15
Grawng Tieh Feen Apsalom
1 Apsalom khre rien ling lawx brung naing mai brung naing mai pui naing tix phwan kaux, pa to hu plak sivoe nawh.
2 Apsalom kaoh caocao mai cung hawt yam hoek pui ti sang kieh simiang prawng see tix, Apsalom kok pui an hoek ka tix ah nin, “Mawh kaoh maix khaing veng mawx, ” mai nawh tak deeh pawk ah nin, “Kawncau maix mawh doeh nyiex ma pui Isarelax.”
3 Apsalom deeh ah nin ka nawh, “Jhak heue, grawng see maix mawh pa mhawm mai pa khaw caw, viang mawh nan, pui pa hoik laug simiang sonsang prawng see maix ang koe tix kaux kawx.”
4 Lheu khaing an Apsalom baox ah nin, “Phan aux yaox ti mawh cao prawng see daux haktiex in, pui pa koe grawng see kuceu khankix nawh tak hoek ka aux mai aux tak prawng rahsee ka son nawh.”
5 Yam hoek tix kaux kaux dex nawh, sonsang hoek krub ka nawh, nawh nyeu taix ti lih giex nawh mai ngheet kah.
6 Ka daux pa yuh nin, Apsalom hoik pon priex rhawm pui Isarelax khawmuik, pa sang hoek prawng see tix ka simiang.
7 Khaix hoik luan pon num, Apsalom ah nin ka simiang, “Kieh aux hu ka veng Hebron, sonsang deeh cox aux lox sijax pa hoik yuh tix ka Simiang Siyiex.”
8 Mawh kheu kawncau maix hoik dawg yuh ti deuh lox sijax tix ceu, yam kawn ot aux ka veng Geshurax ka daux haktiex Shurix, phan Simiang Siyiex deeh viex aux hoek ka veng Yerusaliem tete, aux tak yuh kaing jhaw son Simiang Siyiex”
9 Mai simiang deeh ah nin ka nawh, “Hu ka daux krax pa nhim, “mawh kheu nan, nawh yaog ti kaoh mai lih hu ka veng Hebron.
10 Viang mawh nan, Apsalom ploi pui hu jiang can dee ot doeh ru pui Isarelax khawmuik ah nin, “Yam mhong pex lox teettawng dom mawx dom an, pex ah nin, Apsalom kwang ka daux veng Hebron”
11 Apsalom mai pui ra yieh kaux pa hoik ghaok lih hu khaing veng Yerusaliem tau mai nawh, kix hu mai pa ang tix tawng tidtix khawm rhawm rah rhawm see tix.
12 Khaix an Apsalom kok ka Ahitawphelax pui Gilaw cao pa tawx rhawm keud ka Davit, pa ot daux veng Gilaw, yam kawn tan nawh krax tan pa appong, pui pa deeh tieh feen khankix niied ti ting riang mai pui Apsalom kawx, niied ti baox haoh hun sinyek sinyek.
To Davit Khaing Veng Yerusaliem
13 Pui viex sitang tix kaux hoek ka Davit ah nin, “Rhawm rhi pui Isarelax khankix hoik koe tau mai Apsalom.”
14 Mawh kheu an Davit ah nin ka kawncau tix pa ot tau mai nawh ka daux veng Yerusaliem, “Yaog ti kaoh mai kieh ex to, niied yuh phai phai, phan ang mawh nan, ex ang lai boek khaing Apsalom, phan ang yuh nan, aux lhat nawh krup ex mai viex pa laux leeing hoek piang ex mai yuh veng in kha rhawm ka lawm vaig tix.”
15 Mai kawncau simiang khankix deeh ah nin ka nawh, “Yix pa mawh kawncau maix tak yuh awm pa tat maix daux rhawm tix.”
16 Simiang lih hu tau mai pui daux nyiex haw tix khawmuik, viang mawh nan, simiang prah moeng iak tix kao kaux, priex nyiex haw khaix tix.
17 Simiang lih hu tau mai pui tix khawmuik mai hu bang plak praix veng ka yaong Petham.
18 Khaix an kawncau nawh khankix hu ka plak sivoe nawh mai pui Kheretix pui Peletix, pui Gitix khawmuik koe liah yieh kaux, pa hawt khaix nawh khaing daux veng Gata, hu ka plak sivoe nawh.
19 Mai simiang deeh ah nin ka Itie pui Gitix, “Maix lai hawt hu tau mai yix kheu jao patix, deeh ing ot tau mai simiang khraox, mawh kheu mawh maix pui tang meung mai mawh nyo sinie pa ang koe dee ot koe.
20 Phan ah tete maix tak hoek ngie kawxkawx, daux singaix aux sang pon kieh maix lailing hu jee hu blaong tau mai yix yuh ka mawx, mawh kheu ang aux nyang bax tawng dee sang hu tix, deeh ing mai viex puxaik maix khankix ing, kieh pa caux rhawm mai pa mawh meh koe tau mai maix.”
21 Mai Itie deeh pawk lox simiang ah nin, “Awm im ju Simiang Siyiex mai awm im ju cao simiang aux, can dee ot cao simiang aux dee mawx ang ah, yum ang ah, im ang ah, kawncau maix tak ot tan tau.”
22 Mawh kheu nan, Davit deeh ah nin ka Itie, “Hu sivoe heue. “Khaix an Itie pui Gitix mai pui nawh khankix khawm kawn pa iak pa ting yaog ti hu sivoe.
23 Pui haktiex khankix yiiem sigrien sigre mai pui pa hu tau mai nawh khankix yaog ti hu, tokaux cao simiang tiang rawm klawng Kidaron mai pui khankix tiang ti hu ka daux tiag khawmuik.
24 Zadok mai pui Lewix pa ot tau mai nawh khawmuik kawx, klawm teug bwan sijax mukheu Siyiex hoek mai kix tah ti deuh teug bwan sija mukheu Siyiex tan mai Abyatha kawx krox tan, tom hoek lih hu simiang khaing daux veng.
25 Khaix an simiang ah nin ka Zadok, “Deeh yaog ti klawm teug bwan sijax mukheu Siyiex ing ka daux veng, phan aux pon bwanson krax pa caux rhawm plak sivoe ngai Simiang Siyiex, Nawh Cao tak deeh teei aux ing mai Nawh Cao tak jhi aux yaox teug bwan in khawm dee ot Nawh Cao.”
26 Viang mawh nan, phan Nawh Cao ah nin, Aux ang khaw rhawm ka maix, mawh kheu nan, aux tak ot tin, kieh Nawh Cao yuh awm pa koe alo tix piang aux.”
27 Nawh deeh ah nin ka cao giex kaing li Zadok, “Ang maix mawh cao jhai lie? deeh ing daux veng daux krax pa nhim tau mai kawn praix maix ra kaux, pa mawh Ahimat kawn simex cao maix mai Yawnasan kawn simex Abyatha.
28 Jhak heue, Aux tak pau maix ka daux lung daux tiag, Ref 15:28 Yaog 63 Title. tom hoek bawg yam deeh mhong aux lox tix ceuceu khaing maix.”
29 Mawh kheu nan Zadok mai Abyatha deeh yaog tix klawm teug bwan sijax mukheu Siyiex ing ka veng Yerusaliem mai kix ot tan.
30 Khaix an Davit tawb kaing tix mai peeik kiep tix piang gawng Sanlon mai yiiem mai can pui pa ot tau mai nawh khankix kawx tawb kaing tix ku kaux mai haok piang gawng tau mai pa yiiem yo tix.
31 Yam an pui tix kaux hoek krai Davit mhong ah nin, “Ahitawphelax ot ka sinax pui tieh feen tau mai Apsalom, “mai Davit ah nin, “Simiang Siyiex eue, aux rawg bwan ka Maix Cao, kieh krax keud Ahitawphelax mawh pa giex going.”
32 Yam hoek Davit piang choek gawng, ka dee krub nawh ka Siyiex tan, yam an pui veng Akhit pa mawh Hushie hoik hoek rieb nawh tau mai riah sibex tix mai khawm phawng tiex piang kaing nawh.
33 Davit ah nin, phan maix hu tau mai aux, tak mawh beeh glawm ciien ka aux.
34 Mawh kheu nan maix deeh ing ka daux veng ah nin ka Apsalom, simiang eue, aux tak mawh kawncau maix, awm hoik sax mawh aux kawncau keeing maix glang ka singaix pa hoik luan, khaix an maix tak pon yuh krax keud Ahitawphelax laux leeing ka son aux.
35 Zadok mai Abyatha cao giex kaing li kawx ot tau mai maix tan ang mawh lie? can ceu pa mhong maix khaing daux nyiex simiang maix tak krai ka Zadok mai Abyatha.
36 Kawn simex kix ra kaux pa mawh Ahimaza kawn simex Zadok mai Yawnasan kawn simex Abyatha kawx hoik ot tau mai kix tan, can pa mhong maix kuceu maix tak kieh kiex deeh hoek ti krai ka aux.”
37 Mawh kheu nan, Hushie paox grawm Davit deeh ing ka daux veng mai Apsalom kawx laig daux veng Yerusaliem yam an heue.