18
Grawng Yum Apsalom
1 Davit simin pui pa ot tau mai tix mai yaog cao kaing naing khankix pa kwang piang pui tix rheng kaux mai cao kaing naing piang pui tix yieh kaux.
2 Khaix an Davit ploi cub pui khankix lih hu loe cub, tix cub ot greem tawm tai Yuabax mai an tix cub ot greem Abashie kawn simex Zeruya pux Yuabax mai tix cub ot greem Itie ceu pui Gitix mai simiang ah nin ka pui khankix, “Tokaux aux tak hu tau mai pex.”
3 Viang mawh nan cub pui hun deeh ah nin, “Tokaux cao maix tak ang pon ti lih hu, mawh kheu phan yix yaox ti to, kix ang deuh yix koe ceu mai phan yix yum tix plak kawx, kix ka ang nyang deuh koe ceu, viang mawh nan, tokaux maix nie lheu ngawh khaing yix tix mheen kaux, mawh kheu nan, phan maix ot ka daux veng khaix yix mai tawx krax teem ka son yix lheu mhawm.”
4 Simiang deeh ah nin ka kix, “Can pa yaox pex mawh pa mhawm, aux tak hawt ti yuh, “mawh kheu nan, simiang cung praok siviex veng mai cub pui kaing yieh mai cub pui kaing rheng li hu.
5 Simiang tawm lox ka Yuabax mai Abishie, Itie ah nin, “Viex rhawm vieh va ka kawn simex aux Apsalom, tau mai pa jhak tix pakngai aux. “Pui khankix mhong yam tawm simiang lox ka cub cao kaing naing khankix, son grawng Apsalom.
6 Pui khankix lih hu sonsang puing naing ka pui Isarelax mai kix sipub tix puing paox tix ka daux tiag daux nong Epharem.
7 Pui Isarelax khankix hoik som ka plak sivoe kawncau Davit, krax pa pah yum hoik kied ting ka daux singaix an mai can pui pa yum baoh tan koe ra mheen kaux.
8 Naing hoik tah hu ka baoh haktiex an ku daog diem, pui pa yum daux tiag singaix an nie lheu khaing pui pa yum ka lawm vaig khankix.
9 Apsalom sipub ka cub kawncau Davit, yam an Apsalom brug law cie tix to mai law an laig ka greem kak khaox piak van ting mai kaing nawh sighap tix sinax kak khaox, khaix hoik to law brug nawh khaing nawh, nawh teuk teue tix dee lhaong tan.
10 Pui tix kaux hoek ti yaox ka nawh mai deeh hu krai ka Yuabax ah nin, “Aux taug yaox Apsalom teuk teue tix piang khaox piak van ting tan.”
11 Yuabax ah nin ka pui pa hoek ti krai an ka nawh, “Mawh rug yaox maix nawh tete lie? yuh ka mawx maix lai ang blung nawh cod piang tiex, phan maix yuh nan, aux tak sang tawx maix cie mau kao shekhe mai maox rawd nyoi.”
12 Pui an deeh ah nin ka Yuabax, “Viang aux yaox ti rieb mau tix rheng shekhe khaing daux taix maix kawx, aux tak ang pon tawx taix tix ka kawn simex simiang, mawh kheu hoik mhong ex lox tawm simiang ka maix mai ka Abishie mai Itie ah nin, viex rhawm vieh va piang kawn simex aux Apsalom tau mai jhak tix pakngai aux awx,
13 phan aux yuh nan, aux tak awm pui tawb kheem mai hoek krax som ju, mawh kheu ceu pa glip khaing simiang ang koe tix ceu kawx maix mai aux kawx tak mawh pui koeng ka paox tix.”
14 Yuabax ah nin, “Aux ang lai gla bawg yam tom rheung tau mai maix, ” mai nawh teei pliah loe giang mai hu blung sok rhawm Apsalom, yam kawn im nawh sinax kak khaox piak van.
15 Pui awn ju kao kaux, pa klawm kraung naing ceep Yuabax khankix, vung viang ka Apsalom mai pah nawh yum.
16 Yuabax phlu teettawng mai tiebtie ka kix, mawh kheu nan, pui naing deeh ing khaing hawt pheet tix pui Isarelax.
17 Mai kix teei tokaux yum Apsalom, hu tik ka daux o pa ting, pa koe ka daux nong mai pum simaox piang simeeig nawh, pui Isarelax kawx deeh to ti ing ka nyiex gox tix ku kaux.
18 Yam kawn im ju Apsalom, nawh sum rong simaox tix mu, son cao tix ka daux ngawd simiang tan, mawh kheu nawh hoik ah nin, “Aux ang koe kawn simex tix kaux kawx, sonsang plud tix doh keud ka aux, ” nawh kok rong simaox an awm ceu kaux cao tix, tom hoek in singaix hoik kok mawh rong simaox Apsalom ka heue.
Mhong Davit Yum Apsalom
19 Ahimat kawn simex Zadok ah nin, “Kieh aux to ti ing krai grawng ka simiang, grawng hoik pawk Simiang Siyiex bix ka pui koeng nawh khankix.”
20 Yuabax deeh ah nin ka nawh, “Maix ang pon ti viex satang in ing daux in singaix, kheu jao mawh ngaix yum kawn simiang, viang mawh nan maix tak pon ti viex grawng satang in singaix tang ngaix.”
21 Yuabax ah nin ka Kushi, “Hu heue, ing krai grawng pa hoik yaox maix ka simiang, ” mai Kushi ngeuh kaing tix ka Yuabax mai to hu.
22 Ahimat kawn simex Zadok baox ah nin ka Yuabax, “Viang yuh ka mawx kawx, kieh aux baox to hawt khaix Kushi, ” Yuabax ah nin, “Kawn simex eue maix ang tie koe satang grawng pa koe bwanson tix sang krai maix lai sang to yuh ka mawx?”
23 Mai Ahimat ah nin, “Viang yuh ka mawx kawx, ca kieh aux to hu liak, ” Yuabax ah nin ka nawh, “To ti hu heue, ” khaix an Ahimat kawx to ti hu krax daux lung mai luan khaing Kushi.
24 Davit ngawm sinax diang siviex veng ra mu mai cao pau veng haok piang braux nyiex pau veng piang guh veng, yam yaog nawh ti jhak nawh yaox ka to pui tix hoek tix kaux.
25 Cao pau veng yo mai krai ka simiang mai simiang ah nin, “Phan nawh mawh tix kaux khaing nawh tee mawh pa viex grawng satang tix ceuceu, ” nawh hoik nie hoek dex phao.
26 Khaix an cao pau veng baox yaox ka to pui tang kaux tix kaux ti hoek mai cao pau veng yo ti krai ka cao pau siviex veng ah nin, “Pui tang kaux tix kaux baox to tix hoek, ” mai simiang deeh ah nin, “Nawh kawx baox mawh pa viex satang hoek.”
27 Mai cao pau veng an ah nin, “Aux keud pui pa to tix hoek phao voe an sang mawh Ahimat kawn simex Zadok, ” mai simiang ah nin, “Nawh mawh pui mhawm mai nawh tak hoek tau mai grawng lox satang ceu pa mhawm.”
28 Mai Ahimat kok yo ah nin ka simiang, “Kieh nyawm ot, ” khaix nawh gup pakngai tix piang tiex plak sivoe simiang ah nin, “Kieh pa yaogyaw bwanson koe ka Simiang Siyiex maix, pa hoik ap pui pa yaog plawng taix tix ka maix mai pa tieh feen ka simiang aux.”
29 Mai simiang ah nin, “Mawh kawn klawt kawn simex awn ju aux Apsalom nang lie?” Ahimat deeh pawk ah nin, “Yam ploi cao kaing naing Yuabax aux hoek ka maix, aux yaox sinum lawh lox pa kied ting, viang mawh nan, aux ang kriem tawng mawh grawng ceu patix.”
30 Mai simiang deeh ah nin, “Greed maix cung ti ot tin, ” mai nawh greed tix cung tan.
31 Khaix an tivud Kushi hoek bleeh ah nin, “Cao Simiang aux eue, koe satang ceu pa mhawm, mawh kheu Simiang Siyiex hoik pawk bix maix ka daux singaix in, ka pui khankix pa yaog ti kaoh mai tieh feen ka maix.”
32 Mai simiang ah nin ka Kushi, “Mawh kawn klawd kawn simex awn ju aux Apsalom nang lie?, ” Kushi pawk ah nin, “Kieh pui koeng cao simiang aux khankix mai can pui pa yaog ti kaoh tieh feen mai pa yuh krax kha rhawm ka maix, awm pa yaox kawn nyawm simex awn ju maix.”
33 Khaix an simiang kied koe krax pa saik rhawm mai nawh haok daux lawg pa koe piang guh veng ka see daux diang siviex mai yiiem ah nin, “Kawn simex aux Apsalom eue, kawn simex, kawn simex aux Apsalom eue, aux mie ti mawh pa yum tang maix, kawn simex aux Apsalom, kawn simex aux eue mai nawh yiiem sigrien sigre tan heue.”