa po tix bua heue. Krax lang nawh koe tixnga sawk mai krax vieh nawh koe kao sawk heue.” 3 Nawh ah nin ka aux in mawh krax pa jhax lawg pa lih hu ka piang ca haktiex khawmuik khawm leeing heue. Can kix pa briex pa lak, tak sang mawh pa teei ti tik awm pa koe ka bua lai in tix plak mai can pui pa pie ti yuh krax tiextu, tak sang mawh pa teei ti tik awm pa koe ka bua lai an tix plak heue. 4 Siyiex cao kru naing raoma ah nin “Aux tak sang ploi bua lai in lih hu mai tak sang laig ka daux nyiex pui pa briex pa lak mai ka daux nyiex pui pa pie ti yuh krax tiextu ka daux ceu kaux Aux heue. Tak sang ot ka daux nyiex nawh mai ih ti tik nyiex an mai khaox nyiex khankix khawm lon simaox khankix heue.

5 Kawncau Siyiex, pa hoik sikah tau mai aux, lih hoek mai ah nin ka aux, “Yaog ngai maix jhak mawh ceu patix pa lih hoek lie? 6 Aux deeh chawk ah nin, “Mawh an patix lie? “Nawh ah nin, “Pa lih hoek tan mawh phliex heue. “Nawh baox deeh ah nin, “In mawh pak peung pa caox caig kix ka piang haktiex heue.” 7 “Aux yaox plah dieb sivun pa hoik yaog tix tix plah mai in mawh bun tix kaux pa ngawm ka daux phliex an heue.” 8 Nawh ah nin, “In mawh pa caox caig heue. “nawh cot bun an laig ka daux phliex mai tik plah dieb sivun an ka piang moing phliex heue. 9 Aux baox yaog ti jhak mai yaox bun ra kaux lih hoek mai bhaung koe ka daux pruik kiex, kiex hoik koe pruik awm pruik sim saoh mai kiex hoik yaog phliex an hu ka daux sinax haktiex mai raoma heue. 10 Aux chawk ka kawncau Siyiex pa hoik sikah tau mai aux ah nin, “Kiex sang thaih ti viex phliex an hu dee mawx lie?” 11 nawh ah nin ka aux, “Sonsang sum nyiex tix lhang son nawh ka daux haktiex Shina heue. Yam hoik grum sum ka nyiex an mai deuh nawh ot ka dee ot tokaux tix tan heue.”