3
Lai Tawx Ka Ceucao Sadix
1 “Tiem ka kawncau Siyiex ceucao pa koe ka daux veng Sadix yuh nin, ceu in khankix mawh pa ah kaw pa koe Khwan Siyiex aliah mu mai simuing aliah mu. Aux tawng grawng krax twah krax klaung maix, grawh grawng pa koe maix ceu kaux pa im maix, viang mawh nan maix hoik yum heue.
2 Maix pau ti jhak mai kieh ceu pa kawn deuk pa dex sang yum khankix kaux cong ka awx. Grawh grawng nawh ang Aux yaox krax twah krax klaung maix pa hoik grum naog ka sivoe Siyiex Aux heue.
3 Mawh kheu nan doh keud ka ceu pa hoik pon hoik mhong maix mai priex ti hawt mai doh keud ka phimap tix awx. Mawh kheu nan phan maix ang pau ti jhak, Aux tak hoek awm pui briex mai maix tak ang tawng bawg yam nari pa sang hoek Aux ka maix heue.Ref 3:3 Mat 24:43-44; Luk 12:39-40; Jhi 16:15
4 Viang mawh kawx nan maix koe ceu kaux ka daux veng Sadix ceeix ceeix, pa ang lai kieh kraung ceep kix seeing brai ka mai kheu mawh kix pa keung, kix tak sang yaox ti ceep kraung paing mai hu lailing tau mai Aux heue.
5 Ka kaw pa pex tak sang kieh ceep ka kraung paing yuh nin heue. Aux tak ang doh preet ti tik ceu kaux nawh khaing phuk lai pa im ju,Ref 3:5 Lih 32:32-33; Yaog 69:28; Jhi 20:12. Aux tak sang kham grawng ceu kaux nawh sivoe Keeing Aux mai sivoe kawncau Siyiex cie Nawh khankix heue.Ref 3:5 Mat 10:32; Luk 12:8.
6 Kaw pa koe yhaok kieh nawh mhong ceu pa krai Khwan Cao ka ceucao khankix awx.
Lai Tawx Ka Ceucao Filadelfia
7 “Tiiem ka kawncau Siyiex ceucao pa koe ka daux veng Filadelfia yuh nin, ceu in khankix mawh pa ah kaw pa singax singeh, kaw pa mawh pa mawh pa meh, kaw pa koe jiak saw Davit, kaw pa paoh mai tix kaux kawx tak ang pon ti nyeep ka mai pa nyeep mai patix kaux kawx tak ang pon ti paoh kah.Ref 3:7 Isa 22:22.
8 Aux tawng grawng krax twah krax klaung maix, jhak heue, Aux hoik paoh ti deuh siviex sivoe maix pa ang pui tix kaux kawx pon ti nyeep ka, grawh grawng pa koe maix sibrawm ceeix ceeix mai hoik priex ti hawt gumlox Aux mai ang thiang ti tik ka ceu kaux Aux heue.
9 Jhak heue, Aux tak kieh kix pa neuex ka nyiex sidiex Satan tiblah, kix pa dhua kix mawh pui Yudax mai kix ang tie mawh, viang mawh nan pa nieb pie lhen. Jhak heue, Aux tak kieh kix hoek ti krub ka sivoe caong maixRef 3:9 Isa 60:14. mai tawng grawng pa moh Aux ka maix heue.
10 Mawh kheu hoik priex maix ti hawt gumlox pa dex mai pa gun pa yeung Aux, viang Aux kawx tak sang priex maix khaing bawg yam nari pa cheuk cheu ti yaox an, pa tak sang hoek ka piang haktiex khawmuik, sonsang cheuk cheu ti yaox ka kix pa ot ka piang haktiex heue.
11 Aux tak khran hoek heue. Giex tom kaux tom cong ka ceu pa hoik koe maix, yuh ka mawx son ang pui tix kaux kawx sang teei mhok khri maix heue.
12 Ka kaw pa pex, Aux tak kieh nawh mawh rong ka daux nyiex bwan Siyiex Aux mai nawh tak ang baox deeh lih khaing tan tix bawg kawx heue. Aux tak tiiem ceu kaux Siyiex Aux mai ceu kaux veng Siyiex Aux, pa mawh veng Yerusaliem pa khraox, pa lih hoek khaing daux meung raoma, khaing Siyiex Aux Ref 3:12 Jhi 21:2.mai ceu kaux pa khraox cie Aux, ka piang nawh heue.
13 Kaw pa koe yhaok kieh nawh mhong ceu pa krai Khwan Cao ka ceucao khankix awx.
Lai Tawx Ka Ceucao Lawdikix
14 “Tiiem ka kawncau Siyiex ceucao pa koe ka daux veng Lawdikix, yuh nin, ceu in khankix mawh pa ah Cao Amen. Pa mawh cao pa kham mhai ruk pa kaux sijax mai pa mawh pa meh, pa mawh pa liang ka daux ceu pa hoik phan hoik yuh Siyiex.Ref 3:14 Kab 8:22.
15 Aux tawng grawng krax twah krax klaung maix, grawh grawng pa ang maix tie sikiied tie hax. Aux simie ti kieh maix mawh pa sikiied phan ang mawh nan pa hax heue.
16 Mawh kheu mawh maix pa siu ngie ceeix ceeix khaing mai pa ang tie hax tie sikiied, Aux tak peh ti tik maix khaing daux jheeh Aux heue.
17 Mawh kheu ah maix, “Aux mawh pa mi pa koe mai hoik koe sinngao mai ang lai baox lo tidtix.” Ang tawng grawng pa mawh maix kaw pa kha rhawm mai pa khaw ti caux rhawm ka mai pa hot pa sibhawm mai pa dug ngai mai pa kakaong heue.
18 Aux nhie maix liag khri pa hoik thi ka daux ngu, sonsang lih mawh maix pa mi pa koe mai ka kraung ceep pa paing sonsang ceep ka tokaux tix, son tak ang ceu pa kaig pa tua pa kakaong maix sidawng mai ka sidah kraix ngai, ti sang kraix ka ngai maix, sonsang chix yaox maix ka heue.
19 Ka can kix pa moh Aux ka, Aux ah ka mai sivied ti gau ka heue.Ref 3:19 Kab 3:12. Mawh kheu nan nied ti coca mai doh keud ka phimap tix awx.
20 Jhak heue, Aux cung ka sivoe siviex mai gleuh ka heue. Phan pui tix kaux kaux mhong lox Aux mai paoh siviex, Aux tak laig ka dee ot nawh mai Aux tak sawm rheep tau mai nawh mai nawh tak sawm rheep tau mai Aux heue.
21 Ka kaw pa pex, Aux tak tawx ti kieh nawh ngawm tau mai Aux ka piang dang ngeung Aux, awm Aux kawx hoik pex mai ngawm tau mai Keeing Aux ka piang dang ngeung Nawh heue.
22 kaw pa koe yhaok kieh nawh mhong ceu pa krai Khwan Cao ka ceucao khankix awx.”