1 Yam hoik sikah nawh ka Sawlux, Yawnasan hoik pid rhawm ka Davit mai Yawnasan hoik moh nawh awm moh ka ju tix. 2 Sawlux hoik teei nawh ot mai tix ka daux singaix an mai ang lai kieh nawh ing ka nyiex keeing tix. 3 Khaix an Yawnasan yuh sijax mukheu mai Davit, mawh kheu moh nawh Davit awm moh nawh ka ju tix. 4 Yawnasan peeik sibex dhah tix tawx ka Davit tau mai kraung naing ceep nawh, vaig, ak mai maox rawd nyoi nawh. 5 Mai Davit hoik lih hu yuh kaing jhaw haok hwan ka dee ploi Sawlux nawh hu dee mawx ang ah, mai Sawlux deuh nawh mawh cao kaing naing piang pui khankix mai in mawh pa khaw ka plak sivoe ngai pui mai ka plak sivoe ngai kawncau Sawlux khankix. 6 Yam deeh hoek Davit khaing pah tix pui Philitix, bun khankix lih hoek khaing veng pui Isarelax mai rhax lai graoh sonsang rieb ka simiang Sawlux, tau mai tah ting, tah kraung mai pa gaux rhawm. 7 Mai bun khankix ah lai rhax graoh ah nin, “Sawlux hoik pah pui ting riang kaing rheng mai Davit hoik pah pui kaing mheen.”Ref 18:7 1Sa 21:11; 29:5. 8 Mai Sawlux kied song rhawm, ang nyawm rhawm ka lox ah nin, “Kix yaogyaw Davit pah pui kaing mheen kaing mheen mai ka son aux mawh ngie kaing rheng kaing rheng, lheu khaing meung haktiex nawh kawn sang pon patix.” 9 Jah ka singaix an tom hoek sivoe ngai, Sawlux hoik krix ngai ka yaox tix Davit. 10 Singaix pasax khwan caox khaing Siyiex, lih hoek piang Sawlux mai nawh nieb krai lox jhai ka daux nyiex haw, Davit tah ting awm pa hoik sax tah nawh sivoe mai Sawlux giex pliah daux taix tix. 11 Mai Sawlux puah nawh ka pliah mai keud ah nin, “Aux tak blung Davit ka ding.” Viang mawh nan, Davit via tix khaing sivoe nawh ra bawg. 12 Sawlux lhat ka Davit, mawh kheu Siyiex ot mai Davit, viang mawh nan, Simiang Siyiex hoik lih khaing Sawlux. 13 Sawlux dux Davit khaing sivoe ngai tix mai kieh nawh mawh cao kaing naing piang pui tix rheng mai Davit lih plak praix sivoe pui hun. 14 Mai kaing jhaw yuh Davit haok hwan ting lhaong khawmuik, kheu Simiang Siyiex ot tau mai nawh. 15 Yam yaox Sawlux haok hwan kaing jhaw yuh Davit, nawh lhat ka Davit. 16 Pui Isarelax mai pui Yudax khankix, kied moh ka Davit, mawh kheu Davit laig lih ka sivoe ngai kix. 17 Sawlux ah nin ka Davit, “Kawn bun ting aux Merat ot tin, aux tak tawx maix moeng, kieh maix mawh ngie pui vao ka son aux mai puing naing son Simiang Siyiex khaing.” Sawlux hoik keud yuh nin, “paw lai kieh taix aux hoek piang nawh, kieh taix pui Philitix hoek piang nawh.” 18 Davit ah nin ka Sawlux, “Mawh aux pui mawx daux pui Isarelax mai mawh paox nyiex keeing aux pui pa yuh ka mawx, aux lai khaw ti mawh kheue simiang lie?” 19 Yam hoek bawg yam tawx kix Davit moeng Merat, kix deeh tieh ti tawx Merat mex ka Adrelax pui Mehawlatix. 20 Kawn bun Sawlux Mikhalax moh ka Davit, kix krai grawng an ka Sawlux mai nawh khaw rhawm kah. 21 Mai Sawlux keud ah nin, “Aux tak tawx kawn bun tix ka Davit sonsang mawh kie ka son nawh mai taix pui Philitix tak hoek yuh ka nawh. Sawlux ah nin ka Davit ra bawg tix bawg, “Maix tak mawh kheue aux daux in singaix.” 22 Mai Sawlux tawx lox ka kawncau tix khankix, “Briex pex sikah ka Davit ah nin, jhak heue, simiang khaw rhawm ka maix mai kawncau nawh khankix kawx moh ka maix, yam in rieb maix mawh kheue simiang” 23 Mai kawncau Sawlux khankix krai Davit mhong ceu in. Davit pawk ah nin, “Mawh keud pex grawng mawh aux kheue simiang mawh ceu pa iak pa lied lie? Aux mawh pui hot mai mawh pui pa ang koe min plakngai.” 24 Mai kawncau Sawlux khankix krai grawng “Pa krai Davit ka nawh ah nin.” 25 Sawlux ah nin, “Pex tak krai awm inkix ka Davit, simiang ang koe rhawm ti teei kraung tidtix ka son kapaox, lheu khaing toh hak pui Philitix tix yieh kaux, sonsang pawk bix tix piang pui koeng nawh.” Mawh kheu Sawlux hoik keud tix kieh Davit yum ka daux taix pui Philitix. 26 Yam krai kawncau Sawlux khankix lox in ka Davit, mawh pa khaw rhawm Davit sonsang mawh kheue simiang. sivoe ang bawg yam tat ti deuh nyang hoek. 27 Davit kaoh hu tau mai pui nawh khankix mai pah pui Philitix ra yieh mai Davit viex toh hak kix mai tawx ka simiang tom naog, sonsang mawh tix kheue simiang. Mai Sawlux tawx nawh moeng kawn bun tix Mikhalax. 28 Yam yaox Sawlux mai hoik tawng ot Simiang Siyiex tau mai Davit mai kawn bun Mikhalax hoik moh ka nawh, 29 Sawlux kawn nie baox lhat ka Davit. Mawh kheu nan, Sawlux lih ti mawh pui koeng Davit hu sipie. 30 Cub cao kaing pui Philitix khankix lih hu puing naing, yam lih hu kix daux naing yam mawx ang ah, Davit nie lheu haok hwan kaing jhaw yuh khaing kawncau Sawlux khankix mai ceu kaux Davit kied ao min tete heue.