19
Davit Deeh Hoek Yerusaliem
1 Mai kix deeh krai grawng an ka Yuabax ah nin, “Jhak heue, simiang hoik kied yiiem doe mai hoik kied khrup rhawm ka son Apsalom.”
2 Mawh kheu nan, grawng pa pex kix naing daux singaix an, hoik deeh tieh ti mawh pa khrup rhawm ka son pui khawmuik, mawh kheu pui hoik mhong grawng kied laux rhawm simiang son kawn simex tix daux singaix an.
3 Daux singaix an pui khankix briex mox ti ing daux veng awm pui pa koe krax kaig tua pa hoik mox tix to khaing daux bing naing.
4 Simiang hoik tawb ngai baoh tix mai riag yo ti yiiem lox kied ting sigrien sigre, “Kawn simex aux Apsalom eue, Apsalom eue, kawn simex aux eue.”
5 Yuabax laig ka daux nyiex simiang ah nin, “Ka daux in singaix maix hoik kieh kawncau tix khankix, pa hoik taoh ju maix mai ju kawn simex kawn bun maix mai khawm ju moeng maix kaig tua,
6 maix kawn ca moh ka pui pa koeng ka tix mai deeh tieh tix koeng ka pui pa moh ka tix khankix, mawh kheu maix hoik krai pao grawng ang maix lai keud son grawng cao kaing naing mai son kawncau tix daux singaix, aux hoik tawng grawng ceu in phao, phan Apsalom kawn im ju mai phan yix hoik mawh pa yum khawmuik daux in singaix, grawng ceu an tak sang mawh pa kieh maix nyawm rhawm ka.
7 Mawh kheu nan, yam in yaog ti kaoh mai hu tawx lox nyawm rhawm ka kawncau maix khankix liak, mawh kheu aux hoik tiextu ka Simiang Siyiex, phan maix ang hu, pui tix kaux kawx tak ang lai ot tau mai maix sawm in, “Mai an tak nie lheu mawh pa caox ka son maix khaing can pa caox caig pa hoik sax yaox maix ti kham jah tom awn ju maix tom hoek yam in.”
8 Khaix an simiang yaog ti kaoh mai ngawm ka diang siviex veng, yam mhong kix grawng ngawm simiang ka diang siviex veng tan, mawh kheu pui khankix hoek ka plak sivoe simiang khawmuik mai pui Isarelax hoik tang to ti hu ka nyiex gox cao tix ku kaux.
Davit Deeh Ing Veng Yerusaliem
9 Ka daux cub doeh pui Isarelax hoik thung thiang paox ti ah nin, “Simiang hoik taoh ex khaing daux tawm taix pui koeng ex mai hoik kieh ex luad luan khaing daux tawm taix pui Philitix khankix mai yam in nawh hoik deeh yaox ti to khaing daux haktiex cao tix jao Apsalom.
10 Apsalom mawh pui pa hoik groi ex bee piang mai pa hoik yaog ex nawh mawh simiang piang tix, hoik yum ka daux naing, yuh ka mawx pex lai ang ah grawng pa sang deeh viex ex simiang ing.”
11 Simiang Davit ploi pui hu ah nin ka cao giex kaing li Zadok mai Abiata, “Pax krai ka kwad song pui Yudax ah nin, yuh ka mawx pex lai tuk bawg yam, sonsang deeh viex simiang ing ka nyiex cao nawh, lox krai pui Isarelax khankix hoek bleeh ka simiang khawm ka nyiex haw nawh.
12 Pex mawh puxaik aux, mawh si-ang aux mai nex nham aux, yuh ka mawx pex lai kawn ca tuk bawg yam tom rheung sonsang deeh viex simiang ing,
13 mai kieh ah nin ka Amasa, “Ang maix mawh si-ang aux mai nex nham aux lie? phan maix ang yaox ti mawh cao kaing naing ting pa plud Yuabax daux cub kru naing aux ka plak sivoe aux, kieh Siyiex yuh ceu pa nie lheu khaing an piang aux.”
14 Mawh kheu nan, Davit hoik kieh pui Yudax khawmuik khaw rhawm awm rhawm pui tix kaux, kix ploi pui hu krai lox in ka simiang, “Sonsang deeh ing maix mai khawm kawncau maix khawmuik.”
15 Simiang deeh ing mai hoek ka rawm klawng Yawdan mai pui Yudax hoek ka veng Gilagalax, sonsang rieb ti simiang mai viex nawh tiang rawm klawng Yawdan.
16 Mai ShimiRef 19:16 2Sa 16:5-13. kawn simex Gerax pui Binyamin, pa kaoh khaing veng Bihurim niied ti lih hoek tau mai pui Yudax, sonsang rieb ti ka simiang Davit.
17 Pui Binyamin khankix hoek tau mai nawh tix rheng kaux, khawm Zibax kawncau daux nyiex ma Sawlux mai khawm kawn simex nawh kao phwan kaux, khawm kawncau nawh khankix tixnga kaux, hoek tau mai nawh yam an, kix tiang ti hu ka plak toi rawm klawng Yawdan sivoe simiang.
18 Kix vai reu tiang ti hu sonsang tang kix cub kawn nyiex ma simiang khankix hoek mai sonsang priex rien ka kix mhawm mhawm. Shimi kawn simex Gerax hoek grux ngawng tix ka plak sivoe simiang, yam tiang nawh rawm klawng Yawdan.
19 Nawh ah nin ka simiang, “Paw nyang kieh simiang aux deuh phimap ka aux liak, mai paw lai keud ka grawng pa lud loe kawncau maix ka daux singaix, yam lih hu cao simiang aux khaing daux veng Yerusaliem mai paw lai een grawng ceu an daux rhawm tix.
20 Aux pa mawh kawncau maix hoik tawng ka hoik yuh tix phimap, jhak heue, aux mawh pa hoek sivoe paox tix ka daux in singaix khaing daux pao nyiex pui Yosiep, sonsang hoek rieb ti ka simiang.”
21 Yam an Abishie kawn simex Zeruya deeh pawk ah nin, “Shimi caw tix yum kheu jao hoik jhax lawg nawh ka simiang pa hoik groi Simiang Siyiex bee piang ang mawh lie?”
22 Mai Davit deeh ah nin, “Kawn simex Zeruya khankix eue, aux hoik yuh ceu tix ka pax, sonsang deeh mawh pax pui koeng ka aux daux in singaix lie? Mawh sang yaox pui Isarelax ti yum tix kaux kaux daux in singaix lie?, mawh ang aux tawng hoik mawh tix simiang piang pui Isarelax daux in singaix lie?”
23 Simiang deeh ah nin ka Shimi, “Maix tak ang pon ti yum, ” mai simiang hoik tiextu tix ka nawh.
Davit Mai Mephibawshiet
24 MephibawshietRef 19:24 2Sa 9:1-13; 16:1-4. kawn saux Sawlux hoek ti rieb ka simiang, nawh ang khoek caong tix, ang khlao hauk jheeh tix mai ang sidaux kraung ceep tix, jah singaix lih hu simiang, tom deeh hoek simiang ka daux krax pa nhim.
25 Yam hoek rieb Mephibawshiet ka simiang daux veng Yerusaliem, simiang chawk ka nawh ah nin, “Jao patix maix ang hu tau mai aux?”
26 Mai nawh deeh pawk ah nin, “Cao simiang aux eue, aux mawh pa laux caong, “Aux keud sang sau an brug son tix mai hawt khaix simiang, kawncau aux hoik pie lhen ka aux.
27 Mai nawh hoik coh lox ka cao simiang grawng kawncau maix, viang mawh nan, simiang aux mawh pa awm kawncau Siyiex, mawh kheu nan yuh awm pa koe rhawm maix.
28 Mawh kheu paox nyiex keeing aux khankix, hoik mawh pa keung tix yum ka plak sivoe cao simiang aux, viang mawh nan maix hoik deuh kawncau maix ka daux sinax can pui pa ih priex piang pheen sawm tokaux cao maix, aux kawn sang koe akhwang tix baox rawg ceu patix, ka daux pa yiien tix sivoe simiang yuh ka mawx?”
29 Mai simiang deeh ah nin ka nawh, “Maix deeh baox krai grawng cao ti yuh ka mawx? Aux hoik tat ah nin maix mai Zibax tak gwieh tix cie haktiex.”
30 Khaix an, Mephibawshiet deeh ah nin ka simiang, kieh nawh teei ti cie ankix khawmuik, kheu hoik deeh hoek cao simiang aux ka daux krax pa nhim rhawm ka nyiex ma cao tix.”
Davit Cauxrhawm Ka Bazilie
31 Mai BazilieRef 19:31 2Sa 17:27-29. pui haktiex Gilat lih hoek khaing veng Rawgelim sonsang tawx nawh simiang tiang rawm klawng Yawdan.
32 Bazilie mawh pui pa kied kuad tix kaux mai ju nawh koe tixdaix num, nawh hoik yuh ti tawx pa ih ka simiang glang yam ot nawh ka daux veng Mahanem, kheu mawh nawh pui pa kied mi.
33 Simiang ah nin ka Bazilie, “Tiang ti hu tau mai aux, aux tak khre rien pa ih ka son maix, glang yam kawn ot maix ka daux veng Yerusaliem tau mai aux heue.”
34 Viang mawh nan, Bazilie hoik deeh ah nin ka simiang, “Aux tak sang pon ti im ju miex ding, sonsang khaw aux ti hu tau mai simiang ka veng Yerusalie lie?”
35 “Ju aux hoik koe tixdaix num daux in singaix heue. Mawh kawn sang chix gwieh aux ti tawng ka ceu pa mhawm mai ceu pa caox lie? Mawh kawn sang cim kawncau maix ka ceu pa ih tix khankix mai khawm ceu pa nyaux tix khankix lie? Mawh kawn sang chix mhong aux lox lai rhax pa ah cub kawn bun khankix rheung been miex ding lie? Khaix an, aux tak sang kieh kawncau maix khankix deeh koe beeh glawm pa ciien tix ceu, tom rheung bawg yam ka son cao simiang aux yuh ka mawx lie?
36 Kawncau maix tak sang tiang ti hu ka plak toi rawm klawng Yawdan tau mai simiang ceeix ngie mai simiang chix sang deeh tawx totaix ceu in ka aux yuh ka mawx lie?
37 Yuh bwanson deeh kieh kawncau maix ing, sonsang pon aux ti deeh ing yum ka daux veng tokaux cao tix mai deeh kieh aux mawh pa sipaung tokaux yum tix hawt simeeig keeing aux khankix heue, viang mawh nan, in mawh kawncau maix Khimaham awx, kieh nawh tiang ti hu tau mai simiang mai yuh ti tawx pa yaox maix mawh ceu pa mhawm son nawh liak.”
38 Mai simiang deeh pawk lox ah nin, “Khimaham tak mawh pa tiang ti hu tau mai aux mai aux tak yuh tix tawx ceu pa lo nawh khankix, awm pa yaox aux mawh pa mhawm ka son maix heue. Yam in, can ceu pa hoik khyox khaw maix ti mhaing ka aux khankix, aux tak yuh tix tawx son maix heue.”
39 Khaix an, pui khankix hoik tiang ti hu khawmuik ka plak toi rawm klawng Yawdan daux bawg yam an heue. Yam hoik tiang simiang ti hu ka plak toi an, simiang hoik kawm tix ngheet ka Bazilie mai nawb bwan piang nawh mai nawh deeh ing ka dee ot cao tix heue.
Krax Simah Son Simiang
40 Yam in, simiang hu ka veng Gilagalax mai Khimaham hoik hawt hu tau mai nawh heue. Pui Yudax khankix khawmuik hoik hu tawx simiang tau mai pui Isarelax khankix tix plak heue.
41 Khaix an, pui Isarelax khankix khawmuik, hoek ka simiang ah nin nawh, puxaik ex pui Yudax khankix hoik briex maix hu dee singai mai hoik deeh viex simiang khawm pao nyiex maix khankix mai khawm pui Davit khankix khawmuik, pa ot tau mai simiang khankix tiang toi rawm klawng Yawdan, kheu jao pa yuh ka mawx lie?
42 Mawh kheu nan, pui Yudax khawmuik deeh pawk lox ka pui Isarelax ah nin, “Grawh grawng nawh, simiang mawh paox nyiex pa kied dex mai yix heue. Khaix an, pex chix koe krax pa song rhawm piang kix kheu jao pa yuh ka mawx lie? Khex hoik ih yix pa ih cie simiang lie? Phan ang mawh nan, khex hoik tawx simiang totaix tix ceuceu ka yix lie?”
43 Pui Isarelax deeh pawk lox ka pui Yudax ah nin, “Yix hoik koe krax pa dex tau ka simiang kao son, mawh kheu nan, yix hoik baox nie lheu koe krax pa dex ka Davit khaing pex heue. Kheu pex hoik yuh ti koe lox pa sibriem piang yix mai ang hoik mawh yix pa jah ti tawx grawng keud grawng gau, sonsang deeh viex yix simiang ti ing lie?” Viang mawh nan, gumlox ah pui Yudax khankix hoik nie riex khaing gumlox ah pui Isarelax khankix heue.