1 Kix krai ka Davit, “Jhak heue, pui Philitix puing ka veng Kilax mai rhim nghox ka daux glah.” 2 Mai Davit chawk Simiang Siyiex, “Mawh khaw aux ti hu puing ka pui Philitix in lie?” Mai Simiang Siyiex ah nin ka Davit, “Hu mai puing ka pui Philitix mai taoh veng Kilax.” 3 Pui Davit khankix ah nin ka nawh, “Jhak heue, yam ot ex ka haktiex Yudax. ex kawn koe krax lhat graung miex ding lie?” 4 Mai Davit baox chawk cheng ka Simiang Siyiex. Simiang Siyiex pawk ka nawh ah nin, “Kaoh lih hu ka Kilax, mawh kheu Aux tak ap pui Philitix ka daux taix maix.” 5 Davit mai pui nawh khankix hu ka Kilax, puing pui Philitix khankix mai viex tobrie kix hu mai pah ka kix tom nie. Mawh kheu nan, Davit tom taoh pui ot ka veng Kilax khankix. 6 Yam to Abiata kawn simex Ahimaliet ti hoek ka Davit ka Kilax, nawh viex sibex dhah tix pheen hoek mai tix. 7 Pui krai hoik hu Davit ka veng Kilax ka Sawlux. Mai Sawlux ah nin, “Siyiex hoik ap nawh ka daux taix aux, mawh kheu nawh hoik laig ot ka daux veng pa hoik nyeep jhong siviex, awm pa hoik laung cao tix.” 8 Sawlux khrawm pui khankix sonsang yuh naing mai lih hu ka veng Kilax sonsang lai lawm Davit mai pui nawh khankix. 9 Davit tawng keud Sawlux ti yuh pa caox piang tix, nawh ah nin ka Abiata cao giex kaing li, “Viex sibex dhah an hoek tin.” 10 Davit ah nin, “Simiang Siyiex pui Isarelax eue, kawncau Maix Cao hoik mhong kriem sawg Sawlux daux krax sang hoek ka veng Kilax mai yuh laux leeing ka veng kheu jao aux. 11 Mawh sang ap pui veng Kilax aux ka daux taix nawh lie? Mawh sang lih hoek Sawlux, awm pa hoik mhong kawncau Maix Cao lie? Simiang Siyiex pui Isarelax eue, aux rawg bwan ka Maix Cao, krai ka kawncau Maix liak.” Mai Simiang Siyiex ah nin, “Nawh tak lih hoek.” 12 Davit ah nin, “Mawh sang ap pui veng Kilax aux mai pui aux khankix ka daux taix Sawlux lie?” mai Simiang Siyiex ah nin, “Kix tak ap maix.” 13 Davit mai pui nawh been liah yieh kaux, lih hu khaing veng Kilax, kix lih hu ka dee pon hu tix. Yam mhong Sawlux krai pui hoik to Davit khaing Kilax mai nawh ang lai hu tan. 14 Mai Davit ot ka daux tiag nong piang gawng daux tiag Zipha. Sawlux sawg nawh ku singaix, viang mawh nan, Simiang Siyiex ang nyang ap Davit ka daux taix Sawlux. 15 Davit yaox hoek sawg Sawlux ka ju tix mai nawh ot ka daux tiag Zipha haktiex Horiet. 16 Yawnasan kawn simex Sawlux kaoh hu ka Davit ka haktiex Horiet mai tawx riang sonsang koe riang nawh ka daux Siyiex. 17 Mai nawh ah nin ka Davit, “Paw lhat, mawh kheu taix keeing aux Sawlux tak ang hoek piang maix, maix tak mawh simiang piang pui Isarelax mai aux tak mawh cao kaing ting greem maix, viang keeing aux Sawlux tawng ka grawng in kawx.” 18 Mai kiex khawm ra yuh sijax mukheu ka plak sivoe Simiang Siyiex, Ref 23:18 1Sa 18:3. Davit ot ka haktiex Horiet mai Yawnasan deeh ing ka nyiex tix. 19 Pui Zipha haok hu sawg Sawlux ka Gibat ah nin, “Ang Davit mox tix mai yix, Ref 23:19 Yaog 54 Title. piang gawng Hakhilax, pa koe ka plak seh veng Yeshimon lie?” 20 Simiang eue, lih hoek awm pa koe rhawm maix ti sang hoek, mai yix tak ap nawh ka daux taix simiang.” 21 Mai Sawlux ah nin, “Kieh Siyiex nawb bwan piang pex, mawh kheu caux rhawm pex ka aux.” 22 Hu sawg ti yaox tom kriem, mai jhak ti yaox ot nawh dee mawx, mawh pui mawx pa yaox nawh tan, mawh kheu pui krai aux mhong nawh kied lhak tete.” 23 “Mawh kheu nan, jawm ti jhak ka dee ot dee mox nawh tix mai deeh hoek krai aux mhong kriem kriem. Mai aux tak hu mai pex phan nawh ot ka daux haktiex an, aux tak sawg nawh khaing sinax pui Yudax kaing rheng kaing mheen.” 24 Kix kaoh mai dha ti hu sivoe Sawlux, ka Zipha. Davit mai pui nawh khankix ot ka daux tiag Mawnax, ka daux Arabax plak seh veng Yeshimon. 25 Sawlux mai pui nawh khankix sawg ka Davit mai pui hoek krai an ka Davit mai nawh lih hu ka daux rang pa koe daux tiag Mawnax. Yam mhong Sawlux ka an, nawh hawt pheet khaix Davit ka daux tiag Mawnax. 26 Sawlux hu ka gawng plak in mai Davit khawm pui nawh khankix hu ka gawng plak an, mawh kheu nan Davit nied ti hu singai khaing Sawlux mai Sawlux khawm pui nawh khankix lai lawm ka Davit mai pui nawh sonsang giex ka kix. 27 Yam hoek pui cau tix kaux ka Sawlux ah nin, “Nied hoek phai, mawh kheu pui Philitix hoek laig ti puing ka haktiex.” 28 Sawlux deeh hoek khaing pheet tix khaix Davit mai hu puing ka pui Philitix, mawh kheu nan kix tom kok dee an mawh Selax Hamalekok. 29 Mai Davit lih khaing tan mai ot ka dee kaux cong ka Engedi heue.