1 Aux yaog ngai tix jhak mai yaox ling lawx naing pon lhang hoik hoek khaing sinax gawng ra mu, gawng an hoik mawh gawng tawng lheung heue. 2 Ling lawx naing phao ka tix lhang, tok ka brung raoh, Ref 6:2 Jhi 6:4. ling lawx naing an ra lhang tix lhang tok ka brung lung,Ref 6:2 Jhi 6:5. 3 ling lawx naing loe lhang tix lhang tok ka brung paing Ref 6:3 Jhi 6:2.mai ling lawx naing pon lhang tix lhang tok ka brung preeh, pa mawh brung pa kied phai brax mai pa kied koe riang heue. 4 Aux deeh chawk ka kawncau Siyiex pa hoik sikah tau mai aux ah nin “Simiang aux eue, inkix mawh patix lie?” 5 Kawncau Siyiex hoik deeh pawk lox ka aux ah nin, “Inkix mawh khuan daux raoma pon mu,Ref 6:5 Jhi 7:1. pa lih hoek khaing dee cung kix ka plak sivoe Siyiex pa kwang haktiex khawmuik heue. 6 Pa hoik tok ka brung lung an mawh pa sang hu ka haktiex plak blaong, brung paing an tak sang hu hawt khaix mai brung preeh an mawh pa sang hu ka haktiex plak seh heue.” 7 Brung pa kied phai pa koe riang koe rao an hoik lih hoek, sonsang lailing jee blaong piang haktiex heue. Kawncau Siyiex ah nin, “Hu heue, lailing ti hu jee jee blaong blaong ka piang haktiex heue. “Kix hoik lailing ti hu jee hu blaong ka piang haktiex heue. 8 Nawh kok ka aux ah nin “Jhak heue, pa hu ka haktiex plak blaong hoik kieh khuan Aux laux lee tix ka daux haktiex plak blaong heue.”

9 Gumlox Siyiex hoik hoek ka aux ah nin, 10 “Rieb ti teei totaix khaing pui pa giex laung an khankix, ka Heladie, Tawbiyax mai Yedayax khankix pa hoik hoek khaing veng Babulon mai hu tidom neh ka daux singaix an mai laig ka daux nyiex Yosiyax pa mawh kawn simex Zephanix heue. 11 “Teei mau mai khri mai yuh mhok khri, ceep ka kaing Yawsux, pa mawh kawn simex Yehawzadax, cub cao giex kaing li pa ting khankix heue. 12 Siyiex cao kru naing raoma ah nin, “Jhak heue, Pui pa kok ceu kaux mawh nyoek kak khaox Davit, nawh tak sang yaog ti lih khaing dee ot tix mai nawh tak sang sum nyiex bwan Siyiex heue.Ref 6:12 Ye 23:5, 33:15; Zak 3:8 13 Nawh tak sang sum nyiex bwan Siyiex, Nawh tak sang koe min pakngai mai tak sang ngawm ti kwang ka piang dang ngeung cao nawh mai krax keud krax sawn pa yuh paox pie ka daux krax pa nhim, tak sang koe ka daux sinax kiex khawm ra heue.” 14 “Mhok khri in tak sang deuh mawh pa doh keud ka daux nyiex bwan Siyiex, son Heladie Tawbiyax, Yedayax mai Yosiyax, pa mawh kawn simex Zephanix heue. 15 “Pui pa ot dee pa kied singai, tak sang hoek ti sum nyiex bwan Siyiex, pex tak tawng ka hoik ploi Siyiex cao kru naing raoma Aux hoek ka pex. Phan pex koe krax cu nghiet ka lox Siyiex, pa mawh Siyiex pex, ceu in khankix tak sang lih ti mawh heue.