13
Grawng Amanon Mai Tama
1 Apsalom kawn simex Davit, koe nan pa kied mhawm grang tix kaux, ceu kaux nawh mawh Tama mai Amanon kawn simex Davit tang kaux kied moh ka nawh.
2 Amanon kied luan moh nan tix Tama mai saux kheu jao, nan pux nawh Tama mawh bun krih loik, nawh ang tawng sang yuh ka mawx ka bun an.
3 Amanon koe paox grawm meed tix kaux pa kaux Yawnadat, kawn simex Shima, puxke Davit, nawh mawh pa kied lhak lhiem tix kaux.
4 Mai nawh chawk ah nin ka nawh, “Maix hoik mawh kawn simex simiang kheu jao pa yuh ka mawx maix lai dieh hu sipie tix ngaix hoik tix ngaix, ang maix koe rhawm tix sang krai aux mhong lie?” mai Amanon deeh ah nin ka nawh, “Aux kied moh ka Tama, nan puxke aux Apsalom.”
5 Yawnadat deeh ah nin ka nawh, “Maix it piang ku it tix mai yuh tix awm pui saux, yam hoek keeing maix ti jhak maix, ” maix ah nin ka nawh, “Kieh nan aux Tama hoek tawx aux ih priex mai kieh nawh mawh cao khre rien pa ih, ka plak sivoe ngai aux dee pon aux tix yaox ka mai sonsang yaox aux tix ih pa khre nawh”
6 Khaix an Amanon it mai yuh ti awm grang pui saux, yam hoek simiang ti jhak ka nawh, Amanon ah nin ka simiang, “Yuh bwanson kieh nan aux Tama hoek ti priex rien aux mai yuh blah khlawp ra khlawp son aux, ka plak sivoe ngai aux, sonsang pon aux ti ih khaing daux taix nawh.”
7 Mai Davit ploi pui hu kok ka Tama ah nin, “Yam in hu ka nyiex puxke maix Amanon mai khre rien pa ih son nawh.”
8 Mawh kheu nan, Tama hu ka nyiex puxke tix Amanon mai yaox kawn it nawh, khaix an Tama teei phawng gaox nghox ca mai ku klao tau mai yuh khlawp blah ka plak sivoe ngai Amanon mai ping sin ka ngu.
9 Tama teei pan mai sau ti deuh blah ka plak sivoe Amanon, viang mawh nan nawh ang cu ti ih blah an, Amanon ah nin, “Kieh pui ku kaux lih khaing dee ot aux?” mai pui lih khawmuik.
10 Khaix an Amanon ah nin ka Tama “Viex pa ih pa yuh maix laig daux lawg plak daux, sonsang pon aux ti ih khaing daux taix maix, ” mai Tama teei khlawp blah pa hoik yuh tix mai viex laig daux lawg it puxke tix Amanon.
11 Yam viex Tama ti sang tawx nawh ih, Amanon bluh taix nan tix ah nin ka nawh, “Nan aux eue, hoek ti it tau mai aux.”
12 Mai Tama ah nin ka nawh, “Puxke aux eue, paw doh yuh pa khin ka aux liak, mawh kheu ang koe been ti yuh ceu in ka daux pui Isarelax, paw doh yuh ceu pa caox caig in liak.”
13 “Aux sang pon deuh krax pa kaig tix dee mawx? maix tak awm pui kwa ka daux pui Isarelax, mawh kheu nan, krai grawng in ka simiang, simiang tak ang teei aux hu khaing maix.”
14 Viang yuh ka mawx kawx nawh ang nghiet, mawh kheu hoik ting riang Amanon khaing nan tix, nawh hoik yuh pa khin ka Tama mai hoik pon ti it tau mai nawh.
15 Amanon deeh koeng ka nan tix, pa koeng nawh ka Tama hoik nie lheu khaing pa moh nawh glang ka an mai Amanon ah nin ka nawh, “Lih hu heue.”
16 Mai nan nawh deeh ah nin ka nawh, “Aux ang hu, pa grheu maix aux lih hu in, mawh pa nie lheu caox khaing grawng pa hoik yuh maix ka aux nox,” viang mawh nan, Amanon ang nghiet.
17 Khaix an nawh kok kawncau tix ah nin, “Grheu bun in hu singai khaing tin mai deeh song jhong siviex khaix nawh.”
18 Tama ceep sibex pa koe pakpeung kuceu piang tokaux tix, awm pa ceep kawn bun simiang yam an, kawncau nawh hoik grheu nawh lih hu plak praix mai song jhong siviex ka nawh.
19 Tama sau nyaox piang kaing tix mai riah kraung ceep pa koe grang kuceu khaing piang tokaux tix mai deuh taix tix piang kaing tix, nawh ing mai yiiem yo tix.
20 Puxke nawh Apsalom ah nin ka nawh, “Mawh yuh puxke aux Amanon pa ang mawh ang meh ka maix lie? pux aux eue, ot yawg tix, kheu mawh nawh puxke maix, paw lai keud grawng in ka daux rhawm tix, ” mawh kheu nan, Tama ot yiien yawg daux nyiex puxke nawh Apsalom tan.
21 Yam mhong simiang Davit ka grawng an, nawh kied song rhawm kah.
22 Mai Apsalom ang lai sikah lox mhawm lox caox ka puxke tix Amanon tix gum kawx, mawh kheu Apsalom kied koeng ka Amanon kheu hoik lud nawh mai nan tix Tama heue.
Grawng Pah Apsalom Ka Amanon
23 Yam hoik naog ra num, Apsalom yuh krax khan kheu pawie rhip hauk yung ka daux yaong Balax Hazaw, pa koe hawt dex veng Epharem tan mai nawh ghaok cub kawn simex simiang hoek ti ih pawie tau mai tix tan khawmuik.
24 Apsalom hoek ka simiang Davit ah nin, “Yam in aux yuh krax khan kheu pawie rhip hauk yung, yuh bwanson kieh simiang mai kawncau maix hoek ti ih pawie tau mai aux pa mawh kawncau maix.”
25 Mai simiang deeh ah nin ka Apsalom, “Kawn simex aux eue, ang mawh, paw kieh ex hu khawmuik, ex lhat mawh beeh glawm cien ka son maix, ” simiang ang cu ti hu mai nawh nawb bwan piang nawh.
26 Apsalom deeh ah nin, “Phan ang mawh nan, yuh bwanson, kieh puxke aux Amanon hu tau mai yix mai simiang deeh ah nin ka nawh, ” “Kheu jao grawng pa yuh ka mawx aux lai sang kieh nawh hu mai maix.”
27 Mawh kheu Apsalom ca khyox khaw ka nawh, Davit kieh Amanon mai cub kawn simex ti hu tau mai nawh khawmuik.
28 Apsalom tawm lox ka kawncau tix ah nin, “Yam in pau ti jhak yam yoek Amanon ka rawm plix siiet, yam ah aux nin ka pex mug Amanon yum, khaix an pex mug nawh yum, paw lhat kah, hoik mawh aux pa tawx lox ka pex, “Teei riang pex mai kieh koe rhawm kwa.”
29 Mai kawncau Apsalom khankix hoik yuh ceu an ka Amanon, awm pa hoik tawm Apsalom ka kix, cub kawn simex simiang hoik prung prang mai tang yaog ti brug law cie tix to ing ku kaux.
30 Yam kawn ot kix daux krax, pui tix kaux hoek krai grawng an ka Davit “Apsalom hoik pah cub kawn simex simiang yum, ang lai deuk tix kaux kawx.”
31 Simiang riah ka kraung ceep tix mai it piang tiex mai kawncau nawh khankix kawx yuh awm an mai ot vung viang nawh.
32 Mai Yawnadat kawn simex Shimi, puxke Davit ah nin, “Paw kieh simiang aux yum rhawm ka lox krai kix, hoik pah kix ka kawn simex simiang khankix! mawh ngie Amanon pa yum khaing, grawng in hoik mawh pa bak Apsalom daux rhawm tix, jah tom singaix lud Amanon ka nan nawh Tama.”
33 “Paw kieh cao simiang aux keud mai laux rhawm ka yum cub kawn simex tix, mawh ngie Amanon pa yum.”
Apsalom Pa to Ka Veng Geshurax
34 Khaix an Apsalom kawx to mai pui awn ju cao pa pau veng yaog ti jhak mai yaox hoek pui hawt caong gawng plak khaix tix tom nie.
35 Yawnadat deeh ah nin ka simiang, “Jhak heue, kawn simex simiang khankix hoik deeh hoek awm pa hoik krai kawncau ka simiang.”
36 Khaix hoik krai nawh ceu an, dom mawx dom an kawn simex simiang khankix bleeh mai kix yiiem, simiang mai kawncau nawh kawx yiiem tau ku kaux.
37 Apsalom to ka Talamie kawn simex Amihut pa mawh simiang meung Geshurax, Ref 13:37 2Sa 3:3. Davit kied khrup rhawm son kawn simex tix ku singaix.
38 Apsalom to ka veng Geshurax mai ot tan loe num.
39 Simiang Davit hoik piawm ka grawng yum Amanon mai deeh byaong doe ka Apsalom heue.