12
Lox Phektiem Natan Ka Davit
1 Khaix an Simiang Siyiex ploi cao jhai Natan hu ah nin ka Davit, Ref 12:1 Yaog 51 Title. “Ka daux veng tix veng koe pui ra kaux, tix kaux mawh pui magmi mai an tix kaux mawh pui hot shia.
2 Pui mi an koe cub yung cub mawie tom nie.
3 Viang mawh nan, pui hot shia an, lheu khaing kawn yung shiang iak pa hoik liag nawh ti eei nawh ang koe sinngao tix ceu kawx mai kawn yung shiang iak an, haok hwan ting tau mai kawn praix nawh, hoik ih priex cao tix, hoik nyaux rawm khaing daux kawk cao tix mai hoik it piang naok nawh awm kawn bun nawh.
4 Yam hoek nyo nyiex ka cao mi an, nawh hoik lhawk ti teei khaing daux cub mawie cub yung cao tix sonsang khre pa ih ka son nyo nyiex pa hoek ti paung ka nawh, viang mawh nan, nawh hu teei kawn yung shiang iak pui hot shia an mai khre ka son nyo nyiex pa hoek ka nawh.”
5 Davit kied song rhawm ka cao mi an ah nin ka Natan “Awm im ju Simiang Siyiex pui pa yuh ceu in keung ti yum tete.”
6 Kieh nawh deeh plud pon son tix son piang son kawn yung shiang iak an, kheu hoik yuh nawh ceu in mai ang tix koe krax caux rhawm.”
7 Khaix an Natan ah nin ka Davit, “Maix mawh pui an heue, “Simiang Siyiex pui Isarelax ah yuh nin, Aux hoik groi bee mai hoik yaog maix mawh simiang piang pui Isarelax mai Aux hoik taoh maix khaing daux tawm taix Sawlux.”
8 “Aux hoik tawx sin nyiex ma cao simiang maix mai moeng cao simiang maix piang naok maix mai Aux hoik tawx doeh nyiex ma pui Isarelax mai pui Yudax ka maix, phan ceu ankix ang nyang kub ka son maix, Aux tak baox tawx tang ceu tom nie ka maix.”
9 “Maix lai yuh krax pa ang khaw ang jiet ka gumlox pingnyap Simiang Siyiex mai yuh pa caox caig ka plak sivoe ngai Nawh Cao yuh ka mawx? Maix hoik pah Uriyax, pui Heta ka vaig maix hoik teei moeng nawh mawh moeng tix maix hoik pah nawh yum ka lawm vaig pui Amon.”
10 “Mawh kheu maix hoik yuh ceu pa ang khaw ang jiet ka Aux mai hoik teei moeng Uriyax pui Heta mawh moeng tix, doeh nyiex ma maix tak ang luan khaing lawm vaig tix bawg kawx.”
11 Simiang Siyiex ah nin, “Jhak heue, Aux tak kieh pa khi rhawm hoek piang maix, khaing daux doeh paox nyiex cao maix mai Aux tak teei moeng maix ka plak sivoe ngai maix mai tawx ka paox plawg maix mai kix tak it tau mai moeng maix, plak sivoe maix yam kawn riang praix.”
12 “Viang maix hoik yuh ceu in ka daux pa glip, Aux tak yuh ceu in ka plak sivoe ngai pui Isarelax ka daux pa sidawng yam riang praix.”Ref 12:11-12 2Sa 16:22.
13 Khaix an Davit ah nin ka Natan “Aux hoik lud ka Simiang Siyiex, ” mai Natan deeh ah nin ka Davit, “Simiang Siyiex hoik teei phimap maix, maix tak ang yum ka grawng in.”
14 “Viang yuh ka mawx kawx, kheu hoik tawx maix akhwang pa sang koe lox sibriem ceu pa koeng Simiang Siyiex kah, mawh kheu nan, kawn pa keh son maix yam in tak yum.”
15 Khaix an Natan deeh ing ka nyiex cao tix mai Simiang Siyiex tawx krax kham geu ka kawn simex Davit, pa hoik keh khaing moeng Uriyax mai kieh nawh kied nie saux tete heue.
Grawng Yum Kawn Simex Davit
16 Davit deeh khyox khaw ka Siyiex, son kawn tix, Davit twah pa ih mai laig it daux lawg piang tiex leeing sawm.
17 Cub kuad pa ot ka daux nyiex haw khankix hu yaog nawh kaoh khaing piang tiex, viang mawh nan, nawh ang cu ti kaoh mai ang cu ti ih priex tau mai kix.
18 Yam hoik naog aliah ngaix kawn nyawm an yum mai kawncau nawh khankix lhat graung mai ang krai ka hoik yum kawn nyawm an ka nawh mai kix ah nin, “Yam kawn im kawn nyawm an, ex hoik krai mai nawh ang tie nghiet lox krai ex, ex sang pon krai grawng yum kawn nyawm an ka nawh yuh ka mawx? Nawh tak yuh krax pa kha rhawm ka cao tix, tix ceuceu.”
19 Yam yaox Davit ka suk shiep kawncau tix, nawh tawng ka hoik yum kawn nyawm, mawh kheu nan, nawh chawk kawncau tix, “Mawh hoik yum kawn nyawm an lie? Mai kix deeh ah nin, “Nawh hoik yum.”
20 Khaix an Davit yaog ti kaoh khaing piang tiex mai heem tix mai kraix bee mai loh kraung tix laig ka daux nyiex bwan mai krub ka Simiang Siyiex, khaix an nawh deeh ing ka nyiex cao tix, yam mhaing nawh pa ih, kix khan priex ka plak sivoe nawh mai nawh ih ka.
21 Kawncau nawh ah nin ka nawh, “Jao patix maix yuh nin maix hoik twah priex mai hoik yiiem son kawn nyawm yam kawn im nawh, viang mawh nan, khaix hoik yum kawn nyawm an maix deeh yaog ti kaoh ih priex.”
22 Nawh deeh ah nin, “Yam kawn im kawn nyawm in, aux twah priex mai yiiem ah nin, mawh pui mawx pa sang pon krai grawng sang koe krax pa caux rhawm Simiang Siyiex piang aux, sonsang deeh pon kawn nyawm an tix im?”
23 “Viang mawh nan, yam in nawh hoik yum, aux lai kawn sang twah priex yuh ka mawx? mawh sang deeh pon baox kieh aux nawh im? aux tak hu ka nawh, viang mawh nan, nawh tak ang lai deeh hoek ka aux.”
Grawng Keh Sawlamon
24 Khaix an Davit kieh moeng tix Batashebax koe krax pa nyawm rhawm mai nawh laig it tau mai nawh, nawh keh kawn simex tix kaux mai kok ceu kaux nawh mawh Sawlamon mai Simiang Siyiex moh ka Sawlamon.
25 Yam an Nawh Cao deeh ploi cao jhai Natan hu mai kieh sum ceu kaux mawh Yedidi, awm gumlox pa tawm Simiang Siyiex ka nawh, dee bleeh gumlox Yedidi an, mawh krax pa moh Simiang Siyiex heue.
Davit Rhim Ka Veng Rabax
(1Been 20:1-3)
26 Yuabax hu puing ka veng Rabax, veng pui Amon mai dex sang pex ka veng an.
27 Yuabax ploi pui cau ing ah nin ka Davit, “Aux puing veng Rabax mai hoik pon rhim rawm dung nyaux veng ting an.”
28 Mawh kheu nan, “Yam in khrawm can pui pa kawn deuk tau mai maix hu yuh tab hawt veng mai puing ti teei kah, phan ang mawh nan, aux rhim veng an mai tak kok ceu kaux veng an mawh kaux aux.”
29 Davit deeh khrawm pui khawmuik hu ka veng Rabax, nawh puing mai pon rhim ka veng an.
30 Nawh peeik mhok khri simiang veng an khaing kaing nawh, mhok khri an ciien tix talantan mai siang pa laoh lie kawx koe ka mhok khri an mai kix ceep mhok khri an piang kaing Davit, nawh baox teei kraung pa rhim khaing daux veng an hoek tom nie.
31 Nawh viex pui pa ot ka daux veng an khankix hu mai kieh kix yuh kaing leu khaox, kaing yuh kraung rhiem, kaing moe mai khinkix lai loh ti yuh kaing gleeing lon tiex, mawh kheu nan, nawh hoik kieh pui Amon pa ot ka daux veng daux yaong yuh awm in, khaix an Davit mai pui nawh khankix deeh ing ka veng Yerusaliem heue.