22
1 Davit lih hu khaing tan mai to ti luad luan mai hoek daux rang Adulam, Ref 22:1 Yaog 57 Title; Yaog 142 Title. yam mhong puxke nawh mai paox nyiex keeing nawh khankix ka an, kix lih hu ka nawh.
2 Pui pa koe krax kha rhawm, pui pa koe ceuk mai pui pa ang fah rhawm khankix, khrawm paox tix hoek ka nawh, nawh lih ti mawh cao kaing kix. Pui pa ot mai nawh tan, koe pui pon yieh.
3 Davit lih khaing tan mai hu ka Mizapa haktiex Mawbax, nawh ah nin ka simiang Mawbax, “Yuh bwanson kieh miex keeing aux ot tin mai maix, tom hoek bawg yam tawng aux ka pa yuh Simiang Siyiex ka aux.”
4 Nawh viex kix hoek mai prah kix ot mai simiang Mawbax, kiex ot tau mai nawh glang bawg yam kawn kaux cong ot Davit ka daux rang.
5 Mai cao jhai Gat ah nin ka Davit, “Paw lai ot ka daux rang dee pa kaux cong, lih hu mai hu ka haktiex Yudax.” Mai Davit lih hu mai hu ot ka daux tiag Hariet.
Sawlux Pah Cao Giex Kaing Li
6 Mai Sawlux hoik mhong yaox kix ka Davit, khawm pui pa ot mai nawh khankix, yam an Sawlux ot piang gawng Gebat, greem khaox, ka veng Ramax tau mai pliah pa koe daux taix nawh mai kawncau nawh khankix cung hawt vung viang nawh,
7 mai Sawlux ah nin ka kawncau tix khankix, pa cung hawt nawh, “Pui Binyamin khankix nghiet heue, mawh sang tawx kawn simex Yessie kaung mai sipeem plix siiet ka pex mai yaog pex mawh cao kaing naing pui kaing rheng mai pui kaing yieh lie?”
8 “Pex khawmuik hoik khrawm tix tieh feen yuh pa caox ka aux mai ang krai aux mhong tidtix, yam yuh kawn simex aux sijax mukheu mai kawn simex Yessie, ang koe pui laux rhawm mai aux mai ang krai aux mhong grawng pa so kawn simex aux ka kawncau khankix tieh feen mai jawm ka aux daux in singaix.”
9 Khaix an Dawga pui Edom cao kaing kawncau Sawlux khankix, pawk ah nin, “Aux yaox kawn simex Yessie hoek ka veng Nawbax dee ot Ahimaliet kawn simex Ahitut.”
10 “Ahimaliet chawk Simiang Siyiex ka son nawh mai tawx pa ih mai vaig Gawliax pui Philitix ka nawh.”Ref 22:9-10 Yaog 52 Title.
11 Mai simiang hu kok ka cao giex kaing li Ahimaliet kawn simex Ahitut mai pao nyiex keeing nawh tau mai cao giex kaing li pa ot ka veng Nawbax, mai kix hoek ka simiang khawmuik.
12 Mai Sawlux ah nin, “Kawn simex Ahitut eue, nghiet heue, ” nawh deeh ah nin, “Simiang aux eue, aux ot tin.”
13 Mai Sawlux ah ka nawh, “Kheu pex mai kawn simex Yessie hoik khrawm ti yuh pa caox mai tieh feen ka aux mai maix lai tawx blah mai vaig ka nawh mai chawk cheng Siyiex ka son nawh, sonsang yaog ti tieh feen mai jawm ka aux, ka daux singaix lie?”
14 Ahimaliet pawk ah nin ka simiang, “Mawh pui mawx ka daux kawncau maix khankix pa kaux sijax awm Davit, pa mawh kheue simiang cao giex kaing li mai pa koe min plakngai ka daux nyiex maix lie?
15 In singaix mawh hoik chawk aux Siyiex ka son nawh lie? ang mawh pa kieh simiang deuh phimap ka kawncau tix mai paox nyiex keeing aux khankix, mawh kheu kawncau maix ang tawng ceu in mawh pa iak pa ting ang ah.”
16 Simiang ah nin, “Ahimaliet eue maix khawm paox nyiex keeing maix tak yum tete.”
17 Mai simiang ah nin ka cao pau pa cung tix pau vung viang nawh khankix, “Veeh tix mai pah cao giex kaing li Simiang Siyiex khankix, mawh kheu ot taix kix ka plak Davit mai tawng ka to nawh mai ang krai an ka aux.” “Viang mawh nan, kawncau simiang khankix ang pon kieh taix tix hoek piang cao giex kaing li Simiang Siyiex sonsang pah ka kix.”
18 Mai simiang ah nin ka Dawga, “Veeh ti pah ka cao giex kaing li khankix, ” mai Dawga veeh ti pah cao giex kaing li khankix mai pah pui ceep sibex dhah tixdaix phwan kaux daux singaix an.
19 Nawh pah pui veng Nawbax, veng ot cao giex kaing li khankix, khawm simex bun mai kawn nyawm, kawn ngie mai mawie, la, yung khankix ka vaig.
20 Viang mawh nan, kawn simex Ahimaliet, kawn simex Ahitut pa kaux Abiata pon ti klawd mai to ti hawt Davit.
21 Mai Abiata krai Davit mhong ka pah Sawlux cao giex kaing li Siyiex khankix.
22 Mai Davit ah nin ka Abiata, “Daux singaix an yam ot Dawga pui Edom tan, aux hoik tawng nawh tee krai ka Sawlux tete. Hoik mawh aux pa kieh nyiex ma keeing maix hoek krax yum.
23 Ot tau mai aux, paw lhat graung, pui pa sawg ka ju aux tak mawh pa sawg ka ju maix, maix ot mai aux tak yaox tix luad luan heue.”