1 Samoelax ah nin ka Sawlux, “Simiang Siyiex kieh aux hoek groi rawm bee mai yaog maix mawh simiang piang pui Isarelax.Ref 15:1 1Sa 10:1. Yam in nghiet ka lox Simiang Siyiex.” 2 Simiang Siyiex Cao kru naing raoma ah nin, “Aux tak ciyang ka Amaliet ka tiebtie kix krax pa lih pui Isarelax khaing Ejiptux.Ref 15:2 Lih 17:8-14; Pi 25:17-19. 3 Yam in hu puing ka pui Amaliet mai yuh can pa koe kix laux leeing khawmuik, mai paw lhawk ka kix, pah kix khawm simex bun, kawn nyawm iak mai kawn ngie peuex, khawm mawie mai yung, kala-uk mai la khankix.” 4 Mai Sawlux khrawm ka pui khankix mai simin ti yaox kix ka veng Teleng mai pon lien kru naing caong ra sien kaux mai lien pui Yudax tix mheen kaux. 5 Sawlux hoek ka veng pui Amaliet mai kix pau ti yuh naing jawm ka daux ngawd. 6 Sawlux ah nin ka pui Keni, “Lih hu, gah pex khaing sinax pui Amaliet, aux lhat ti yuh pex laux leeing mai kix, mawh kheu hoik jhi pex krax caux rhawm ka pui Isarelax yam lih kix khaing Ejiptux.” Mawh kheu nan, pui Keni kawx lih hu khaing sinax pui Amaliet. 7 Sawlux puing ka pui Amaliet, jah khaing Havilax tom hoek ka Shurax, ka plak lih singaix Ejiptux. 8 Nawh giex im ka Agat simiang pui Amaliet mai pah pui meung yum ka lawm vaig. 9 Sawlux mai pui nawh khankix, lhawk ka simiang Agat mai yung pa kied mhawm, mawie, kawn yung pa kied kluing mai can pa mhawm khawmuik, kix ang rhawm yuh laux leeing khawmuik, kix yuh ngie pa seeing tix ka mai pa ang koe ngawh jum khankix laux leeing heue. 10 Gumlox Simiang Siyiex lih hoek ka Samoelax, 11 “Aux laux rhawm ka hoik kieh tix Sawlux mawh simiang, mawh kheu hoik veeh ti khaing pa hawt khaix Aux mai ang yuh hawt awm lox pingnyap Aux.” Samoelax kied laux rhawm mai nawh yiiem ka plak sivoe Simiang Siyiex leeing sawm. 12 Mai Samoelax kaoh ponngawb caocao sonsang pub ka Sawlux mai pui tix kaux ah nin ka Samoelax, “Sawlux hoik hu ka veng Khamelax, jhak heue, nawh sum mhai pa doh keud ka son tix mai deeh veeh ti, tiang mai hu ka plak veng Gilagalax.” 13 Samoelax hoek ka Sawlux mai Sawlux ah nin ka nawh, “Kieh Simiang Siyiex nawb bwan ka maix, aux hoik yuh awm lox pingnyap Simiang Siyiex.” 14 Mai Samoelax ah nin, “Phan mawh nan lox riag yung mai lox bawh mawie pa mhong Aux ka yhaok tix mawh patix?” 15 Sawlux ah nin, kix hoik viex an khankix, khaing pui Amaliet, mawh kheu pui khankix lhawk ka yung pa kied mhawm mai mawie sonsang tan ka Simiang Siyiex maix, mai pa kawn deuk yix yuh laux leeing.” 16 Khaix an Samoelax ah nin ka Sawlux, “Ot yawg ha, Aux krai maix mhong pa hoik krai Simiang Siyiex ka aux daux sawm in, ” Sawlux ah nin ka nawh, “Krai heue, ” 17 Samoelax ah nin, “Viang maix mawh pa iak ka daux ngai cao tix kawx maix hoik mawh cao kaing doeh nyiex ma pui Isarelax mai Simiang Siyiex hoik groi rawm bee ka maix sonsang mawh maix simiang piang pui Isarelax ang mawh lie? 18 Simiang Siyiex ploi maix hu yuh kaing ah nin, hu mai yuh pui Amaliet pui phimap laux leeing mai puing ka kix tom laux leeing kix, 19 maix ang lai cu nghiet ka lox Simiang Siyiex mai maix lai teei kraung pa tud rhim an mai yuh pa caox caig ka plak sivoe ngai Simiang Siyiex yuh ka mawh lie?” 20 Sawlux ah nin ka Samoelax, “Aux hoik cu nghiet ka lox Simiang Siyiex mai aux hoik hu yuh ka kaing pa ploi Simiang Siyiex aux yuh mai hoik viex Agat simiang pui Amaliet mai aux hoik yuh pui Amaliet khankix laux leeing.” 21 Viang mawh nan, pui khankix hoik teei kraung pa tud rhim pa mawh yung, mawie mai can pa kied mhawm pa caw ti yuh laux leeing, sonsang tan ka Simiang Siyiex, Siyiex maix ka Gilagalax.” 22 Samoelax ah nin, “Mawh pa khaw rhawm Simiang Siyiex ka krax tan pa gleeing mai krax tan pa appong khaing pa cu nghiet ka lox Simiang Siyiex lie? Jhak heue, krax cu nghiet nie lheu mhawm khaing krax pa appong mai pa nghiet nie lheu mhawm khaing khlawp bee yung mhaing. 23 Mawh kheu pa tieh feen awm phimap pa yuh phicaox mai pa kiien rhawm awm phimap pa caox mai pa krub riang grang, mawh kheu hoik thiang maix ka gumlox Simiang Siyiex, Nawh kawx thiang ka simiang mawh maix.” 24 Sawlux ah nin ka Samoelax, “Aux hoik yuh phimap, mawh kheu aux hoik lud ka lox tawm pingnyap Simiang Siyiex mai maix, mawh kheu lhat graung aux ka pui hun mai cu nghiet ka lox kix. 25 Yam in aux rawg maix pluat ploi ka phimap tix, deeh hoek mai aux, sonsang krub aux ka Simiang Siyiex.” 26 Samoelax pawk ah nin ka Sawlux, “Aux tak ang deeh hoek mai maix, mawh kheu maix hoik thiang ka gumlox Simiang Siyiex mai Simiang Siyiex hoik thiang maix khaing pa mawh maix simiang piang pui Isarelax.” 27 Samoelax veeh ti sang hu, Sawlux hawt bluh caong sibex nawh mai sibex nawh kawx griah. 28 Samoelax ah nin, “Simiang Siyiex hoik riah meung haktiex Isarelax khaing maix in singaix mai tawx ka paox plawg maix, pui pa nie mhawm khaing maix.” 29 Nawh Cao pa mawh riang rao Isarelax ang lai pie lhen mai ang tieh loh krax keud tix, mawh kheu ang Nawh mawh kawn pui mai ang tieh loh krax keud tix.” 30 Sawlux ah nin, “Aux hoik yuh phimap, yam in deeh tawx min plakngai ka aux ka plak sivoe ngai kwad song pui aux khankix mai ka plak sivoe pui Isarelax deeh hoek mai aux, sonsang krub aux ka Simiang Siyiex, Siyiex maix.” 31 Samoelax deeh hawt khaix Sawlux, mai Sawlux krub ka Simiang Siyiex. 32 Samoelax ah nin, “Viex Agat simiang pui Amaliet hoek ka aux.” Agat hoek ka nawh mai pa gaux rhawm, ah nin, “Krax yum pa kied lang teung hoik luan tete.” 33 Samoelax ah nin, “Awm hoik yuh lawm vaig maix bun khankix ang koe kawn, mawh kheu nan, miex maix tak ang lai koe kawn sinax bun khankix.” Mai Samoelax gaing ka Agat lih mawh baux mawx baux an sivoe Simiang Siyiex ka Gilagalax. 34 Khaix an, Samoelax hu ka Ramax mai Sawlux kawx deeh ing ka nyiex haw tix ka Gibat. 35 Samoelax ang lai yaox ka Sawlux, tom hoek singaix yum nawh tix bawg kawx mai Samoelax hoik khrup rhawm son Sawlux. Simiang Siyiex kawx laux rhawm grawng kieh tix Sawlux mawh simiang piang pui Isarelax heue.