16
Kawncau Mephibawshiet
1 Yam hoik luan Davit khaing choek gawng ceeix, Zibax kawncau Mephibawshiet hoek rieb nawhRef 16:1 2Sa 9:9-10. tau mai la pa viex lhang ra mu mai nawh tang khlawp blah ra yieh khlawp mai sigleem plix siiet kroh tix yieh sigleem mai khlawp plix ruh tix yieh khlawp mai si ngiien hak rawm plix siiet tix mu.
2 Mai simiang ah nin ka Zibax, “Mawh sang viex maix ti yuh tix ka in?” Zibax deeh ah nin, “La in kiex mawh sonsang brug paox nyiex simiang, khlawp blah plix ruh mawh sonsang ih pui awn ju khankix mai rawm plix siiet mawh sonsang nyaux pui pa taug mao ka daux tiag.”
3 Simiang deeh ah nin, “Mawh ot cub kawn simex cao simiang maix dee mawx?” mai Zibax pawk lox ah nin, “Nawh ot ka daux veng Yerusaliem, mawh kheu nawh ah nin, daux in singaix doeh nyiex ma pui Isarelax tak deeh tawx meung haktiex keeing aux ka aux”
4 Mawh kheu nan, simiang deeh ah nin ka Zibax, “Mawh heue, kraung khrai cie Mephibawshiet khawmuik, tak mawh cie maix, ” mai Zibax deeh ah nin, “Cao simiang aux eue, aux hoek krub ka plak sivoe maix, daux pa viex tix rhawm awn rhawm tiiem, sonsang pon aux bwanson pa caux rhawm plak sivoe maix.”
Shimi Jhax Lawg Ka Davit
5 Yam hoek simiang Davit ka veng Bahurim, pui tix kaux khaing doeh nyiex ma Sawlux, pa kaux Shimi kawn simex Gerax lih hoek khaing tan, tau mai lox pa jhax lawg ang jud jai.
6 Mai khwang Davit mai kawncau nawh khankix ka simaox, pui khankix ot plak dawm mai plak gwiex simiang khawm ra plak.
7 Shimi jhax lawg ah nin, “Maix mawh pa kieh nham pui jauh mai mawh pui caox lih hu heue, lih hu heue.”
8 Simiang Siyiex hoik viex nham phimap doeh nyiex ma Sawlux hoek piang maix, ka dee pa hoik plud maix ti kwang mai Simiang Siyiex deeh ap meung haktiex in, daux tawm taix kawn simex maix Apsalom, mawh kheu mawh maix pa kieh nham pui jauh, ceu pa laux leeing hoik hoek piang maix.”
9 Abishie kawn simex Zeruya ah nin ka Davit, “Jao pa yuh ka mawx maix lai kieh sox yum an jhax lawg ka tix?, kieh aux hu kid ti teei kaing nawh.”
10 Mai simiang deeh ah nin, “Kawn simex Zeruya khan kiex eue, mawh dex dawd pax mai aux ka ceu patix?, kieh nawh jhax lawg heue, phan mawh Simiang Siyiex pa ah nin ka nawh, jhax lawg ka Davit, mawh pui mawx pa sang pon ah nin, maix hoik yuh ceu an kix kheu jao patix?”
11 Davit deeh ah nin ka Abashie mai kawncau nawh khawmuik, “Jhak heue, kawn simex cao aux, hoik sawg ka ju aux, pui Binyamin in, tak sang nie lheu pon yuh ceu in mie ding, grham nawh, kieh nawh jhax lawg heue, mawh kheu Simiang Siyiex hoik tawm gumlox tix ka nawh.”
12 Kheu pa jhax lawg in singaix, ha mawh Simiang Siyiex pa sang kia ngien piang pa khaw aux rhawm tix mai tak deeh tawx pa mhawm ka aux pleue.”
13 Yam lih Davit krax tau mai pui nawh khankix khaing tan, Shimi hawt khaix kix ka praok gawng plak sivoe nawh mai baox jhax lawg nawh mai khwang nawh ka lon simaox mai ruat phawng tiex piang nawh.
14 Yam bleeh simiang mai pui pa hu tau mai nawh ka veng Bahurim, kix kied taug mao mai laux lee tix tan heue.
Krax Keud Pa Tawx Ahitawphelax
15 Yam hoek Apsalom mai pui nawh khawmuik, ka veng Yerusaliem mai Ahitawphelax kawx hoek tau mai kix.
16 Yam hoek Hushie pui Akhix paox grawm Davit ka Apsalom mai Hushie ah nin ka Apsalom, “Kieh simiang lang ju, kieh simiang lang ju.”
17 Mai Apsalom ah nin ka Hushie, “In mawh sijax pa yuh maix piang paox grawm tix lie? kheu jao patix maix laix ang hu tau mai paox grawm tix.”
18 Mai Hushie deeh ah nin ka Apsalom, “Ang mawh, aux tak ot tau mai pui pa hoik laug Simiang Siyiex mai pui pa hoik laug pui Isarelax khawmuik mai aux tak ot mai nawh.
19 Lheu khaing an, aux tak sang yuh kaing jhaw pui mawx? mawh ang aux caw ti yuh kaing ka son kawn simex nawh lie? Awm hoik yuh aux kaing plak sivoe keeing maix mawh kheu nan, aux tak yuh kaing ka plak sivoe ngai maix.”
20 Khaix an Apsalom ah nin ka Ahitawphelax, “Sang caw aux ti yuh ka mawx, tawx krax keud liak.”
21 Mai Ahitawphelax deeh ah nin ka Apsalom “Hu laig ka daux dee ot moeng iak keeing maix khankix, pa hoik prah nawh kix mawh cao pau nyiex haw, yam mhong pui Isarelax khawmuik ka yuh maix pa seeing brai keeing tix kah, khawn taix pui pa ot plak maix tak nie koe riang rao kah.”
22 Mawh kheu nan, kix sum nyiex gox tix lhang ka son Apsalom piang choek nyiex haw mai Apsalom hu laig dee ot moeng iak keeing tix ka plak sivoe ngai pui Isarelax khankix.Ref 16:22 2Sa 12:11-12.
23 Mai krax keud pa tawx Ahitawphelax, daux yam an, awm lox pa hoik chawk pui ka Siyiex, mawh kheu nan, krax keud pa tawx Ahitawphelax, Davit mai Apsalom hoik priex ti hawt mhawm mhawm heue.