1 Tix singaix Yawnasan kawn simex Sawlux ah nin ka pui awn ju pa viex kraung naing nawh, “Hoek heue, hu ex ka tab pui Philitix ka plak an, mai nawh ang krai keeing tix mhong. 2 Mai Sawlux ngawm ka dee sidah Gibat greem khaox kla jiang pa koe ka yaong Migaron, pui pa ot mai nawh koe been liah yieh kaux, 3 Ahiyax kawn simex Ahituk puxke Ikhabok, kawn simex Phinehat, kawn simex Elix, cao giex kaing li Simiang Siyiex ka veng Shilaw, ceep sibex dhah dawd taix, pui khankix ang nyang tawng lih hu Yawnasan, 4 krax sinax gawng dee hu sawg Yawnasan ka kru naing Philitix, koe rang choek ka toi plak in plak an, tix mu mawh Bawziet mai an tix mu mawh Sena. 5 Rang choek an tix mu veeh tix plak laong, see ka Mikhamat mai an tix mu veeh tix plak seh see ka Gebax. 6 Mai Yawnasan ah nin ka pui awn ju pa viex kraung naing tix, “Hoek heue, kieh ax tiang ka tab pau veng pa ang pat hak, tee rien Simiang Siyiex ti yuh tix ceuceu ka son ax, mawh kheu Simiang Siyiex tak ang mox tiebtie krax pa taoh Simiang Siyiex, viang pui nie ang ah, viang pui tux ang ah.” 7 Cao pa viex kraung naing nawh ah nin ka nawh, “Yuh awm pa koe rhawm maix ti yuh khawmuik, hu heue, aux tak hawt khaix maix awm pa koe rhawm maix.” 8 Yawnasan ah nin, “Jhak heue, kieh ax hu tiang mai sawg ka pui an khankix mai jhi tokaux ax ka kix. 9 Phan kix ah yuh nin ka ax, pau tom hoek ex ka pax, khaix an ax tak cung ka dee ot tix mai ax tak ang lai haok sawg ka kix. 10 Phan kix ah nin, haok ka yix heue mai ax tak haok ka kix, mawh kheu Simiang Siyiex tak ap kix ka daux taix ax. Mai an tak mawh mhai rug ka son ax.” 11 Kiex khawm ra jhi tokaux tix ka kru naing pau veng pui Philitix, mai pui Philitix ah nin, “Jhak heue, pui Hebrie hoek khaing daux dee mox kix tix.” 12 Mai kru naing pau veng yo ka Yawnasan mai cao viex kraung naing nawh ah nin, “Haok ka yix heue, yix tak jhi maix yaox tix ceuceu, ” mai Yawnasan ah nin ka cao viex kraung naing tix, “Haok hawt khaix aux, mawh kheu Simiang Siyiex hoik ap kix ka daux taix Isarelax.” 13 Yawnasan mu tix haok mai cao pa viex kraung naing kawx hawt khaix nawh. Pui Philitix hoik goh ka plak sivoe Yawnasan mai cao viex kraung naing pah kix hawt khaix nawh. 14 Haktiex dee pah Yawnasan mai cao viex kraung naing nawh ka pui tixnga kaux, bawg tix koe tix plak e-kax hatiex pon thai ka mawie. 15 Mai krax yaoh yee lih koe ka daux tab, ka daux kaung mai ka sinax pui khankix, kru naing pau veng mai pui naing tud rhim kawx koe krax siyaung, mai haktiex yung yang, krax yaoh yee pa ting lih koe. 16 Pui pau ka yam Sawlux ka Gibat haktiex Binyamin maong ti jhak, jhak heue, pui Philiti hu jee hu blaong tap toi ka paox tix. 17 Mai Sawlux ah nin ka pui pa ot tau mai nawh khankix, “Simin tix yaox ka pui pa hoik hu khaing ex, ” yam hoik simin kix tix yaox pui, jhak heue, Yawnasan mai cao viex kraung naing nawh ang lai koe tan. 18 Mai Sawlux ah nin ka Ahiyax, “Viex teug sijax mukheu Siyiex hoek tin, mawh kheu singaix an, teug sijax mukheu Siyiex koe tau mai pui Isarelax. 19 Yam kawn sikah Sawlux ka cao giex kaing li, lox sinum baox nie lih sinyek ka daux tab Philitix, mai Sawlux ah nin ka cao giex kaing li, “Deeh yoi taix maix.” 20 Sawlux mai pui ot mai nawh khawmuik khrawm paox ti mai hu daux naing, jhak heue, pui Philitix pa giex vaig khankix ra lai pah paox tix, tix kaux lai tix kaux mai krax sivix ting lih tix koe tan. 21 Pui Hebrie pa hoik sax ot mai pui Philitix tom sivoe yam an mai pui pa hu tau mai kix ka daux tab, deeh tieh tix hoek tau mai pui Isarelax pa ot tau mai Sawlux mai Yawnasan. 22 Awm an pui Isarelax pa mox tix ka gawng Epharem mhong ka to pui Philitix mai hawt pheet kix daux naing. 23 Simiang Siyiex deeh taoh ka pui Isarelax ka daux singaix an mai naing tiang tom hoek ka Bietavin. 24 Pui Isarelax hoik kha rhawm tix singaix an, kheu kieh Sawlux pui khankix tiextu ah nin, “Phan pui mawx ih priex sivoe ang nyang hoek plak bo, sivoe ang aux nyang pawk bix ka pui koeng tix kieh pui an pon pa jhax lawg, ” mawh kheu nan, pui khakix tom ang ih priex. 25 Pui khawmuik hoek ka daux tiag ka dee koe rawm hia. 26 Yam laig pui khankix ka daux tiag, jhak heue, rawm hia hoik jauh tix lih, viang mawh nan, ang koe pui teei ka taix mai sau daux jheeh tix, kheu lhat kix ka lox pa tiextu. 27 Viang mawh nan Yawnasan ang nyang mhong ka lox tiextu keeing tix ka pui khankix mai nawh teei khaox gix pa koe ka taix tix cih ka khlawp rawm kaing hia mai teei ka taix sau ka daux jheeh tix, mai ngai nawh riang haing kah. 28 Pui tix kaux ah nin, “Keeing maix hoik yuh krax tiextu pa kied kin ka pui khankix ah nin, kieh krax jhax lawg hoek ka pui pa ih priex ka daux in singaix “Pui khankix kawx hoik peue riang ku kaux. 29 Mai Yawnasan ah nin, “Keeing aux hoik tawx krax pa kha rhawm ka pui haktiex, jhak ti yaox ngai aux hoik riang haing kheu hoik cim aux ka rawm hia in ceeix ngie.” 30 “Phan pui khankix ih ka can pa pon rhim tix khaing pui koeng kix daux in singaix mawh pa kied mhawm miex ding, mawh kheu yam in ex tak pon pah ka pui Philitix tom nie miex ding?” 31 Daux singaix an kix pah ka pui Philitix, jah ka Mikhamat tom hoek Ayalon. Pui khankix hoik kied peue riang, 32 pui ku kaux nied ti hu teei kraung tud rhim tix khankix, pa mawh yung, mawie mai kawn mawie khankix mai pah piang tiex tan mai ih mai nham tau. 33 Mai kix ah nin ka Sawlux, “Jhak heue, pui khankix hoik yuh phimap mai lud ka Simiang Siyiex, kheu hoik ih kix priex tau mai nham, ”Ref 14:33 Jah 9:4; Krub 7:26-27; 17:10-14; 19:26; Pi 12:16, 23; 15:23. mai nawh ah nin, “Pex hoik lud mai ang kaux sijax mai hoek bang lia simaox ting hoek ka aux ka daux singaix.” 34 Sawlux ah nin, “Hu pex ka sinax pui kudah ah nin ka kix, kieh pui ku kaux viex mawie mai yung mai pah khankix tin mai ih paw yuh phimap mai lud ka Simiang Siyiex ka pa ih nex tau mai nham, pui ku kaux tang viex mawie tix hoek daux sawm an mai pah khankix tan. 35 Mai Sawlux sum khu dee tan son Simiang Siyiex, in mawh khu dee tan pa sum nawh bawg tix son Simiang Siyiex. 36 Mai Sawlux ah nin, “Kieh ex lih hu hawt khaix pui Philitix daux ponsawm mai rhim yuh kix laux leeing tom bah riang praix, paw lai kieh ex prah kix tix kaux kawx. Mai kix pawk ah nin, yuh awm pa hoik yaox maix mawh pa mhawm ka maix. Cao giex kaing li ah nin, “Kieh ex greed tix dex Siyiex.” 37 Mai Sawlux chawk cheng ka Siyiex, “Mawh khaw aux lih pheet ka pui Philitix lie? Mawh sang ap Maix kix ka daux taix pui Isarelax lie? mai Nawh Cao ang pawk lox nawh singaix an. 38 Mai Sawlux ah nin, “Pex pa mawh cao kaing pui hun hoek tin, kieh ex tawng mawh pui mawx pa yuh phimap in singaix.” 39 Awm im ju Simiang Siyiex Cao pa taoh ka Isarelax, viang krax lud an koe ka kawn simex aux Yawnasan kawx nawh tak yum tete. Viang mawh nan, khaing daux sinax pui ang koe pui pawk lox nawh tix kaux kawx. 40 Mai Sawlux ah nin ka pui Isarelax khawmuik, “Kieh pex ot tix plak, aux mai kawn simex aux Yawnasan, tak ot tix plak. Pui khankix deeh pawk ah nin ka Sawlux, “Yuh awm pa yaox maix mawh pa mhawm ka maix.” 41 Mawh kheu nan, Sawlux ah nin, Simiang Siyiex, Siyiex pui Isarelax eue, “Jhi daux krax pa khaw ka aux liak, mai nieb caw ka Sawlux mai Yawnasan, viang mawh nan, pui hun khankix klawd cie tix. 42 Sawlux ah nin, “Yuh nieb ka sinax aux mai kawn simex aux Yawnasan, ” mai nieb caw ka Yawnasan. 43 Khaix an Sawlux ah nin ka Yawnasan, “Krai pa hoik yuh maix ka aux.” Yawnasan krai ah nin ka nawh, “Aux cim ti yaox rawm hia kawb mai toh khaox gix pa koe daux taix tix ceeix khaing, son in aux tak kham tix yum ka.” 44 Sawlux ah nin, “Yawnasan eue, phan maix ang yum tete, Siyiex nie lheu yuh pa nie lheu khaing an ka aux.” 45 Pui khankix ah nin ka Sawlux, mawh sang khaw Yawnasan pa hoik yuh bwanson krax taoh pa kied ting ka pui Isarelax tix yum lie? Ang doh khaw ti mawh nan! awm im ju Simiang Siyiex hauk kaing nawh tak ang cod piang tiex tix nyaing kawx, mawh kheu hoik yuh nawh kaing pa kied koe min mai Siyiex tom in singaix. Pui hun khankix deeh taoh Yawnasan mai ang lai yaox ti yum. 46 Sawlux deeh ing khaing pheet ti pui Philitix, mai pui Philitix kawx deeh ing ka dee ot cao tix heue. 47 Yam kwang Sawlux ka pui Isarelax, nawh puing ka pui koeng tix ku sidah, pa mawh pui Mawbax, pui Amon, pui Edom mai simiang Zawba mai pui Philitix, yam veeh simiang tix plak mawx ang ah nie kieh kix som. 48 Mai nawh koe rhawm vao rhawm kwa mai puing ka pui Amaliet mai deeh taoh pui Isarelax khaing taix pui tud rhim ka kix. 49 Kawn simex Sawlux mawh Yawnasan mai Ishavi mai Malakhishua mai kawn bun nawh mawh in, ceu kaux kawn bun liang mawh Merabax, ceu kaux kawn bun iak mawh Mikhalax, 50 Mai ceu kaux moeng Sawlux mawh Ahinawm kawn bun Ahimat. Mai ceu kaux cao kaing naing nawh mawh Abana kawn simex Nerax pa mawh keeing ting Sawlux. 51 Kisha mawh keeing Sawlux mai Nerax mawh keeing Abana kawn simex Abielax. 52 Glang baux im ju Sawlux nawh yaox ti yuh naing tom kin mai pui Philitix, yam yaox Sawlux pui pa ting riang tix kaux kaux, phan ang mawh nan pui vao tix kaux kaux nawh laug ti deuh sonsang shiao cao tix heue.