1 Nawh Cao baox jhi aux yaox Yawsux pa mawh cao giex kaing li pa ting Ref 3:1 Eza 5:2.cung ka plak sivoe kawncau Siyiex mai satan cung ka plak taix khawn dawm Yawsux sonsang tieh feen Nawh Cao heue.Ref 3:1 Jhi 12:10. 2 Siyiex ah nin ka satan an, “Satan eue, Siyiex sidiex ka maix! Ref 3:2 Yu 9. pa mawh Siyiex pa hoik laug ti teei veng Yerusaliem sidiex ka maix heue. Ang in mawh nge khix pa hoik yoi khaing daux ngu tix nge lie?” 3 Yam an Yawsux hoik ceep ka kraung pa seeing mai cung ka plak sivoe kawncau Siyiex an heue. 4 Kawncau Siyiex deeh krai lox ka pui pa hoik cung ka plak sivoe Nawh khankix ah nin “Peeik ti tik kraung ceep pa seeing an khaing nawh heue. “Krai ka Yawsux ah nin. “Jhak heue, Aux hoik teei ti tik phimap khaing maix mai Aux tak sang tawx maix ceep kraung pa mhawm grang heue.” 5 Aux ah nin, “Kieh kix ceep mhok pa singax ka piang kaing nawh” awm an kix tawx nawh ceep mhok pa singax ka piang kaing nawh mai tawx nawh ceep kraung ceep nawh mai kawncau Siyiex kawx cung hawt praok tan heue.

6 Khaix an, kawncau Siyiex hoik tawx satix ka Yawsux ah nin, 7 “Siyiex Cao kru naing raoma ah nin, phan maix hawt ti hu ka daux krax Aux khankix mai priex ti hawt ka gumlox pingnyap Aux, khaix an maix tak yaox ti kwang ka nyiex Aux mai yaox ti pau ka daux gwang nyiex Aux, Aux tak sang kieh maix lai ling ti hu ka daux sinax pui inkix, pa cung ti ot tin heue. 8 Yawsux pa mawh cao giex kaing li pa ting eue maix khawm paox pa ngawm ka plak sivoe maix khankix, nghiet heue. Kix mawh mhai rug pa daox deng heue. Aux tak sang kieh kawncau Aux, pa mawh nyoeg kak Davit hoek heue.Ref 3:8 Ye 23:5; 33:15; Zak 6:12. 9 Jhak heue, Lon simaox pa hoik deuh Aux ka plak sivoe Yawsux, ka piang lon simaox an tix lon koe ngai kah aliah mu heue. Jhak heue, Aux tak sang saik ka lon simaox an mai Aux tak sang preet ti tik phimap haktiex an ka daux tix singaix ngie heue. “Siyiex cao kru naing raoma ah nan heue. 10 “Ka daux singaix an, pui ku kaux tak sang ghaok ka paox plawg tix khankix hoek ka greem nhu plix siiet nawh mai ka greem khaox ruh nawh heue. Siyiex cao kru naing raoma ah nan heue.Ref 3:10 Mi 4:4.