14
Apsalom Deeh Ing Ka Yerusaliem
1 Yuabax kawn simex Zeruya tawng ka byaong rhawm simiang ka Apsalom.
2 Yuabax ploi pui hu ka veng Tekaw mai kieh viex bun tix kaux pa koe pingnya cuyi hoek khaing tan ah nin ka nawh, “Yuh grang maix awm pui khrup rhawm mai ceep kraung khi rhawm son pui yum, paw kraix bee ka tokaux tix, yuh maix awm grang bun khrup rhawm tom rheung son pui yum.”
3 “Hu ah nin ka simiang awm lox pa tawm aux, ” mawh kheu nan, Yuabax dha ti gau lox pa sang khaw nawh ti krai.
4 Yam hoek bun veng Tekaw ka simiang, nawh gup ngai tix piang tiex mai krub ka nawh ah nin, “Simiang eue, Teem ka aux liak, ”
5 khaix an simiang chawk nawh ah nin, “Koe ceu lo maix patix, ” mai nawh deeh ah nin, “Aux mawh miexmai pa hoik yum mex.”
6 “Kawncau bun maix koe kawn simex ra kaux, kiex simah paox ti daux tiag ang koe pui kieh ka kiex tix kaux kawx, tix kaux tom pah an tix kaux yum.
7 “Jhak heue, paox nyiex aux hoik yuh see ka kawncau bun maix ah nin, deeh ap pui pa pah puxke tix yum, sonsang deeh pah yix nawh tang puxke nawh, pa hoik pah nawh yum, yix tak yuh pui plud sinngao nawh laux leeing, mawh kheu nan, kix tak sang preet gaox ngu pa kawn deuk ka aux mai ang lai kieh mex aux koe ceu kaux mai ang lai kieh simie nawh deuk piang haktiex.”
8 Simiang deeh ah nin ka bun an, “Deeh ing ka nyiex maix, aux tak prawng ca ka son maix.”
9 Bun veng Tekaw deeh ah nin ka simiang, “Cao simiang aux eue, kieh phimap in koe piang aux mai piang paox nyiex aux khankix, paw kieh phimap koe piang simiang mai piang dangngeung maix.”
10 Simiang ah nin, “Kok pui pa deuh phimap ka maix hoek ka aux mai nawh tak ang lai pon tuktiak ka maix tix bawg kawx.”
11 Bun an deeh ah nin, “Simiang eue, rawg bwan ka Simiang Siyiex mai paw tawx akhwang ka pui pa sang pawk bix nham ti yuh krax laux leeing ka kawn simex aux, sonsang ang kix hoek ti yuh kawn simex aux laux leeing, ” mai simiang ah nin, “Awm im ju Simiang Siyiex, hauk kaing kawn simex maix tak ang khrum piang tiex tix gawng kawx.”
12 Mai an bun an deeh ah nin, “Kieh kawncau bun maix deeh krai lox ka cao simiang liak, ” mai simiang deeh ah nin, “Krai heue.”
13 Mai bun an baox ah nin, “Yuh tix maix lai keud ti yuh pui Isarelax laux leeing, mawh kheu lox krai maix ka simiang an hoik awm deuh maix phimap ka cao tix, kheu jao ang maix lai deeh kok ka pui pa hoik grheu maix to deeh hoek ka nyiex.
14 Ex tak mawh pa yum tau ku kaux mai awm rawm pa hoik hieh piang tiex, pa ang lai chix khrawm Siyiex ang lai teei ju pui pa yum tix kaux kawx, viang mawh nan, Siyiex sawg daux krax son ang Nawh Cao tik vud ka pui pa hoik grheu Nawh khaing tix.
15 Mawh kheu aux hoek krai grawng in ka cao simiang tix, jao ghlat pui aux lhat, aux kawncau hoek krai grawng in ka maix simiang, aux keud maix simiang pon yuh in awm pa khyox khaw aux ka maix.
16 Mawh kheu maix simiang tak nghiet mai taoh aux pa mawh kawncau bun maix mai kawn simex aux luad luan khaing pui pa sang yuh aux laux leeing, khaing sinngao Siyiex.”
17 Kawncau bun maix keud yuh nin, gumlox cao simiang aux, kieh rhawm aux nyawm, mawh kheu cao simiang aux hoik tawng ti gwieh ceu pa mhawm mai pa caox, awm kawncau Simiang Siyiex mai kieh Simiang Siyiex maix ot tau mai maix.”
18 Simiang pawk ah nin ka bun an, paw lai mox can pa chawk aux ka maix tix ceu kawx, mai bun an ah nin, kieh cao simiang aux krai pa sang chawk tix khankix.”
19 Mai simiang ah nin, “In khankix mawh pa kaoh khaing rhawm keud Yuabax lie?” Mai bun an deeh pawk ah nin, “Awm im ju maix, cao simiang aux eue, pui tix kaux kawx tak ang pon via tix gwiex dawm khaing gumlox cao simiang aux tix kaux kawx, mawh kawncau maix Yuabax pa hoik tawm hoik gau aux ka lox inkix khawmuik, sonsang krai kawncau bun maix ka.
20 Sonsang tieh loh tix grawng ceu in, mawh kawncau maix Yuabax pa gau khawmuik, simiang aux mawh pa koe pingnya cuyi, awm koe pingnya cuyi kawncau Siyiex mai chix tawng ka pa koe piang haktiex khawmuik.”
21 Simiang deeh ah nin ka Yuabax, “Jhak heue, aux hoik tat grawng in, hu kok pui awm ju Apsalom deeh hoek.”
22 Yuabax gup ngai tix piang tiex mai krub ka nawh mai ah lox ting bwanson ka simiang, Yuabax ah nin, “Cao aux mai cao simiang aux eue, in singaix kawncau maix hoik tawng ka pon tix bwanson ka sivoe ngai maix, kheu hoik yuh maix can pa khyox khaw kawncau tix grum naog.”
23 Mawh kheu nan, Yuabax kaoh mai hu ka veng Geshurax mai deeh viex Apsalom hoek ka veng Yerusaliem.
24 Mai simiang ah nin, “Kieh nawh deeh hoek ka nyiex tix, paw kieh nawh yaox ka pakngai aux, ” mawh kheu nan, Apsalom deeh hoek ka nyiex tix mai nawh ang pon ti yaox ka pakngai simiang.
Davit Pluat Ploi Phimap Apsalom
25 Ka daux pui Isarelax, pui pa mhawm grang mai pa yaogyaw pui ang koe tix kaux kawx awm Apsalom, jah ka caong tom hoek ka kaing, ang koe dee ne tix ceu kawx.
26 Yam rhip nawh hauk kaing tix, tix num tix bawg yam sidah num, kheu jao ciien ka piang nawh, yam rhip nawh hauk tix, krax ciien hauk nawh koe ra yieh shekhe.
27 Apsalom koe kawn simex loe kaux mai kawn bun tix kaux, ceu kaux nawh mawh Tama, nawh mawh bun pa kied mhawm grang pakpeung tix kaux.
28 Apsalom ot ka daux veng Yerusaliem ra num, viang mawh nan, nawh ang bax yaox pakngai simiang.
29 Mawh kheu nan, Apsalom kok Yuabax, sonsang ploi nawh hu ka simiang, viang mawh nan, nawh ang cu tix hoek, nawh deeh baox ploi pui hu kok ra bawg tix bawg, kawx ang cu tix hoek.
30 Mai nawh deeh ah nin ka kawncau tix khankix, “Jhak heue, kaung cie Yuabax koe dex kaung aux mai koe nghox ca kah, hu mai keeig ngu kah, ” mai kawncau Apsalom hu keeig kaung Yuabax ka ngu.
31 Khaix an Yuabax yaog ti kaoh mai hu ka daux nyiex Apsalom ah nin, yuh ka mawx “Kawncau maix lai keeig kaung nghox ca aux ka ngu.
32 Mai Apsalom deeh pawk ah nin ka Yuabax, “Jhak heue, aux hoik ploi pui hu kok maix hoek tin, sonsang kieh maix hu krai ah nin ka simiang, “Maix hoik kieh aux hoek khaing veng Geshurax kheu jao patix, ot aux tan lheu mhawm son aux, “mawh kheu nan yam in, kieh ex yaox pakngai simiang, phan aux koe phimap kieh nawh pah aux yum.”
33 Mawh kheu nan, Yuabax lih hu ka simiang mai krai grawng an kix ka nawh mai yam kok nawh Apsalom hoek ka simiang nawh hoik gup pakngai tix piang tiex, plak sivoe simiang mai simiang ngheet ka Apsalom heue.