7
Grawng Pui Isarelax 144,000
1 Khaix ceu an aux yaox kawncau Siyiex pon kaux cung ka daog haktiex pon daog mai giexRef 7:1 Zak 6:5. ka bhaung haktiex pon mu, yuh ka mawx son ang bhaung sang phlu ka piang haktiex mai ka piang rawm sigrit sigra mai ka piang khaox khankix tix gawng kawx heue.
2 Aux yaox kawncau Siyiex tang kaux tix kaux haok khaing plak lih singaix pa koe cum Siyiex pa im ju mai nawh yo lox ting lox sinum ka kawncau Siyiex pon kaux, pa hoik tawx akhwang ka kix ti sang chuh yuh laux ka haktiex mai ka rawm sigrit sigra,
3 ah nin, “Paw chuh paw yuh laux ka haktiex. Mai ka rawm sigrit sigra mai ka khaox khankix, ka ang ex nyang bax tawk cum ka dong re siliex Siyiex ex khankix heue.”Ref 7:3 Yez 9:4.
4 Aux mhong hoik koe kix miex kaux pa hoik tawk cum kah, ka daux ceu pui Isarelax khawmuik koe tix sien, pon mheen mai pon rheng heue.
5 Ka daux ceu Yudax hoik tawk cum ka tix mheen mai ra rheng. Ka daux ceu Ruben tix mheen mai ra rheng. Ka daux ceu Gat tix mheen mai ra rheng.
6 Ka daux ceu Asax tix mheen mai ra rheng. Ka daux ceu Napthalix tix mheen mai ra rheng. Ka daux ceu Manashe tix mheen mai ra rheng.
7 Ka daux ceu Simeon tix mheen mai ra rheng. Ka daux ceu Lewix tix mheen mai ra rheng. Ka daux ceu Issakha tix mheen mai ra rheng.
8 Ka daux ceu Zebulun tix mheen mai ra rheng. Ka daux ceu Yosiep tix mheen mai ra rheng. Kadaux ceu Benyamin hoik tawk cum ka tix mheen mai ra rheng heue.
Cub Pui Hun
9 Khaix ceu an khankix aux jhak mai yaox, pui pa kied haoh kied hun, pa ang pui tix kaux kawx pon ti simin ka, khaing pui meung ku meung mai khaing ceu pui kuceu mai khaing pui pa tang lox sikah kuceu, pa hoik ceep ka kraung paing mai giex ka lhax khaox jhie yaong ka daux tawm taix kix mai cung ka sivoe dang ngeung an mai ka sivoe kawn Yung heue.
10 Kix yo lox ting lox sinum ah nin, “Kieh Siyiex ex pa ngawm ka piang dang ngeung mai kawn Yung koe pa taoh liak.”
11 Kawncau Siyiex khawmuik pa cung ka vung vieang dang ngeung mai kuad song khankix mai totiag pa im ju pon mu an, goh gup ka sivoe dang ngeung mai krub ka Siyiex,
12 ah nin, “Amen. Kieh Siyiex ex koe bwanson mai min pakngai mai pingnya cuyi mai pa yaogyaw bwanson mai pa yung pa yi mai sibrawm mai riang rao, ku ju leeing ju liak. Amen.”
13 Kuad song khankix tix kaux chawk ah nin ka aux, “Pui inkix pa ceep kraung paing, mawh pa yuh ka mawx mai kix kaoh khaing dee mawx?”
14 Aux deeh ah nin ka nawh, “Simiang aux eue, Maix tawng heue.” Nawh baox ah nin ka aux, “Pui inkix mawh kix pa hoik daoh khaing daux krax kha rhawm pa ting anRef 7:14 Dan 12:1; Mat 24:21; Mak 13:19. mai kix hoik sigrhah kraung ceep kix mai kieh paing ka daux nham kawn Yung heue.
15 Mawh kheu nan kix tom yaox ti ot ka sivoe dang ngeung Siyiex, kix yuh kaing krub ka Nawh Cao ka daux nyiex bwan Nawh ku singaix heue. Kaw pa ngawm ka piang dang ngeung, tak sang lhop nyiex gox bwan man ka piang kix heue.
16 Kix tak ang baox lai deeh cai rhawm khaix, mai tak ang baox lai deeh sang nyaux nie rawm khaix. Viang singaix tak ang jhan ka piang kix mai kix tak ang yaox ti kham ceu pa hax pa siaoh tix ceu kawx heue.Ref 7:16 Isa 49:10.
17 Grawh grawng nawh Kawn Yung pa ot ka sigreung dang ngeung tak mawh cao liang kix Ref 7:17 Yaog 23:1; Yez 34:23.mai thong kix hu ka rawm keut dee lih rawm im ju heue. Ref 7:17 Yaog 23:2; Isa 49:10.Siyiex tak sang awt rawm ngai kix khawmuik khaing ngai kix heue.”Ref 7:17 Isa 25:8.