17
Ahitawphelax Mai Hushie
1 Khaix an Ahitawphelax baox ah nin ka Apsalom, “Kieh aux laug pui tix mheen ra rheng kaux mai aux tak yaog ti hawt khaix Davit daux sawm in.
2 Aux tak krup yam kawn taug mao nawh mai yam iak riang nawh mai yuh nawh lhat graung mai pui pa ot tau mai nawh tak to khawmuik mai aux tak pah ngie ka simiang.
3 Aux tak deeh viex pui khawmuik hoek ka maix, yam pon ex pui pa sawg maix cao simiang tix kaux an, awm hoik pon ex pui deeh hoek khawmuik, khaix an pui khawmuik tak koe krax pa yiien yawg.
4 Gumlox an hoik mawh pa khaw rhawm Apsalom mai khawm kwad riex ju pui Isarelax ka.
Grawng Pa Keud Hushie
5 Yam an Apsalom ah nin, “Kok Hushie pui Akhix hoek kieh ex nghiet ceu pa sang ah nawh.”
6 Yam hoik hoek Hushie ka Apsalom, nawh ah nin, “Ahitawphelax hoik tawx krax keud yuh nin, mawh sang yuh ex awm pa krai nawh lie? Phan ang mawh nan, krai cie maix.”
7 Hushie deeh pawk ah nin ka Apsalom, “Krax keud pa tawx Ahitawphelax bawg in ang mawh pa mhawm.”
8 Hushie deeh ah nin maix hoik tawng grawng keeing tix mai pui nawh khankix, mawh pa kied ting riang rao mai kix kied song rhawm awm krih pa hoik grai kawn ka daux tiag, keeing maix mawh pui pa yuh naing tix kaux mai ang sax pan sax it daux sinax pui khankix.
9 Yam in nawh kawn mox tix ka daux tiex, phan ang mawh nan, nawh tak mox tix tang dah, yam yum pui khankix tiblah phao voe, can pui pa mhong ka grawng ceu an, tak ah nin, pui pa hawt khaix Apsalom hoik som hoik nai
10 Pie pui pa koe rhawm vao rhawm kwa ang ah mai pa koe rhawm awm rhawm sivai sangsi kawx, tak lhat graung, mawh kheu pui Isarelax khawmuik tawng ka mawh keeing maix pui pa kied ting riang rao mai pui pa ot tau mai nawh khankix kawx mawh pa koe rhawm vao rhawm kwa.
11 Mawh kheu nan, aux tawx krax keud ka maix, pui Isarelax khawmuik hoek ka maix jah ka veng Dan tom hoek ka veng Berashibax, kieh haoh hun awm mhaik praok rawm sigrit sigra, kaux cao maix kawx, caw ti hu ka daux naing.
12 Mawh kheu nan, ex tak krup nawh tix dahdah, ka dee sang pon ex ti yaox nawh mai ex tak yuh naing ceep ka nawh, awm jauh rawm ciex piang tiex, tokaux cao nawh mai pui pa ot tau mai nawh tak ang lai deuk tix kaux kawx.
13 Phan nawh phrut tix laig ka daux veng tix veng, pui Isarelax khankix tak viex maox hoek ka daux veng an mai ex tak sileed ka veng an laig ka daux rawm klawng, tom ang lon simaox lai deuk pie tix lon kawx khaing tan.”
14 Apsalom mai pui Isarelax khawmuik ah nin, “Krax keud sawn pa tawx Hushie pui Akhix lheu mhawm khaing krax keud Ahitawphelax, “mawh kheu Simiang Siyiex sang kieh krax laux leeing hoek piang Apsalom mai yuh krax keud pa tawx Ahitawphelax mawh pa som nai.
Hushie Tawx Satix Ka Davit
15 Hushie ah nin ka Zadok mai Abyatha cao giex kaing li, “Ahitawphelax hoik tawx krax keud ka Apsalom mai ka kwad song pui Isarelax, awm an aux deeh baox tawx krax keud ka nawh.
16 Mawh kheu nan, niied ploi pui hu krai ka Davit ah nin, daux sawm in paw lai ot daux lung daux tiag, niied ti to hu ka plak toi an, phan ang mawh nan, simiang mai khawm pui pa ot tau mai nawh, krax yum tak bleet ka kix khawmuik”
17 Yawnasan mai Ahimat ot ka daux yaong Enrawgelax, kheu ang rhawm kieh pui yaox yam laig tix daux veng, mawh kheu nan, kawncau bun tix kaux hoek ti krai grawng kuceu ka kix mai kix deeh krai lox an ka Davit.
18 Viang mawh nan, kawn nyawm tix kaux hoik yaox ka kiex mai nawh deeh hu krai grawng an ka Apsalom, kiex khawm ra niied ti hu khaing tan mai hoek ka veng Bahurim daux nyiex pui pa koe rawm daux ka brawk nyiex mai kiex laig mox tix daux rawm daux an.
19 Bun cao nyiex teei dawb tawb mai tawb piang moing rawm daux mai nawh hok nghox piang, ang koe pui tawng tix kaux kawx.
20 Yam hoek kawncau Apsalom ka daux nyiex bun an kix ah nin, “Ot Ahimat mai Yawnasan dee mawx, “bun an deeh ah nin ka kix, “Kiex hoik tiang toi klawng, “yam sawg kix ka kiex mai ang yaox, kix deeh ing ka veng Yerusaliem.
21 Mai khaix hoik lih hu kix khaing tan, Ahimat mai Yawnasan deeh lih khaing daux rawm daux mai kiex hu krai grawng an ka simiang Davit ah nin, “Yaog ti kaoh mai niied tix tiang plak toi rawm, mawh kheu Ahitawphelax hoik tawx krax keud pa deeh tieh feen ka son maix.”
22 Mawh kheu nan, Davit mai pui nawh khawmuik, yaog ti kaoh mai tiang hu toi rawm klawng Yawdan mai yam hoik bah riang praix ponngawb, pui pa ang nyang bax tiang toi rawm klawng Yawdan, ang lai deuk tix kaux kawx.
23 Yam hoik yaox Ahitawphelax ka ang kix lai hawt ti yuh awm krax keud pa hoik tawx tix, nawh sau an brug tix piang la mai yaog ti ing ka daux veng ot tix ka nyiex cao tix, khaix hoik khre rien nawh kuceu son pui daux nyiex ma tix mai nawh rawd ngawg tix yum ka maox mai kix sipaung nawh ka daux simeeig keeing nawh.
24 Yam bleeh Davit ka veng Mahanem, Apsalom tau mai Isarelax kawx tiang hu plak toi rawm klawng Yawdan.
25 Apsalom yaog Amasa plud tix mawh cao kaing naing ting daux cub kru naing nawh tang Yuabax, Amasa mawh kawn simex Yetara pui Ishamelax pa hoik teei ti moeng Abigelax, kawn bun Nahat pux o Zeruya miex Yuabax.
26 Mawh kheu nan, pui Isarelax mai Apsalom hoik bang ti ot ka daux haktiex Gilat.
27 Yam bleeh Davit ka veng Mahanem, Shawbi kawn simex Nahat pui veng Rabax pui Amon mai Makhirax kawn simex Amelax pui veng Lawdebax mai Bazilie pui Gilat khaing veng Rawgelim khankix,
28 hoik viex kraung it kraung tawm mai tawg klong, aw tiex, gaox nghox ca mai gaox nghox koi mai phawng blah mai gaox diag mai ceem, ceem raoh mai ceem pa hoik diag khankix,
29 Rawm hia mai bee rawm teeih pa klon, yung mai khlawp rawm teeih, hoek ka Davit mai pui pa ot tau mai nawh ih ka mai kix ah nin, “Pui khankix hoik cai rhawm mai hoik taug mao mai sang nyaux nie rawm ka daux tiag heue.”