1 Khaix an, aux yaog ngai tix jhak mai yaox ka pui tix kaux pa giex maox tiag tix nyaing ka daux taix tix heue. 2 Aux ah nin “Mawh sang hu maix dee mawx lie? “Nawh krai ka aux ah nin “Sang hu tiag ka veng Yerusaliem, jhak ka pa koe krax vieh miex ding mai koe krax lang miex ding heue.” 3 Yam lih hu kawncau Siyiex pa hoik sikah tau mai aux an mai kawncau Siyiex tang kaux hoik lih hoek ti rieb ka nawh, 4 mai ah nin “Maix to hu krai ka pui awn ju in ka daux krax pa ah nin, veng Yerusaliem, tak mawh dee pa kawn ot pui khankix, awm veng khankix pa ang koe guh veng, mawh kheu kied hun pui mai tobrie khankix ka daux veng an heue. 5 Siyiex ah nin “Aux tak sang mawh guh veng ngu ka hawt vung viang nawh mai mawh min pakngai ka daux sigreung nawh heue.

6 “Kaoh heue, Kaoh heue, to ti lih hoek khaing haktiex plak blaong heue. “Siyiex ah nin heue. “Grawh grawng nawh, Aux hoik kieh pex prung prang awm bhaung pon plak daux raoma khankix heue. “Siyiex ah nan heue. 7 Pui veng Zion pa ot tau mai kawn bun veng Babulon khankix eue, to ti glawd heue.” 8 Siyiex cao kru naing raoma ah nin, khaix hoik sidawng min pakngai Nawh ploi aux hu ka ceu pui khankix pa tud rhim ti teei pex, pui pa hu teeh ka pex, mawh pui pa teeh ka daux kawn ngai Nawh Cao heue. 9 Jhak heue, Aux sang sau taix tix ka kix mai kix tak sang lih mawh kraung pa hoik tud rhim ti laux leeing son siliex kix heue. Khaix an, pex tak tawng ka hoik ploi Siyiex cao kru naing raoma Aux hoek heue. 10 Kawn bun Zion eue, ah lai rhax mai koe krax gaux rhawm kah heue. Grawh grawng nawh, jhak heue, Aux hoik hoek ot ka daux sinax pex heue. “Siyiex ah nan heue. 11 “Yam an tak sang koe ceu pui tom nie pa deeh hoek ka Siyiex mai kix tak sang mawh pui Aux heue. Aux tak ot ka daux sinax pex heue. Khaix an, pex tak tawng ka hoik ploi Siyiex cao kru naing raoma Aux hoek ka pex heue. 12 “Siyiex tak sang teei kraung cie haktiex Yudax mawh sinngao ka daux haktiex pa singax Nawh Cao mai tak sang baox deeh laug ti teei veng Yerusaliem heue. 13 Can pa koe nex koe nham khankix eue, Koe krax pa yiien yawg, ka plak sivoe ngai Siyiex, mawh kheu Nawh Cao hoik yaog ti kaoh khaing dee ot pa singax singeh Nawh Cao heue.