21
Davit To Khaing Sawlux
1 Davit hu ka cao giex kaing li AhimalietRef 21:1-6 Mat 12:3-4; Mak 2:25-26; Luk 6:3. ka veng Nawbax, mai Ahimaliet hoek pub ka Davit mai lhat graung tix ah nin ka nawh. “Kheu maix lai hoek nong nong mai pui hoek mai maix ang koe tix kaux kawx lie?”
2 Davit deeh ah nin ka cao gie kaing li Ahimaliet, “Simiang tawx lox ka aux grawng kaing tix ceu ah nin ka aux, paw kieh pui tix kaux kawx tawng ka grawng pa ploi aux maix yuh tix ceu kawx, ka pa hoik tawm aux ka maix. Mai aux hoik ploi pui awn ju khankix hu sivoe tix ka dee an.”
3 Yam in, “Koe ti daux taix maix. Tawx blah ka aux phwan lon liak, phan ang mawh nan koe pa ih tang ceu lie?”
4 Cao giex kaing li pawk ka Davit ah nin, “Ang koe blah pa pon pui ti ih ku kaux ka daux taix aux, mawh ngie blah pa singax khaing, mawh ngie kawn nyawm simex pa via tix khaing bun pa pon ti ih.”
5 Mai Davit pawk ka cao giex kaing li ah nin, “Yam lih yix krax yix kieh tokaux ti singax khaing bun ku bawg, tokaux kawn nyawm simex pa lih krax in mawh pa singax, lheu khaing an in singaix tokaux ex baox nie singax singeh.”
6 Mawh kheu nan, cao giex kaing li tom tawx blah singax singeh an ka nawh, kheu ang blah tang ceu lai koe lheu khaing blah pa khan tix tan, Ref 21:6 Krub 24:5-9. pa teei lih khaing sivoe ngai Siyiex, sonsang deuh blah khraox singaix teei ka blah prim an lih.
7 Daux singaix an koe pui tix kaux pa pau tan nawh mawh kawncau Sawlux, koe beeh glawm pau plak sivoe Simiang Siyiex, ceu kaux nawh mawh Dawga pui Edom, mawh cao kaing cao liang yung Sawlux.
8 Mai Davit ah nin ka Ahimaliet, “Koe pliah phan ang mawh nan vaig ka daux taix maix tix mu lie? mawh kheu ang aux viex vaig mai kraung naing mai tix, kheu mawh kaing jhaw simiang pa caw pa nied ti yuh.”
9 Cao giex kaing li ah nin, “Vaig Gawliax pui Philitix pa pah maix ka daux ngawd Elax, Ref 21:9 1Sa 17:51. jhak heue, kawn pua tix ka man plak khaix dee koe sibex dhah tan, phan maix sang teei an teei heue, lheu khaing vaig an tang mu ang lai koe tin, ” mai Davit ah nin, “Vaig pa awm an ang koe, tawx vaig an ka aux heue.”
10 Mai Davit kaoh to hu khaing Sawlux daux singaix an mai hu ka Akhix simiang Gata.
11 Mai kawncau Akhix khankix ah nin ka nawh, “In ang mawh Davit pa mawh simiang haktiex an lie?” Ang mawh kix pa rhax lai mai rieb nawh ah nin, “Sawlux hoik pah pui kaing rheng kaing rheng mai Davit hoik pah pui kaing mheen kaing mheenRef 21:11 1Sa 18:7; 29:5. ang mawh lie?”
12 Yam deuh Davit tix tawng ka lox an daux rhawm tix mai nawh kied lhat ka Akhix simiang Gata.Ref 21:12 Yaog 56 Title.
13 Nawh tieh loh jhawm yuh tix sivoe kix mai yuh tix awm pui yhot, Ref 21:13 Yaog 34 Title. kruk kried ti tiiem lai piang siviex mai kieh rawm mia tix jaw ka hauk bheep tix.
14 Akhix ah nin ka kawncau tix khankix, “Jhak heue, pex yaox pui in mawh pa yhot, pex lai viex nawh hoek ka aux lie?”
15 “Mawh lo aux ka pui yhot lie? pex lai viex pui in yuh pui yhot sivoe ngai aux, mawh keung pui in ti laig ka daux nyiex haw aux lie?”