8
Cum Aliah Mu Tix Mu, Teettawng Aliah Mu
1 Yam paoh Nawh Cao ka cum aliah mu tix mu an, yiien yawg ka daux meung raoma khaix been tix plak nari heue.
2 Aux yaox kawncau Siyiex aliah kaux pa cung ka sivoe Siyiex mai tawx teettawng aliah mu ka kix heue.
3 Kawncau Siyiex tang kaux tix kaux hoek mai cung liep khu dee tan,Ref 8:3 Lih 30:1. pa koe klong khri dee gleeing nyawng bhawng heue. Tawx nyawng bhawng ka nawh tom nie, sonsang baox tiien thie nawh ka bwan pa rawg pui singax singeh khankix, ka piang khu khri dee tan, pa koe sivoe dang ngeung an heue.
4 Taox nyawng bhawng tau mai khawm bwan pa rawg pui singax singeh khankix, haok hu ka sivoe Siyiex khaing daux tawm taix kawncau Siyiex an heue.
5 Kawncau Siyiex an teei klong dee gleeing nyawng bhawng an mai nawh sau ngu tom naog ka klong an khaing khu dee tanRef 8:5 Krub 16:12. mai taing nawh ka piang haktiex Ref 8:5 Yez 10:2. mai lih mawh pa sinum praix mai lox sikah mai pa tuh sah mai pa tok kla reem heue.Ref 8:5 Jhi 11:19; 16:18.
Grawng Teettawng Khankix
6 Kawncau Siyiex aliah kaux pa koe teettawng aliah mu an, cox rien tokaux tix sonsang phlu heue.
7 Yam phlu teettawng phao ka tix kaux, lih mawh pre mai ngu,Ref 8:7 Lih 9:23-25. pa hoik klao tau mai nham mai taing khankix ka piang haktiex mai haktiex loe son tix son gleeing uik mai khaox loe son tix son gleeing uik mai can rib pa klai khawmuik gleeing uik heue.
8 Kawncau Siyiex ra kaux tix kaux phlu teettawng mai teei ceu pa awm gawng ting pa kawn gleeing ka ngu, taing sau daux rawm sigrit sigra mai rawm sigrit sigra loe son tix son lih mawh nham heue.
9 Can ceu pa koe ka daux rawm sigrit sigra loe son tix son yum heue. Reu khankix loe son tix son kawx laux leeing heue.
10 Kawncau Siyiex loe kaux tix kaux phlu teettawng mai simuing pa kied ting tix mu rau khaing raoma,Ref 8:10 Isa 14:12. pa awm rup ngu mai nawh cod ka piang rawm klawng ting khankix loe son tix son mai ka piang rawm keut khankix heue.
11 Ceu kaux simuing an mawh lhax ghin mai rawm loe son tix son lih mawh rawm ghin mai pui yum tom nie kheu rawm khankix, mawh kheu hoik yuh ti kieh kix song heue.
12 Kawncau Siyiex pon kaux tix kaux phlu teettawng mai yuh laux ka singaix loe son tix son mai ka khix loe son tix son mai ka simuing khankix loe son tix son, yuh ka mawx sonsang kieh khankix loe son tix son faik hu,Ref 8:12 Isa 13:10; Yez 32:7; Yol 2:10. son ang singaix jhan riang been singaix loe son tix son mai khawm ponsawm kawx mawh nang nan heue.
13 Aux yaox mai aux mhong pa po klang krih ka sigreung raoma pa ah nin ka lox pa ting pa sinum, “Kix pa ot piang haktiex, tak kha rhawm, tak kha rhawm, tak kha rhawm, kheu lox teettawng kawncau Siyiex loe kaux pa kawn deuk pa dex sang phlu heue.”