1 Khaix hoik luan bawg yam raux praix daux num an mai hoek bawg yam yuh simiang naing, Davit ploi Yuabax mai kawncau tix mai pui Isarelax hu daux naing mai kix pex ka pui Amon mai lai lawm ka veng Rabax, viang mawh nan, Davit kawn ot khaix kix daux veng Yerusaliem.Ref 11:1 1Been 20:1. 2 Daux tix ngaix plakbo Davit kaoh khaing it tix mai lailing piang braux nyiex haw tan, nawh yaox ka heem bun tix, bun an kied mhawm grang. 3 Mawh kheu nan, Davit ploi pui hu chawk grawng bun an mai pui an deeh hoek ah nin, “In mawh Batashebax kawn bun Eliam mai mawh moeng Uriyax pui Heta.” 4 Davit ploi pui cau tix hu kok bun an hoek, yam bleeh bun an Davit it tau mai nawh, khaix an bun an deeh yuh tokaux tix singax khaing pa seeing brai tix mai deeh ing ka nyiex tix. 5 Mai bun an hoik koe kaux, mawh kheu nan, nawh ploi pui hu krai Davit mhong ah nin, “Aux hoik koe kaux.” 6 Davit deeh ploi Yuabax ah nin ka nawh, “Ploi Uriyax pui Heta hoek ka aux, ” mai Yuabax ploi Uriyax hu ka Davit. 7 Yam hoek Uriyax, Davit chawk grawng nyawm ot Yuabax mai grawng krax ot krax koe pui khankix mai grawng pa hoik pex nawh khankix. 8 Davit ah nin ka Uriyax, “Deeh ing ka nyiex cao maix mai khoek caong tix, ” mawh kheu nan, Uriyax lih khaing daux nyiex simiang mai simiang hoik kieh kix hawt ti tawx totaix pa ih khaix nawh. 9 Viang mawh nan, Uriyax ang ing ka nyiex cao tix mai nawh it hawt diang siviex nyiex haw simiang tau mai kawncau simiang khankix. 10 Yam krai kix grawng ang Uriyax ing ka nyiex ka Davit, Davit ah nin ka Uriyax, “Mawh ang maix mawh pa kaoh khaing hu tix krax lie? yuh ka mawx maix lai ang hu ka nyiex cao tix.” 11 Mai Uriyax ah nin ka Davit, “Teug bwan sijax mukheu mai pui Isarelax mai pui Yudax kawn ot daux nyiex gox mai cao simiang aux Yuabax mai kawncau nawh, kawn pan daux ngawd daux lung, mawh sang khaw aux ti hu ka nyiex cao tix, sonsang ih nyaux mai it tau mai moeng tix lie? awm kawn im ju maix aux ang pon yuh ceu in.” 12 Khaix an Davit ah nin ka Uriyax, “Baox ot tin daux in singaix pasax, aux tak kieh maix hu, ” mawh kheu nan, Uriyax ot ka daux veng Yerusaliem singaix an tom hoek pasax. 13 Davit kok nawh ih nyaux tau plak sivoe tix mai nawh hoik kied nie nyaux tom yoek tix, hoek plak bo nawh deeh hu piang ku it tix tau mai kawncau cao simiang nawh mai nawh ang ing ka nyiex cao tix. 14 Yam hoek plak ponngawb, Davit tiiem lai ka Yuabax mai tawx Uriyax viex hu. 15 Nawh tiem ah nin daux lai, “Tawx Uriyax hu sivoe dee kin naing mai deeh dak ti ing khaing nawh, sonsang laig daux tawm taix pui koeng mai yaox ti yum kah.” 16 Yam hoik lih hu Yuabax ti lai lawm ka veng, nawh ap beeh glawm ka Uriyax, ka dee hoik tawng nawh koe cub pa koe rhawm vao rhawm kwa. 17 Pui daux veng an lih hoek ti puing ka cub Yuabax mai kawncau Davit yum tan tiblah mai Uriyax pui Heta kawx yum tan. 18 Yuabax ploi pui deeh ing krai Davit mhong grawng pa dex mai naing khankix, 19 Mai nawh tawm lox ka cao cau an ah nin, “Yam hoik krai maix grawng naing khankix ka simiang, 20 phan simiang meet rhawm, nawh tak ah nin ka maix, yuh ka mawx pex lai greed ti hu dex veng mai puing naing, ang pex tawng ka sang deeh puing kix pex khaing piang guh veng lie? 21 Mawh pui mawx pa pon pah Abimaliet kawn simex Yerubeshiet? Ang hoik mawh bun veng TebietRef 11:21 Cao 9:53. tix kaux pa dheem kaing nawh ka simaox mhaw tix plak khaing piang guh veng, tom yum nawh ang mawh lie? yuh ka mawx pex greed tix dex guh veng?, khaix an maix tak ah nin, kawncau maix Uriyax pui Heta hoik yum” 22 Mawh kheu nan, pui cau an lih hu khaing tan mai hoek krai can pa hoik tawm Yuabax ka Davit. 23 Pui cau an ah nin ka Davit, “Pui koeng hoik pex ka yix mai kix hoik pheet yix tom hoek ka daux lung, yix kawx deeh pheet kix deeh khaix tom hoek diang siviex veng. 24 Cao pa puing ak pa ot piang guh veng puing ka kawncau maix mai kawncau simiang tiblah hoik yum, Uriyax pui Heta kawncau simiang kawx hoik yum. 25 Davit ah nin ka pui cau an, “Maix ah nin ka Yuabax, paw koe krax laux rhawm ka grawng in, mawh kheu lawm vaig hoik lai loh ti yuh pui laux leeing tix kaux lai tix kaux, deeh teei riang rao ti puing mai yuh tom laux leeing veng an, mawh kheu nan tawx riang rao ka nawh.” 26 Yam hoik mhong moeng Uriyax ka hoik yum mex tix, nawh yiiem doe ka son mex tix. 27 Yam hoik luan krax pa yiiem doe nawh, Davit ploi pui hu teei nawh hoek ka nyiex haw tix mai nawh mawh moeng Davit mai nawh keh kawn simex tix kaux, viang mawh nan, pa yuh Davit mawh pa ang Simiang Siyiex khaw rhawm kah.