1 Pui Philitix khrawm kru naing tix son naing, kix khrawm paox tix ka Sawkhaw haktiex Yudax mai yuh tab sinax Sawkhaw mai Azeka ka haktiex Ephidamim. 2 Sawlux mai pui Isarelax khrawm paox tix, mai yuh tab ka daux ngawd Elax, sonsang yuh naing ka pui Philitix. 3 Pui Philitix cung piang gawng tix plak mai pui Isarelax kawx cung piang gawng an tix plak mai ngawd khan sinax kix. 4 Koe pui tix kaux pa kaux Gawliax mawh pui vao ka naing, pa mawh pui veng Gata pa lhaong liah sawk mai tix diex, lih khaing tab pui Philitix. 5 Nawh ceep mhok tawng lheung ka kaing tix mai ceep sibex plah tawng pa cien phwan rheng shekhe. 6 Chup tawng lheung ka caong tix mai kawg pliah tawng ka klip tix. 7 Krong pliah an awm blax taing mai to pliah cien liah yieh shekhe mai pui giex pliah rhiem tiebtie tix kaux hu sivoe nawh, 8 nawh cung yo lox ti hu ka plak pui Isarelax ah nin, “Pex lai hoek ti yuh naing yuh ka mawx lie? Ang aux mawh pui Philitix mai ang pex mawh kawncau Sawlux lie? Laug pui tix kaux khaing pex mai ploi nawh lih hoek ka aux. 9 Phan nawh pex puing ka aux mai pah ka aux, yix tak mawh siliex pex, mai phan aux pex nawh mai pon pah nawh, pex tak mawh siliex yix mai yuh kaing jhaw yix.” 10 Pui Philitix an ah nin, “Aux tak grhiem kru naing pui Isarelax in singaix, tawx pui tix kaux sonsang puing yiex paox tix.” 11 Yam mhong Sawlux mai pui Isarelax ka lox krai pui Philitix an, kix kied voi rhawm mai lhat graung ka. 12 Davit mawh kawn simex pui Epharax veng Bieliehiem haktiex Yudax, pa kaux Yessie mai nawh koe kawn simex daix kaux. Pui an hoik kuad sipie mai hoik rie ju hu sivoe baux singaix im ju Sawlux. 13 Kawn simex ting Yessie loe kaux hoik hawt khaix Sawlux ka biang naing, ceu kaux kawn simex loe kaux pa hu daux naing, mawh Eliabax kawn Ai mai khaix nawh mawh Aminadat mai an loe kaux tix kaux mawh Shana. 14 Davit mawh kawn ghoik, pa ting loe kaux hoik hawt Sawlux. 15 Viang mawh nan, Davit deeh ing khaing Sawlux, sonsang ing liang ka yung keeing tix ka Bieliehiem. 16 Pui Philitix an lih jhi tokaux tix ka daux tixpon ngaix, ponngawb tix bawg mai ponbo tix bawg. 17 Yessie ah nin ka kawn simex tix Davit, “Teei maix viex nghox ca diag tix e pha mai blah kao lon mai nied ti hu tawx ka puxke maix khankix ka biang naing, 18 viex kang rawm teeih kao khlawp son cao kaing pui naing tix rheng. Jhak tix yaox krax ot krax koe puxke maix khankix mai deeh viex grawng tix ceuceu khaing kix.” 19 Sawlux mai pui nawh khawm pui Isarelax ot ka daux ngawd Elax mai puing paox tix tau mai pui Philitix. 20 Davit kaoh ponngawb caocao mai prah yung khankix ka cao liang yung mai viex pa ih, lih hu awm lox tawm Yessie ka nawh mai nawh hoek ka daux tab bawg yam kawn taug hu kix sonsang puing tix naing mai kix yo lox sinum son naing. 21 Pui Isarelax mai pui Philitix tang khre kru naing sonsang puing ka paox tix. 22 Davit ap pa ih pa viex tix, ka cao priex pa ih tab mai nied tix laig sinax pui naing mai singeuh taix puxke ti khankix. 23 Yam kawn sikah nawh mai kix, pui vao khaing pui Philitix pui veng Gata, pa mawh Gawliax, lih hoek khaing pui naing Philitix mai krai lox awm pa hoik krai tix sivoe, mai Davit kawx mhong kah. 24 Yam yaox pui Isarelax ka pui an mai kix to hu khaing nawh, kheu lhat graung kix ka tete. 25 Pui Isarelax khankix ah nin, “Hoik yaox pex ka pui pa lih hoek an lie? Nawh hoik lih hoek, si lah ka pui Isarelax tete, pui pa pon pah ka nawh, simiang tak tawx mau khri ka nawh tom nie mai nawh tak tawx kawn bun tix ka nawh mai kieh nyiex ma keeing nawh luad luan khaing kaing jhaw daux pui Isarelax.” 26 Davit ah nin ka pui pa cung dex nawh, “Son pui pa sang pah ka pui Philitix in mai teei ti tik pa salao khaing pui Isarelax, tak sang pon bwanson pa yuh ka mawx lie? mawh kheu pui Philitix pa ang pat hak in, nawh khex pon si lah ka kru naing Siyiex pa im ju lie?” 27 Pui hun pawk lox nawh awm pa hoik ah kix sivoe ah nin, “Pui pa pon pah ka nawh tak pon bwanson pa hoik ah kix.” 28 Eliabax puxke ting Davit, hoik mhong yam sikah nawh ka pui khankix mai Eliabax kied song rhawm ka Davit ah nin, “Mawh lih hoek yuh maix ti? prah maix yung pa ang nie an ka daux tiag mai pui mawx? Aux tawng pa ca nyhau mai pa caox caig khaing daux rhawm maix, mawh kheu lih hoek maix sonsang kia tix ka naing.” 29 Davit ah nin, “Mawh hoik yuh aux patix? mawh ang aux pon sikah tix gum kawx lie?” 30 Davit deeh veeh tix khaing nawh mai hu ka tang kaux mai krai awm pa krai sivoe mai pui hun pawk ka nawh awm sivoe. 31 Yam mhong kix lox krai Davit, kix hu krai an ka sivoe ngai Sawlux, mai ploi pui hu kok ka Davit. 32 Davit ah nin ka Sawlux, “Paw kieh pui khrup rhawm kheu in tix kaux kawx, kawncau maix tak hu puing ka pui Philitix.” 33 Mai Sawlux ah nin ka Davit, “Maix ang tau tix pon hu, sonsang puing tix ka pui Philitix in, mawh kheu kawn mawh maix kawn nyawm mai nawh hoik sax mawh pui naing jah tom yam iak tix.” 34 Davit deeh pawk ah nin ka Sawlux, “Kawncau maix hoik dawg mawh cao liang yung keeing tix, yam hoek sivai sangsi mai krih ti sang kied ka kawn yung khaing cub yung, 35 aux hawt pheet an mai pah ka mai deeh taoh kawn yung khaing daux jheeh nawh, yam kaoh yuh nawh ka aux mai aux giex hauk jheeh nawh mai lah nawh tom yum. 36 Kawncau maix hoik pah sivai sangsi mai krih mai pui Philitix pa ang nyang pat hak in, tak awm totiag an tix mu khaing, mawh kheu nawh hoik silah ka kru naing Siyiex pa im ju.” 37 Davit ah nin, “Simiang Siyiex Cao pa taoh aux khaing taix sivai sangsi mai krih, tak taoh aux khaing taix pui Philitix.” Sawlux ah nin ka Davit, “Hu heue, Simiang Siyiex tak ot tau mai maix.” 38 Mai Sawlux tawx Davit ceep kraung naing tix mai ceep mhok tawng lheung piang kaing nawh mai kieh ceep sibex rhiem. 39 Davit phyawk vaig tau mai kraung naing, nawh cheu ti hu kawx ang chix, mawh kheu ang nawh sax ceep, Davit ah nin ka Sawlux, “Aux ang pon hu ka ceep tix in, mawh kheu ang aux nyang meed, ” mai Davit peeik ka an. 40 Mai giex khaox gix ka taix ti mai laug simaox lawmle phwan mu ka daux klawng mai sau ka daux bau liang yung, pa koe mai tix, nawh giex ak maox vuh vied daux taix mai greed hoek dex pui Philitix. 41 Pui Philitix hoek dex Davit mai cao giex plah rhiem tiebtie nawh lih hu ka plak sivoe nawh. 42 Yam jhak pui Philitix an ka Davit mai ang koe krax nab yam ka nawh, kheu mawh Davit pui awn ju mai raoh hauk kaing, pakpeung grang tokaux nyawm ti jhak. 43 Pui Philitix ah nin ka Davit, “Mawh aux sox lie? maix lai viex khaox hoek ka aux.” Pui Philitix an jhax lawg Davit ka daux ceu kaux Siyiex tix. 44 Pui Philitix ah nin ka Davit, “Hoek ka aux, aux tak tawx nex maix ka sim raoma mai ka totiag ka daux tiag.” 45 Davit ah nin ka pui Philitix, “Maix hoek ka aux tau mai vaig pliah mai plah rhiem tiebtie, viang mawh nan, aux hoek ka maix ka daux min ceu kaux Simiang Siyiex Cao kru naing raoma, Siyiex pui Isarelax, pui pa silah maix kah, ” 46 in singaix Simiang Siyiex tak ap maix ka daux tawm taix aux, aux tak pah maix mai kid kaing maix, aux tak tawx tokaux yum kru naing pui Philitix khankix, ka sim raoma mai ka totiag pa koe piang haktiex, sonsang tawng pui haktiex koe Siyiex ka daux pui Isarelax. 47 Pui hun tak tawng Simiang Siyiex ang taoh pui ka vaig lawm mai pliah, mawh kheu pa yuh naing mawh cie Simiang Siyiex mai Nawh tak ap maix ka daux taix yix.” 48 Pui Philitix kaoh greed tix dex sonsang puing Davit, Davit nied tix to ka see pui naing, sonsang puing ka pui Philitix. 49 Davit cawk ti teei simaox mu daux bau ka taix ti mai vuh vied simaox an, simaox kawx krox ka dong re pui Philitix, lon simaox an laig ka dong re nawh mai nawh goh gup pakngai tix piang tiex. 50 Davit hoik pex pui Philitix ka ak maox vuh vied mai lon simaox tix mu, hoik krox ka pui Philitix mai pah ka nawh, yam an vaig lawm ang koe ka daux taix Davit. 51 Davit nied ti to cung piang pui Philitix an mai lawd vaig cao nawh khaing daux phak vaig, pah nawh mai kid kaing nawh ka vaig. Yam yaox pui Philitix hoik yum pui naing vao tix, kix tang to hu. 52 Pui Isarelax mai pui Yudax kaoh mai yo lox tix pheet ka pui Philitix, tom singai hoek ka Gata mai hoek ka siviex veng Ekaron, pui Philitix pa mat khankix goh hawt krax ka veng Sharem tom singai hoek ka veng Gata mai veng Ekaron. 53 Pui Isarelax kaoh khaing pheet tix ka pui Philitix mai kix rhim ka nyiex gox kix. 54 Davit teei kaing pui Philitix an mai viex hoek ka veng Yerusaliem, viang mawh nan, nawh deuh kraung naing Gawliax ka nyiex gox man tix. 55 Yam yaox Sawlux lih hu puing Davit ka pui Philitix an, nawh chawk ka Abana cao kaing naing ting tix ah nin, “Abana eue, kawn nyawm in mawh kawn simex pui mawx?” Mai Abana pawk ah nin, “Simiang eue, awm im ju maix aux ang tawng.” 56 Simiang ah nin, “Chawk cheng tix yaox ka kawn nyawm in mawh kawn simex mawx.” 57 Yam deeh hoek Davit khaing pah tix pui Philitix an, Abana teei ka nawh mai viex hoek ka plak sivoe Sawlux, tau mai kaing pui Philitix pa koe daux taix nawh. 58 Mai Sawlux ah nin ka nawh, “Kawn nyawm eue, mawh maix kawn simex pui mawx. “Davit deeh pawk ah nin, “Aux mawh kawn simex kawncau maix Yessie pui veng Bieliehiem heue.”