1 Khaix an Davit to khaing yaong Nayok haktiex Ramax mai hoek ah nin ka Yawnasan. “Mawh hoik yuh aux patix lie? mawh hoik lud aux ka tix lie? mai hoik yuh aux phimap tix sivoe keeing maix, nawh lai sawg ka ju aux lie?” 2 Mai Yawnasan pawk ah nin ka nawh, “Ang doh mawh nan maix tak ang yum. Jhak heue, keeing aux yuh ceu pa iak ang ah, pa ang nawh kieh aux tawng ang koe, keeing aux tak mox ceu in khaing aux yuh ka mawx? an ang doh mawh nan.” 3 Mai Davit tiextu ah nin, “Keeing maix hoik tawng pon aux bwanson ka plak sivoe ngai maix mai nawh tak ah nin, “Paw kieh Yawnasan tawng ka grawng in, phan ang mawh nan, nawh tak laux rhawm awm im ju Simiang Siyiex mai awm im ju maix, sinax aux mai krax yum koe ngie tix diang khaing. 4 Mai Yawnasan ah nin ka Davit, “Koe rhawm maix yuh ka mawx, aux tak yuh ka son maix.” 5 Davit ah nin ka Yawnasan, “Jhak heue, pasax mawh singaix haok khix khraox, Ref 20:5 Si 28:11. aux ang khaw ti ngawm pheen mai simiang, viang mawh nan, kieh aux hu mox tix ka daux kaung tom hoek ponbo ka daux loe ngaix tix ngaix.” 6 Phan keeing maix yaox ang aux ot maix tak ah nin, Davit hoik mhaing akhwang khyox khaw ka aux, sonsang ing ka Bieliehiem veng ot tix, mawh kheu pao nyiex nawh caw ti yuh krax tan pa yuh kix ku num 7 Phan nawh ah nin, mhawm heue, kawncau maix tak pon luad luan, phan nawh song rhawm, tak tawng nawh keud tix yuh pa caox. 8 Mawh kheu nan, caux rhawm ka kawncau maix liak, mawh kheu hoik yuh maix sijax mukheu mai kawncau tix plak sivoe Simiang Siyiex, phan krax lud koe ka daux aux, kieh cao maix pah ka aux, mawh kheu maix tak viex aux ka keeing tix yuh ka mawx lie?” 9 Yawnasan ah nin, “Kieh an singai khaing maix! phan aux hoik kriem tawng keeing aux keud ti sang yuh pa caox piang maix, aux tak ang krai ka maix lie?” 10 Mai Davit ah nin ka Yawnasan, “Phan keeing maix pawk lox kin ka maix, mawh pui mawx pa sang krai aux mhong lie?” 11 Yawnasan ah nin ka Davit, “Hoek heue, kieh ax lih hu ka daux kaung.” Mai kiex khawm ra kaux lih hu daux kaung. 12 Mai Yawnasan ah nin ka Davit, “Kieh Simiang Siyiex pui Isarelax mawh mhai rug! yam mhong aux lox keeing tix bawg yam in pasax, phan ang mawh nan sikaox, jhak heue, phan mawh pa mhawm ka son Davit, aux tak ang ploi pui hoek krai ka maix lie? ” 13 “Phan keeing aux keud ti sang yuh pa caox ka maix mai phan aux ang krai maix mhong sonsang luad luan maix, kieh Simiang Siyiex baox lheu yuh pa kin ka aux” Yawnasan, “Kieh Simiang Siyiex ot mai maix, awm ot Nawh Cao mai keeing aux.” 14 “Phan aux kawn im ju jhi krax caux rhawm Simiang Siyiex ka aux, sonsang ang aux yum.” 15 Paw tat krax caux rhawm maix pa koe ka pao nyiex aux leeing ju.Ref 20:15 2Sa 9:1. Awm yam tat Simiang Siyiex ka pui koeng Davit khaing piang haktiex in, 16 Mai Yawnasan yuh sijax mukheu mai doeh nyiex ma Davit ah nin, “Kieh Simiang Siyiex pawk bix ka pui koeng Davit khankix.” 17 Yawnasan baox kieh Davit tiextu kheu krax moh pa moh nawh ka Davit, mawh kheu nawh moh Davit awm moh nawh ka tokaux tix. 18 Khaix an, Yawnasan deeh ah nin ka Davit, “Daux pasax, mawh singaix khix khraox maix tak ang ot, mawh kheu khaox ngawm maix kawx tak yi. 19 Yam hoik ot maix loe ngaix maix tak nied ti lih hu ka dee mox maix tix ka daux singaix pa yuh ceu an mai pau hawt rang Ezelax.” 20 “Aux tak puing te loe taix hawt praok an, awm puing aux ka mhai. 21 Jhak heue, aux ploi kawn nyawm iak ah nin ka nawh, hu sawg ka te an phan aux ah nan ka kawn nyawm iak, jhak ka te pa koe ka praok maix hu teei viex hoek tin, awm im ju Simiang Siyiex maix kawx yaox ti luad luan mai krax lhat ang lai koe son maix.” 22 “Phan aux ah nin ka kawn nyawm iak an, Jhak heue, te hoik luan ka sivoe maix, khaix an maix tak hu heue, mawh kheu Simiang Siyiex hoik ploi maix hu dee singai”. 23 “Mawh kheu grawng pa hoik sikah maix mai aux, jhak heue, Simiang Siyiex tak mawh mhai rug sinax maix mai aux leeing ju.” 24 Davit mox tix ka daux kaung mai yam hoik hoek singaix khix khraox, simiang ngawm sonsang ih priex. 25 Simiang ngawm piang khaox ngawm tix awm ku bawg piang dee ngawm hawt ding, Yawnasan cung mai Abana ngawm ka praok Sawlux, viang mawh nan dee ngawm Davit hoik yi. 26 Mai Sawlux ang lai ah lox tidtix ka daux singaix an, mawh kheu hoik keud nawh, Tee koe grawng tix ceu ka Davit, nawh tee ang singax, nawh tee ang singax. 27 Daux singaix khaix, khix khraox ra ngaix tix ngaix, dee ngawm Davit hoik baox yi. Mai Sawlux ah nin ka kawn simex tix Yawnasan, “Kheu kawn simex Yessie ang hoek ti ih praix kawx tom in singaix jao patix?” 28 Yawnasan pawk ka Sawlux ah nin, “Davit hoik mhaing akhwang khyox khaw ka aux, sonsang hu ka Bieliehiem, ” 29 Nawh ah nin, “Kieh aux hu yuh krax tan tau mai paox nyiex aux khankix ka daux veng mai puxke aux hoik tawm lox sonsang hoek aux tan. Phan mawh pa pon bwanson ka sivoe ngai maix kieh aux hu yaox ka puxke tix khankix Mawh kheu jao in nawh tom ang hoek ka pheen sawm simiang.” 30 Mai Sawlux kied song rhawm ka Yawnasan mai Sawlux ah nin ka nawh, “Maix pa mawh kawn simex khaing bun, pa ang nghiet lox mai pa tieh feen, mawh ang aux tawng laug maix kawn simex Yessie mawh krax kaig ka tokaux cao tix mai kieh vaig miex tix kaig lie?” 31 “Glang yam kawn im ju kawn simex Yessie piang haktiex in maix ang ah, meung haktiex maix ang ah, tak ang kaux cong. Yam in ploi pui hu sawg mai viex nawh hoek ka aux, mawh kheu nawh tak yaox ti yum tete.” 32 Khaix an Yawnasan pawk lox keeing tix Sawlux ah nin, “Kheu nawh tak yaox ti yum lie? Mawh hoik yuh nawh patix lie?” 33 Sawlux puah plia tix ka nawh sonsang pah Yawnasan, mawh kheu nan, Yawnasan hoik tawng keeing tix sang pah ka Davit. 34 Mai Yawnasan yaog tix khaing pheen sawm mai pa kied song rhawm tix ang lai ih priex daux khix khraox ra ngaix tix ngaix, mawh kheu nawh koe krax voi rhawm son Davit, kheu jao yuh keeing nawh krax kaig ka nawh. 35 Yawnasan hu daux kaung plak ponngawb, tau mai kawn nyawm iak ka bawg yam tin ti deuh mai Davit. 36 Mai nawh tawx lox ka kawn nyawm an ah nin, “To maix hu sawg te pa hoik puing aux.” Yam to kawn nyawm an, nawh puing te tix taix sivoe kawn nyawm iak an. 37 Yam hoek kawn nyawm iak ka dee cod te puing Yawnasan, Yawnasan kok yo plak khaix kawn nyawm iak an ah nin, “Ang te koe sivoe maix lie?” 38 Mai Yawnasan kok yo plak khaix kawn nyawm iak an, “Nied phai phai, paw lai kaog.” Kawn nyawm iak cie Yawnasan sut ka te mai deeh hoek ka cao simiang tix. 39 Mai kawn nyawm iak an ang tawng ka tidtix, mawh ngie Yawnasan mai Davit pa tawng ka grawng an. 40 Khaix an Yawnasan tawx kraung naing tix ka kawn nyawm iak an ah nin ka nawh, “Viex in khankix ing ka daux veng.” 41 Khaix hoik lih hu kawn nyawm iak an, Davit kaoh khaing dee ot tix ka plak seh mai gup pakngai tix piang tiex loe bawg mai kiex ngheet paox tix, kiex yiiem tau, Davit nie lheu yiiem khaing nawh. 42 Khaix an Yawnasan ah nin ka Davit, “Hu ka daux pa nhim, mawh kheu krax tiextu pa hoik yuh ax tau mai min ceu kaux Simiang Siyiex pa ah nin, Simiang Siyiex tak ot sinax aux mai maix mai sinax doeh ru aux mai doeh ru maix leeing ju.” Mai Davit kaoh lih hu, Yawnasan kawx deeh ing ka daux veng heue.