LAI PA PLAK JHI KIEH YOAX
(Revelation)
1
Lox Jah Mai Lox Nawb
1 Ceu pa plak jhi Yesux Khrit, pa hoik tawx Simiang Siyiex ka Nawh Cao sonsang jhi ka siliex Nawh khankix pa mawh ceu pa tak sang khran hoek ti mawh khankix. Nawh Cao ploi kawncau Siyiex cie tix ti teei mhai mai plak jhi ka siliex Nawh Yohan,
2 pa kham mhai ruk ka grawng gumlox Siyiex mai grawng mhai ruk Yesux Khrit, awm can pa hoik yaox nawh khawmuik heue.
3 Mawh kheu bawg yam dex sang hoek, kaw pa phat mai kix pa mhong gumlox jhai in khankix mai priex ti hawt ceu pa hoik tiiem ti deuh ka daux in khankix, ting bwanson heue.
Lox Nawb Ka Ceucao Aliah Mu
4 Yohan tawx ka ceucao aliah mu pa koe ka daux meung Asix, kieh pex koe bwanson mai pa nhim pa kaoh khaing Nawh Cao, pa mawh yam in mai pa hoik mawh mai pa tak sang hoek tix mawh Ref 1:4 Lih 3:14. mai khaing Khwan aliah mu pa ot sivoe dang ngeung Nawh Cao,Ref 1:4 Jhi 4:5.
5 mai khaing Yesux Khrit pa mawh cao pa kham mhai ruk pa kaux sijax, pa mawh pa liang ti keh khaing pa yum mai pa mawh cao pa giex kaing piang simiang haktiex khankix liak.Ref 1:5 Yaog 89:27. Kaw pa hoik moh ka ex mai pa hoik ploi ex khaing phimap ex ka daux nham tix,
6 mai hoik yuh tix kieh ex mawh simiang mai cao giex kaing li ka Siyiex mai Keeing Nawh,Ref 1:6 Lih 19:6; Jhi 5:10. kieh Nawh koe min plakngai mai sibrawm ku ju leeing ju liak. Amen.
7 Jhak heue, Nawh Cao tak hoek tau mai paiawm khankix Ref 1:7 Dan 7:13; Mat 24:30; Mak 13:26; Luk 21:27; 1The 4:17. mai ngai ku ngai tak sang yaox Nawh,Ref 1:7 Zak 12:10; Yo 19:34, 37. khawm kix pa hoik suat ka Nawh Cao mai ceu pui haktiex khawmuik tak sang yiiem riag yiiem yo kheu Nawh heue.Ref 1:7 Zak 12:10-14; Mat 24:30. Tak sang mawh nan heue. Amen.
8 “Aux mawh Alaphax mai Omegax”Ref 1:8 Jhi 22:13. Simiang Siyiex, kaw pa mawh yam in mai pa hoik mawh mai pa tak sang hoek tix mawh,Ref 1:8 Lih 3:14. pa mawh cao pa ting sibrawm piang khawmuik, ah nan heue.
Riang Susai Cao Khrit
9 Aux pa mawh Yohan, puxaik pex, mai paox pa rom tix neuex ka daux pa kha rhawm mai Meung, mai pa gun yeung ka daux Yesux Khrit, yaox ti ot ka klawn tiex pa kok mawh Patmox, kheu gumlox Siyiex mai grawng mhai ruk Yesux heue.
10 Daux singaix twah Simiang Siyiex, aux ot ka daux Khwan Cao mai aux mhong lox pa ting pa luah khaix aux, pa awm lox teettawng,
11 pa ah nin, “Tiiem ceu pa yaox maix ka daux phuk lai mai sipaox ka ceucao aliah mu, pa koe ka daux veng Efesux mai ka daux veng Sameunax mai ka daux veng Perakam mai ka daux veng Swatirax mai ka daux veng Sadix mai ka daux veng Filadelfia mai ka daux veng Lawdikix khankix awx.”
12 Khaix an, aux gi sonsang yaox mawh lox pa yuh ka mawx pa sikah mai aux. Aux yaox jawk ten khri aliah mu yam gi ti jhak,
13 mai ka sigreung jawk ten an khankix, pa awm kawn kawn pui tix kaux,Ref 1:13 Dan 7:13.pa ceep kraung dha pa hoek tom sidaing caong mai pa nhawt maox rawd khri ka see piang teeh heue.Ref 1:13 Dan 10:5.
14 Kaing Nawh mai hauk kaing Nawh paing awm hauk yung Ref 1:14 Dan 7:9. awm rawm rha heue. Ngai Nawh awm rao ngu heue.
15 Caong Nawh awm tawng lheung pa mhawmRef 1:14-15 Dan 10:6. pa hoik thi ka daux daux glah ngu heue. Lox Nawh awm lox rawm tom nie heue.Ref 1:15 Yez 1:24.
16 Ka daux taix khawn dawm Nawh, giex simuing aliah mu mai khaing ka daux jheeh Nawh lih vaig lawm pa lawm khawm ra plak mai pakngai Nawh awm yam sinied singaix ti jhan riang heue.
17 Yam yaox aux Nawh, aux goh liep caong Nawh, awm pa hoik yum heue. Nawh Cao deuh taix khawn dawm Nawh ka piang aux ah nin, “Paw vi lhat! Aux mawh pa jah mai pa ghoik khaix,Ref 1:17 Isa 44:6; 48:12; Jhi 2:8; 22:13.
18 mai kaw pa im ju heue. Aux hoik yum, mai jhak heue, Aux ca im ku ju leeing ju mai Aux koe jiak saw pa yum mai meung yum heue.
19 Mawh kheu nan tiiem ceu pa hoik yaox maix khankix mai ceu pa mawh yam in khankix mai ceu pa tak sang hoek tix mawh khaix khankix awx.
20 Ceu pa raux pa mox grawng simuing aliah mu pa hoik yaox maix ka daux taix khawn dawm Aux mai jawk ten khri aliah mu an khankix mawh nin, simuing aliah mu khankix mawh kawncau Siyiex ceucao aliah mu, mai jawk ten khankix mawh ceucao aliah mu an heue.”