1 Kawncau Siyiex phwan kaux tix kaux phlu teettawng mai aux yaox simuing tix mu pa hoik cod ka piang haktiex khaing raoma heue. Tawx jiak saw daux pa ang koe dee die ka nawh heue. 2 Nawh paoh daux pa ang koe dee die an mai taox lih khaing daux an. Awm taox pa lih khaing daux glah ngu pa ting heue. Kheu taox pa lih khaing daux an, singaix mai bhawm tom faik hu heue. 3 Sido khankix lih hu ka piang haktiexRef 9:3 Lih 10:12-15. khaing daux taox ngu an mai hoik tawx sibrawm ka kix awm sibrawm pa koe tamtim ka piang haktiex khankix heue. 4 Hoik tawm lox ka kix son ang kix sang chuh sang yuh laux ka rib haktiex mai ka ceu pa klai tix ceu kawx mai ka khaox tix gawng kawx, viang mawh nan sonsang chuh sang yuh saux ngie ka pui khankix pa ang koe khaix tawk cum Siyiex ka dong re kix heue.Ref 9:4 Yez 9:4. 5 Viang mawh nan ang lai tawx akhwang ka kix sonsang teei pui khankix yum, tawx akhwang sonsang kieh kix kha rhawm been phwan khix khaing heue. Ceu pa kha rhawm kix, awm pa kha rhawm yam heeik tamtim ka pui heue. 6 Ka daux bawg yam singaix an khankix, pui khankix tak sawg tix yum mai pon ang doh lai yaox kah kix simie tix yum kawx krax yum tak to khaing kix heue.Ref 9:6 Job 3:21. 7 Grang pakpeung sido khankix awm brung pa hoik cox rien sonsang yuh naing heue.Ref 9:7 Yol 2:4. Ka piang kaing kix awm pa ceep mhok khri mai plakngai kix awm plakngai kawn pui heue. 8 Kix koe hauk kaing pa awm hauk kaing bun mai rhang kix awm rhang sivai sangsi heue.Ref 9:8 Yol 1:6. 9 Kix koe kraung naing pa tie naok, pa awm kraung naing pa tie naok pa yuh ka rhiem heue. Lox luah pruik kix, awm lox luah ling brungRef 9:9 Yol 2:5. tom nie pa nied ti to hu dee yuh naing heue. 10 Kix koe sidax pa awm sidax tamtim mai nyeeig heue. Kadaux sidax kix khankix, koe sibrawm kix ti chuh ti yuh saux ka kawn pui been phwan khix heue. 11 Kix koe simiang ka piang kix pa mawh kawncau Siyiex daux pa ang koe dee die. Ceu kaux nawh ka daux lox Hebrie mawh Abadon mai ka daux lox Helasax nawh koe ceu kaux Apawlion heue.

12 Pa kha rhawm phao ka tix ceu hoik luan. Jhak heue, tak kawn sang hoek ceu pa kha rhawm ra ceu khaix heue. Teettawng liah mu tix mu kru naing pa hoek khaing plak lih Singaix.

13 Kawncau Siyiex liah kaux tix kaux phlu teettawng mai aux mhong lox pa lih khaing rung pon mu ka khu khri dee tan,Ref 9:13 Lih 30:1-3. pa koe sivoe Siyiex, 14 pa ah nin ka kawncau Siyiex liah kaux tix kaux pa koe teettawng an, “Ploi kawncau Siyiex pon kaux pa hoik phyawk ka rawm klawng ting Yufrethix awx.” 15 Ploi ka kawncau Siyiex pon kaux an, pa hoik cox rien tix son bawg yam nari an mai singaix an mai khix an mai num an, sonsang teei kix yum ka kawn pui loe son tix son heue. 16 Kru naing brug brung khankix koe ra yieh lan heue. Aux hoik mhong grawng koe kix miex kaux heue. 17 Aux yaox brung khankix mai pui pa brug ka piang kix, ka daux riang susai yuh nin, kix pa brug khankix koe kraung naing pa tie naok, pa raoh awm ngu mai pa klai lung awm simaox Jasen mai pa lheung awm mhat heue. Kaing brung khankix awm kaing sivai sangsi mai rao ngu mai taox ngu mai mhat lih khaing daux jheeh kix heue. 18 Kheu preng in loe ceu, pa mawh rao ngu mai taox ngu mai mhat, pa lih khaing daux jheeh kix, teei pui loe son tix son yum ka heue. 19 Grawh grawng nawh sibrawm brung khankix koe ka daux jheeh kix mai ka daux sidax kix, mawh kheu sidax kix awm siuing mai koe kaing heue. Kix teei sidax tix, chuh ti yuh pui saux heue. 20 Kawn pui pa deuk khankix pa ang yum ka preng in loe ceu, ang lai doh keud ka phimap, kaing ceu pa hoik yuh kix ka taix tix, yuh ka mawx son ang kix sang krub ka phicaox mai ka riang grang khankix, pa yuh ka khri mai ka mau mai ka tawng lheung mai ka simaox mai ka khaox, pa mawh pa ang chix yaox, chix mhong mai pa ang chix hu heue.Ref 9:20 Yaog 115:4-7; 135:15-17; Dan 5:4. 21 Kix ang lai doh keud ka phimap, pa teei kix pui yum mai ka pa yuh kix phicaox mai pa ploi sat mai ka ceu pa lud vao kix mai ka ceu pa briex pa lak kix, khankix heue.