16
Yaog Davit Mawh Simiang
1 Simiang Siyiex ah nin ka Samoelax, “Mawh kawn sang khrup rhawm maix son Sawlux miex grheung aux hoik thiang nawh khaing pa mawh nawh simiang piang pui Isarelax ang mawh lie? Sau bee naog ka daux rung teet mai lih hu, Aux sang ploi maix hu ka Yessie, pui veng Bieliehiem, mawh kheu Aux hoik khre rien simiang son tix khaing sinax kawn simex nawh khankix.”
2 Samoelax ah nin, “Aux sang pon hu yuh ka mawx? Phan Sawlux mhong ka an, nawh tak pah ka aux.” Simiang Siyiex ah nin, “Teei mawie shiang viex hu mai maix tix mu ah nin, aux hoek ti tan ka Simiang Siyiex,
3 mai ghaok Yessie hoek ka dee yuh krax tan, Aux tak jhi maix yaox pa sang caw maix ti yuh maix tak groi rawm bee ka pui pa ciak Aux ceu kaux ka maix.”
4 Samoelax hoik yuh ceu an awm pa hoik tawm Simiang Siyiex mai hoek ka Bieliehiem, mai kwad riex ju veng an khankix hoek rieb nawh mai sikua ti ah nin, mawh hoek maix ka daux pa nhim lie?”
5 Samoelax pawk ah nin, “Hoek daux pa nhim, aux hoek sonsang yuh krax tan ka Simiang Siyiex, kieh tokaux pex singax mai hoek ka aux, ka dee yuh krax tan.” Nawh yuh kieh Yessie mai kawn simex nawh khankix singax mai ghaok kix hoek ka krax tan.
6 Yam hoik hoek kix, nawh jhak ka Eliabax mai keud ah nin, “Pui pa sang groi Simiang Siyiex bee ka hoik ot plak sivoe Siyiex tete.”
7 Viang mawh nan, Siyiex ah nin ka Samoelax, “Paw jhak pakpeung ngai baoh mai krax lhaong jung, Aux hoik thiang ka nawh, mawh kheu pa yaox Siyiex ang awm pa yaox kawn pui, kawn pui jhak ka grang pakpeung ka praix, viang mawh nan, Simiang Siyiex jhak ka daux rhawm.”
8 Mai Yessie kok ka Abinadat mai kieh nawh hu ka sivoe Samoelax mai nawh ah nin, “Simiang Siyiex ang laug ka pui in.”
9 Yessie baox kieh Shama tiang ti hu, nawh ah nin, “Simiang Siyiex ang laug ka pui in.”
10 Yessie kieh kawn simex tix aliah kaux tiang hu ka plak sivoe Samoelax, Samoelax ah nin ka Yessie, “Simiang Siyiex ang laug ka pui in khankix.”
11 Samoelax chawk ka Yessie ah nin, “Mawh koe kawn simex maix tin khawmuik lie?” mai nawh ah nin, “Kawn deuk ngie kawn ghoik, jhak heue, nawh kawn liang yung khankix.” Samoelax ah nin ka Yessie, “Ploi pui hu kok ka nawh, mawh kheu ex tak ang nyang ngawm tom hoek nawh tin.”
12 Nawh ploi pui hu kok mai viex nawh hoek plak daux. Davit raoh hauk kaing mai ngai baoh nawh jiet mhawm, pakpeung grang tokaux nawh nyawm ti jhak, Simiang Siyiex ah nin, “Kaoh mai groi bee ka nawh, in mawh nawh.”
13 Samoelax teei bee khaing rung teet mai groi piang nawh ka sigreung puxke nawh khankix, mai Simiang Siyiex lih hoek piang Davit jah singaix an tom hu sivoe, Samoelax yaog ti kaoh deeh ing ka veng Ramax.
Khwan Caox Tuktiak Sawlux Kha Rhawm
14 Khwan Simiang Siyiex lih hu khaing Sawlux mai khwan caox khaing Simiang Siyiex tuktiak ka nawh.
15 Kawncau Sawlux ah nin ka nawh, khwan caox khaing Siyiex hoik tuktiak ka maix.
16 Kieh cao simiang ex tawm lox ka kawncau tix khankix, pa ot ka sivoe maix, sonsang sawg ka pui min pa jiet chix tah ting mhawm lox, nawh tak tah ting an yam hoek khwan caox khaing Siyiex ti tuktiak ka maix, maix tak nyawm rhawm ka.”
17 Sawlux ah nin ka kawncau tix khankix, “Sawg pui pa jiet chix tah ting tix kaux mai viex nawh hoek ka aux.”
18 Pui tix kaux khaing daux kawncau nawh, pawk lox ah nin, “Jhak heue, aux hoik yaox kawn simex Yessie pui veng Bieliehiem, pa mawh pui min pa chix tah ting mhawm mhawm, nawh mawh pui vao ka naing tix kaux mai pa chix sikah mai mawh pui mhawm ngai mhawm baoh, Simiang Siyiex ot tau mai nawh.”
19 Mawh kheu nan, Sawlux ploi kawncau ti hu ka Yessie ah nin, “Ploi kawn simex maix Davit, pa mawh cao liang yung hoek ka aux.”
20 Yessie teei la tix mu mai tang blah piang an, tau mai singiien hak rawm plix siiet, mai kawn pex mai ap an ka Davit sonsang tawx ka Sawlux.
21 Davit hoek ka Sawlux mai cung ka plak sivoe nawh, Sawlux kied moh ka nawh sigrien sigre mai nawh lih ti mawh pa klawm kraung naing Sawlux.
22 Mai Sawlux ploi pui hu ka Yessie ah nin, “Kieh Davit ot tau mai aux, mawh kheu aux khaw rhawm ka nawh.”
23 Yam hoek khwan caox khaing Siyiex piang Sawlux yam mawx ang ah, Davit teei ting mai tah ka taix tix, mawh kheu Sawlux lih tix nyawm rhawm mai deeh moi nyawm ot, khwan caox kawx lih khaing nawh heue.