6
Grawng Paoh Ka Cum Phao Ka
1 Aux yaox yam paoh kawn Yung cum tix mu ka daux cum aliah mu an mai aux mhong totiag tix mu, ka daux totiag pa im ju pon mu an, ah nin ka lox pa awm lox sinum praix, “Hoek heue.”
2 Aux jhak mai yaox brung paing tix mu Ref 6:2 Zak 1:8; 6:3.mai kaw pa ngawm ka piang brung an giex ak poh tix mu mai teei ti tawx mhok khri ka nawh mai nawh pex mai lih hu ti pex heue.
Ra Mu Tix Mu Cum Naing Sivai
3 Yam paoh Nawh Cao ka cum ra mu tix mu an, aux mhong lox totiag pa im ju ra mu tix mu ah nin, “Hoek heue.”
4 Brung tang mu tix mu, pa mawh brung raoh lih huRef 6:4 Zak 1:8; 6:2. mai ka kaw pa ngawm ka piang brung an hoik tawx ti kieh nawh teei krax nhim khaing haktiex, yuh ka mawx sonsang pah pui yum ka paox tix mai teei ti tawx vaig ting tix kre ka nawh heue.
Loe Mu Tix Mu Cum Sibhawm Praix
5 Yam paoh Nawh Cao ka cum loe mu tix mu an, aux mhong lox totiag pa im ju loe mu tix mu ah nin, “Hoek heue.” Aux jhak mai yaox brung lung tix mu heue.Ref 6:5 Zak 6:2, 6. kaw pa ngawm ka piang brung an koe jiang ka daux tawm taix nawh tix mu heue.
6 Aux mhong awm mawh lox ka sigreung totiag pa im ju pon mu an ah nin, “Denari tix plah pon gaox nghox ca tix tang mai denari tix plah pon gaox nghox ca lang sidax loe diag mai maix paw chuh yuh laux ka rawm bee mai ka rawm plix siiet heue.”
Pon Mu Tix Mu Cum Krax Yum
7 Yam paoh Nawh Cao ka cum pon mu tix mu an, aux mhong lox totiag pa im ju pon mu tix mu ah nin, “Hoek heue.”
8 Aux jhak mai yaox brung pau tix mu mai ceu kaux kaw pa ngawm ka piang brung an, mawh pa yum mai meung yum hawt hu tau mai nawh heue. Hoik tawx sibrawm ka kix ting piang haktiex pon son tix son, sonsang teei yum ka vaig mai ka sibhawm praix mai ka krax yum mai ka totiag haktiex khankix heue.Ref 6:8 Ye 15:3; Yez 5:12, 17; 14:21
Phwan Mu Tix Mu Tawx Ju Son Gumlox Siyiex
9 Yam paoh Nawh Cao ka cum phwan mu tix mu an, aux yaox ju kix pa hoik teei yum kheu gumlox Siyiex mai kheu sakse pa kham kix, ka greem khu dee tan heue.
10 Kix kok yo lox pa ting pa sinum, ah nin, “Simiang pa giex kaing, pa singax singeh, pa mawh meh eue, Maix tak ang prawng ciyang mai ang pawk bix ka son nham ex, ka kix pa ot ka piang haktiex khankix miex grheung.
11 Teei ti tawx kraung ceep pa paing ka kix ku kaux heue. Hoik krai ka kix, grawng tak sang baox laux lee kix son bawg yam ceeix ceeix, tom paox siliex kix mai puxaik kix khankix, pa tak sang teei yum, awm nang pa hoik teei kix yum khankix tak sang grum naog ka heue.
Cum Liah, Pa Lhat Bawg Yam Ciyang
12 Aux yaox yam paoh Nawh Cao ka cum liah mu tix mu an mai lih tok kla reem tingRef 6:12 Jhi 11:13; 16:18. mai singaix lih lung awm man pa taing ka hauk mai khix khawm mu lih mawh awm nham heue.
13 Simuing raoma khankix cod ka piang haktiex,Ref 6:12-13 Isa 13:10; Yez 32:7; Yol 2:31; Mat 24:29; Mak 13:24-25; Luk 21:25. awm khaox ruh kieh plix pa ang nyang teem cia yam vuh vied bhaung ting ka nawh heue.
14 Teei ti gah raoma hu, awm yam pua ka lai Ref 6:13-14 Isa 34:4.mai gah gawng ku gawng mai klawn tiex ku klawn khaing dee koe kix heue.Ref 6:14 Jhi 16:20.
15 Simiang haktiex khankix mai pui ting khankix mai cao giex kaing naing pa ting khankix mai pui mi pui koe khankix mai pui ting riang ting rao khankix mai siliex ku kaux mai pui ploi ku kaux, mox tokaux kix ka daux daux rang mai ka rang pa koe ka gawng khankix heue.Ref 6:15 Isa 2:10.
16 Kix ah nin ka gawng mai ka rang khankix, “Grhup ka piang ex mai mox ex Ref 6:16 Ho 10:8; Luk 23:30. khaing pakngai Kaw pa ngawm ka piang dang ngeung an mai khaing pa song rhawm song rhi kawn Yung liak.”
17 Grawh grawng nawh singaix pa ting pa song rhawm kiex hoik hoek. Pui mawx pon ti cung ka? Ref 6:16 Ho 10:8; Luk 23:30.