2
Lai Tawx Ka Ceucao Efesux
1 “Tiiem ka kawncau Siyiex ceucao pa koe ka daux veng Efesux yuh nin, ceu in khankix mawh pa ah kaw pa giex simuing aliah mu ka daux taix khawn dawm Nawh mai pa hu lailing ka sigreung jawk ten khri aliah mu.
2 Aux tawng grawng krax twah krax klaung maix mai kaing pa nyhap pa mao mai pa gun pa yeung maix mai grawng pa ang maix pon kham ka pui caox mai grawng pa hoik cheu ti yaox ka kix pa dhua tokaux kix mawh kawncau pa ting, pa ang tie mawh mai hoik yaox grawng mawh kix pa pie lhen.
3 Maix hoik gun yeung mai hoik kham geu son ceu kaux Aux mai ang laux rhawm kah heue.
4 Viang mawh kawx nan Aux koe ceu pa deuh phimap ka piang maix, mawh kheu hoik grham maix ka krax moh awm pa moh phao ka heue.
5 Mawh kheu nan doh keud khaing dee hoik rau maix mai doh keud ka phimap tix mai twah klaung ka ceu pa twah pa klaung phao ka, phan ang mawh nan Aux tak hoek ka maix mai gah jawk ten maix khaing dee ot nawh, phan maix ang doh keud ka phimap tix heue.
6 Awm koeng maix ka krax twah krax klaung pa mawh pui Nikawlax khankix, Aux kawx koeng kah heue.
7 Kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, Aux tak tawx nawh ih khaing khaox im ju,Ref 2:7 Jah 2:9; Jhi 22:2. pa koe ka daux Paradisux Siyiex heue.
Lai Tawx Ka Ceucao Sameunax
8 “Tiiem ka kawncau Siyiex ceucao pa koe ka daux veng Sameunax yuh nin, ceu in khankix mawh pa ah Cao pa jah mai pa ghoik khaix,Ref 2:8 Isa 44:6; 48:12; Jhi 1:17; 22:13. kaw pa hoik yum mai pa im ju.
9 Aux tawng grawng krax kha rhawm maix mai pa hot pa sibhawm maix, viang mawh nan maix mawh pa mi pa koe mai grawng pa salao kix pa dhua kix mawh pui Yudax mai kix ang tie mawh, viang mawh nan mawh nyiex sidiex Satan heue.
10 Paw vi lhat ka ceu pa dex sang yaox maix ti kham geu khankix. Jhak heue, phicaox dex teei ti sau pex tiblah ka daux thawng, sonsang cheu ti yaox pex, mai pex tak sang koe krax kha rhawm been kao ngaix heue. Kieh maix kaux sijax tom yum, mai Aux tak sang tawx mhok khri pa im ju ka maix heue.
11 kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, krax yum ra bawg tix bawg tak ang pon ti kieh nawh saux heue.Ref 2:11 Jhi 20:14; 21:8.
Lai Tawx Ka Ceucao Perakam
12 “Tiiem ka kawncau Siyiex ceucao pa koe ka daux veng Perakam yuh nin, ceu in khankix mawh pa ah kaw pa koe vaig lawm pa lawm khawm ra plak.
13 Aux tawng dee ot maix pa mawh dee koe dang ngeung Satan mai maix ca giex tom kaux cong ka ceu kaux Aux mai ang lai thiang ti tik ka krax yum rhawm Aux, viang ka daux bawg yam singaix Antipax, pa mawh cao pa kham mhai ruk cie Aux mai pa mawh kaw pa kaux sijax cie Aux, pa hoik teei yum ka sinax pex, dee ot Satan heue.
14 Viang mawh nan Aux koe ceu pa deuh phimap ka maix ceeix, mawh kheu koe pui maix tan tiblah pa giex been gau Balam, kaw pa hoik gau ka Balak pa taing ceu pa sideeing sivoe kawn praix Isarelax, sonsang ih ceu pa hoik tan ka riang grang khankix mai sonsang lud vao heue.Ref 2:14 Si 25:1-3; 31:16.
15 Awm an maix koe nang tiblah pa giex ka been pa gau pui Nikawlax khankix heue.
16 Mawh kheu nan doh keud ka phimap tix, phan ang mawh nan Aux tak khran hoek ka maix mai teei vaig pa koe ka daux jheeh Aux mai yuh naing ka kix heue.
17 Kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, Aux tak tawx nawh mannax pa hoik mox anRef 2:17 Lih 16:14-15. mai Aux tak tawx nawh simaox paing tix lon mai ka piang simaox an hoik tiiem ceu kaux pa khraox, pa ang pui tawng tix kaux kawx, lheu khaing kaw pa pon simaox an heue.
Lai Tawx Ka Ceucao Swatirax
18 “Tiiem ka kawncau Siyiex ceucao pa koe ka daux veng Swatirax yuh nin, ceu in khankix mawh pa ah kawn Siyiex, ngai Nawh awm rao ngu mai caong Nawh awm tawng lheung mhawm.
19 Aux tawng grawng krax twah krax klaung maix mai krax moh krax rhawm maix mai krax yum rhawm mai pa yuh kaing cau kaing soi mai pa gun yeung mai grawng krax twah klaung maix phao khaix, mawh pa nie lheu khaing krax twah krax klaung phao ka heue.
20 Viang mawh kawx nan Aux koe ceu pa deuh phimap ka piang maix, mawh kheu khaw maix paox tix ka bun Yezabelax,Ref 2:20 1Sim 16:31; 2Sim 9:22, 30. pa dhua tokaux tix mawh yiex jhai mai nawh gau mai jeeh nyaw ka siliex Aux khankix sonsang lud vao mai sonsang ih ka ceu pa hoik tan lu ka riang grang heue.
21 Aux hoik tawx bawg yam ka kiex, sonsang doh keud kiex ka phimap tix mai ang kiex koe rhawm ti sang doh keud ka pa lud vao tix heue.
22 Jhak heue, Aux taing kiex ka dee it mai kix pa lud vao mai kiex, Aux taing ka daux dee kha rhawm pa ting, phan kix ang doh keud ka jhawm yuh kiex khankix heue.
23 Aux tak teei kawn praix kiex yum ka krax yum mai ceucao khawmuik tak tawng grawng mawh Aux kaw pa sawg liiem plak daux pui khawmuik mai daux rhawm rhi Ref 2:23 Yaog 7:9; Ye 17:10.mai Aux tak sang tawx pex kaux pui mawx kaux pui an, awm pa khaw mai krax pa twah klaung tix heue.Ref 2:23 Yaog 62:12.
24 Viang mawh nan Aux ah nin ka pex, pa deuk khankix ka daux veng Swatirax, can pa ang lai tawng ka lox pa gau in mai pa ang tawng ka ceu pa miag kix tix kok mawh, pa raux Satan heue. Ang Aux lai baox sau beeh sau glawm tang ceu ka piang pex heue.
25 Viang mawh kawx nan can pa hoik koe pex, giex tom cong tom hoek Aux ka pex heue.
26 Ka kaw pa hoik pex mai ka kaw pa priex ti hawt krax twah krax klaung Aux tom sidah, Aux tak tawx sibrawm ka piang ceu pui khawmuik ka nawh,
27 mai nawh tak sang kwang sang giex kaing kix ka khaox gix rhiem, awm pah ka aw tiex cie cao pa yuh aw khankix max phawng vid heue.Ref 2:27 Yaog 2:8,9. Awm Aux kawx hoik pon khaing Keeing Aux heue.
28 Aux tak tawx simuing griang ka nawh heue.
29 Kaw pa koe yhaok kieh nawh mhong ceu pa krai Khwan Cao ka ceucao khankix awx.”