5
Phuk Lai Mai Kawn Yung
1 Mai aux yaox phuk lai pa hoik tiiem lai plak daux mai plak khaix ka daux taix khawn dawm kaw pa ngawm ka piang dang ngeung anRef 5:1 Yez 2:9-10. mai pa hoik tawk ti nyeep ka cum aliah mu heue.
2 Aux yaox kawncau Siyiex pa ting riang tix kaux, pa ah nin ka lox pa ting pa sinum, “Mawh mawx pa keung ti paoh ka phuk lai an mai teei ti tik ka cum nawh khankix?”
3 Pui pa pon ti paoh ka lai an ang ah, pa pon ti jhak ang ah, ang lai koe ka daux meung raoma, ka piang haktiex, mai ka greem haktiex tix kaux kawx heue.
4 Mawh kheu ang lai yaox kaw pa keung ti paoh ka phuk lai an, phan ang mawh nan pa keung ti jhak ka, tix kaux kawx, aux tom yiiem tom nie heue.
5 Kuad song tix kaux ah nin ka aux, “Paw vi yiiem, jhak heue, sivai sangsi pa mawh khaing daux ru ceu Yudax,Ref 5:5 Jah 49:9-10. pa mawh Riah Davit,Ref 5:5 Isa 11:1. hoik pex ti paoh ka phuk lai an mai ka cum nawh aliah mu an heue.”
6 Ka sigreung dang ngeung an mai ka sigreung totiag pa im ju pon mu an mai ka sigreung kuad song khankix, aux yaox cung kawn Yung tix mu, awm pa hoik phah yum kah,Ref 5:6 Isa 53:7. pa koe rung aliah mu mai ngai aliah mu, Ref 5:6 Zak 4:10.pa mawh Khwan Siyiex aliah mu, pa ploi hu ka piang haktiex khawmuik heue.
7 Nawh hoek mai teei phuk lai an khaing daux tawm taix khawn dawm kaw pa ngawm ka piang dang ngeung an heue.
8 Khaix hoik teei Nawh ka phuk lai an, totiag pa im ju pon mu an mai kuad song tixnga pon kaux an khankix, goh gup ka sivoe kawn Yung an heue. Kix ku kaux koe ting vawk mai klong khri pa naog ka nyawng bhawng pa mawh bwan ceu pa rawg pui pa singax singeh khankix heue.Ref 5:8 Yaog 141:2.
9 Kix rhax lox rhax pa khraox, pa ah nin, “Maix mawh pa keung ti teei ka phuk lai an mai pa keung tix paoh ka cum nawh khankix, mawh kheu hoik pah Maix yum mai kheu hoik teei nham tokaux Maix teei ti tawx ex, pa mawh ceu pui kuceu mai pa mawh pa tang lox sikah kuceu mai pa mawh pui kuceu mai pa mawh pui meung ku meung son Siyiex,
10 mai hoik yuh ti kieh kix mawh simiang mai cao giex kaing li ka Siyiex exRef 5:10 Lih 19:6; Jhi 1:6. mai kix giex kaing ka piang haktiex heue.”
11 Aux yaox mai aux mhong lox kawncau Siyiex pa haoh hun vung viang dang ngeung an mai totiag pa im ju khankix mai kuad song khankix mai kix koe tix mheen, tix mheen bawg mai kaing rheng bawg kaing rheng heue.Ref 5:11 Dan 7:10.
12 Mai kix ah lox pa ting pa sinum ah nin, “Kawn yung pa hoik pah yum an mawh pa keung ti pon sibrawm mai sinngao mai pingnya cuyi mai riang rao mai pa yung pa yi mai min pakngai mai bwanson heue.”
13 Can pa hoik phan hoik yuh kuceu, pa koe ka daux meung raoma mai ka piang haktiex mai ka greem haktiex mai ka piang rawm sigrit sigra mai aux mhong can pa koe ka daux khankix khawmuik ah nin, “Ka kaw pa ngawm ka piang dang ngeung mai ka kawn Yung, kieh koe bwanson mai pa yungyi mai min pakngai ku ju leeing ju liak.”
14 Totiag pa im ju pon mu an kawx, ah “Amen.” kuad song khankix goh gup mai krub ka heue.