24
Davit Ploi Sawlux Luad Luan
1 Yam deeh hoek Sawlux khaing hawt tix khaix pui Philitix mai koe pui krai ka nawh ah nin, “Jhak heue, Davit ot ka daux tiag Engedi.”
2 Khaix an Sawlux teei pui loe rheng kaux pa hoik laug khaing pui Isarelax mai hu sawg Davit khawm pui nawh ka daux tiag dee ot pex rang khankix.”
3 Mai Sawlux hoek ka kawg yung dex krax mai daux rang koe tix mu tan, mai Sawlux laig ka daux sonsang klawd tix. Davit mai pui nawh khankix ot ka dee raux daux rang.Ref 24:3 Yaog 57 Title; Yaog 142 Title.
4 Pui Davit khankix ah nin ka nawh, “In singaix mawh singaix ah Simiang Siyiex nin ka maix, jhak heue, aux tak ap pui koeng maix khankix ka daux taix maix, maix tak yuh can pa simie maix ti yuh ka nawh, awm pa khaw maix ti yuh.” Davit kaoh mai briex pat toh sibex dhah Sawlux.
5 Khaix an Davit kied laux rhawm ka tix kheu jao pat nawh toh sibex dhah Sawlux.
6 Nawh ah nin ka pui tix khankix, “Kieh Simiang Siyiex tiebtie can pa sang yuh aux ka simiang tix, pa hoik groi Simiang Siyiex bee ka nawh, sonsang nyeu aux taix tix mai yuh nawh laux, jhak heue, kheu mawh nawh pui pa hoik groi Simiang Siyiex bee kah.”
7 Davit tieb kawncau tix ka lox an mai ang tawx akhwang yuh laux ka Sawlux. Mai nawh kaoh khaing daux rang mai lih hu krax hu tix.
8 Khaix an Davit kaoh, mai lih hu khaing daux rang kok yo Sawlux ah nin, “Simiang aux eue, ” yam gi Sawlux ka plak khaix tix, Davit gup pakngai tix piang tiex mai krub ka nawh.
9 Davit deeh ah nin ka Sawlux, “Maix ca kawn nghiet ka lox krai pui khankix pa ah nin, jhak heue, Davit sawg ti yuh maix laux leeing, kheu grawng pa yuh ka mawx?”
10 Ka daux in singaix, ngai maix hoik yaox ka ap Simiang Siyiex maix ka daux taix aux ka daux rang in, pui tiblah tawx riang aux, sonsang pah aux maix, viang mawh nan, aux caux rhawm ka maix mai aux ah nin, aux tak ang nyeu taix tix piang cao simiang aux, mawh kheu nawh mawh pui pa hoik groi Simiang Siyiex bee piang.
11 Keeing aux eue, jhak ka toh sibex dhah maix pa koe daux taix aux in, mawh kheu aux pat ti teei ngie toh sibex maix mai ang pah maix, deuh ti tawng ka ang pa caox caig mai pa tieh feen koe ka daux taix aux, aux ang koe phimap krax lud piang maix, viang mawh nan maix ca kawn sawg ti teei ju aux yum.”
12 Kieh Siyiex prawng ca sinax maix mai aux, kieh Simiang Siyiex pawk bix aux piang maix, viang mawh nan, aux tak ang kieh taix tix hoek piang maix.
13 Awm koe lox kab pui didix ah nin. Ceu pa caox mawh pa kaoh khaing daux pui pa caox caig, viang mawh nan, aux tak ang kieh taix tix hoek piang maix.
14 Mawh lih hoek simiang pui Isarelax ti hawt khaix pui mawx? Mawh hawt pheet ka pui mawx? Mawh sawg maix sox yum lie? Mawh sawg maix ka diiep lie?
15 “Kieh Siyiex mawh cao prawng see mai prawng ka sinax aux mai maix, mai jhak teem ka see aux mai taoh aux khaing daux taix maix.”
16 Yam hoik krai Davit lox khankix ka Sawlux mai Sawlux pawk ah nin, “Kawn simex aux Davit eue, in mawh lox maix lie? mai Sawlux yo lox tix mai yiiem.”
17 Nawh ah nin ka Davit, “Maix mawh pa nie rahsee khaing aux, mawh kheu maix hoik yuh pa mhawm ka aux, yam yuh aux pa caox ka maix.
18 Maix hoik jhi pa mhawm yuh tix ka aux in singaix mai ang lai pah ka aux yam ap Simiang Siyiex aux ka daux taix maix.
19 Phan pui tix kaux kaux yaox ka pui koeng tix, mawh sang kieh nawh pui an luad luan lie? kieh Simiang Siyiex yuh bwanson pa mhawm ka maix, kheu pa hoik yuh maix ka aux in singaix.”
20 Yam in jhak heue, aux hoik tawng sang mawh maix simiang tete mai meung haktiex Isarelax tak kaux cong ka daux taix maix.
21 Mawh kheu nan, tiextu ka aux ka daux ceu kaux Simiang Siyiex, son ang maix tat doeh ru aux khankix khaix aux mai ang yuh min ceu kaux aux laux leeing khaing daux nyiex ma keeing aux khankix.”
22 Mai Davit hoik tiextu ka Sawlux, khaix an Sawlux deeh ing ka nyiex tix, Davit mai pui nawh khankix kawx lih hu ka dee pa kaux cong heue.