1 Kawncau Siyiex pa hoik sikah tau mai aux hoek so aux kaoh, awm pui pa hoik siduad ti kaoh khaing it tix heue. 2 Nawh chawk ka aux ah nin “Mawh yaox maix ka ceu patix lie? “Aux deeh ah nin, aux yaox ka pang jawk ten pa hoik yuh ka khri nawnaw tix mu mai jawk ten koe ka piang toh an mai ka piang pang jawk ten koe jawk ten aliah mu mai koe blawng aliah mu pa hoik sitoe tix ka jawk ten aliah mu an heue. 3 “Ka praok koe khaox sanlun Ref 4:3 Jhi 11:4. ra gaw, an tix gaw koe ka plak dawm jawk ten mai an tix gaw koe ka plak gwiex jawk ten an heue.” 4 Aux chawk ka kawncau Siyiex pa hoik sikah tau mai aux ah nin “Simiang aux eue, inkix mawh ceu patix?” 5 Kawncau Siyiex pa hoik sikah tau mai aux hoik deeh pawk lox ka aux ah nin “Mawh ang maix tawng ka mawh inkix ceu patix lie? “Mai aux ah nin, “Simiang aux eue, aux ang tawng heue.” 6 Nawh krai ka aux ah nin, in mawh gumlox Siyiex pa hoek ka Zerubabelax, Ref 4:6 Eza 5:2. ang tie mawh khaing ka daux pa kied ting riang rao mai khaing ka daux krax pa koe sibrawm, viang mawh nan, mawh pa kaoh khaing Khuan Aux heue. Siyiex cao kru naing raoma ah nan heue. 7 “Gawng ting eue, mawh maix patix lie? Sivoe Zerubabelax maix tak sang lih ti mawh daux lung heue. Nawh tak viex lon simaox tix lon hoek mai deuh piang dee choek nyiex mai pui yo lox tix ting ah nin kieh bwanson koe ka an heue. 8 Khaix an, gumlox Siyiex hoik baox hoek ka aux ah nin, 9 “Taix Zerubabelax hoik sum ti deuh num riah nyiex bwan in, taix nawh tak sang yuh an heue. Khaix an maix tak tawng ka hoik ploi Siyiex cao kru naing raoma Aux hoek ka pex heue. 10 mawh pui mawx pa hoik ah lox salao ka singaix pa ting in mawh singaix pa iak lie? Ngai inkix aliah mu mawh ngai Siyiex pa tah jhak ka piang haktiex khawmuik khawm leeing, pui pa yaox ka maox tiag pa koe ka daux taix Zerubabelax tak koe krax gaux rhawm heue.Ref 4:10 Jhi 5:6. 11 Aux baox chawk ah nin, Mawh khaox sanlunRef 4:11 Jhi 11:4. ra gaw pa koe ka plak dawm plak gwiex pang jawk ten an ceu patix lie?” 12 Aux baox deeh chawk nawh ah nin, “Kak khaox sanlun ra kak an pa koe ka praok blawng khri pa sau bee mawh ceu patix lie? 13 Nawh hoik deeh pawk lox ka aux ah nin, “Mawh ang maix nyang tawng ka mawh inkix ceu patix lie? “aux ah nin “Simiang aux eue, Aux ang tawng heue. 14 Nawh deeh ah nin, kak khaox an ra kak, mawh pui pa hoik groi rawm bee ka piang pa cung hawt praok Siyiex, pa kwang ka haktiex khawmuik khawm leeing heue.”