18
Grawng Grhup Veng Babulon
1 Khaix ceu an khankix, aux yaox kawncau Siyiex tang kaux tix kaux lih hoek khaing daux raoma, pa koe sibrawm pa ting mai haktiex riang kheu min plakngai nawh heue.
2 Nawh kok lox pa ting pa sinum, ah nin, “Veng Babulon pa ting hoik grhup, maix hoik grhup.Ref 18:2 Isa 21:9. Mai hoik lih mawh dee ot phicaox khankix mai dee laung khwan pa ang singax kuceu mai dee laung sim pa seeing brai mai pa khaw tix koeng ka kuceu heue.Ref 18:2 Isa 13:21; Ye 50:39.
3 Grawh grawng nawh ceu pui khawmuik hoik goh, kheu plai plix siiet ceu pa lud vao nawh heue.Ref 18:3 Ye 51:7. Simiang haktiex khankix hoik lud vao mai nawh, cao lai geu haktiex khankix hoik mi koe, kheu sibrawm ceu pa cha nie luan nawh heue.”
4 Aux mhong lox khaing raoma pa ah nin, “Pui Aux khankix eue, lih hu khaing daux nawh,Ref 18:4 Isa 48:20; Ye 50:8. yuh ka mawx son ang pex yuh paox pie tau mai phimap nawh khankix, son ang pex pon ka preng nawh khankix heue.
5 Grawh grawng nawh phimap nawh khankix hoik hoek tom ka raoma, Ref 18:5 Ye 51:9. Siyiex hoik doh keud ka ceu pa lud nawh heue.
6 Deeh viied ka nawh awm pa hoik tawx nawh Ref 18:6 Yaog 137:8; Ye 50:29.mai deeh tawx ka nawh ra son, ka son ceu pa hoik yuh nawh heue. Ka daux kawk pa hoik klao nawh, klao ka son nawh ra son heue.
7 Nawh hoik yaw tokaux tix, hoik cha nie luan yuh mai ah nin, tawx krax tug kha mai krax khi rhawm daux aux awx awx. Nawh hoik ah nin ka daux rhawm tix, aux ngawm ti mawh laux simiang, ang aux mawh miexmai mai aux ang doh chix yaox krax khi rhawm heue.
8 Mawh kheu nan ka daux tix singaix neh,Ref 18:7-8 Isa 47:8,9. preng ceu in khankix tak hoek ka piang nawh, pa mawh krax yum mai pa khi rhawm mai pa sibhawm mai tak sang gleeing nawh ka ngu paklawg heue. Grawh grawng nawh Siyiex, pa prawng pa ciyang ka nawh ting riang ting rao heue.
9 Simiang haktiex khankix pa hoik lud vao mai pa hoik cha nie luan ot mai nawh, tak sang yiiem grai mai yiiem riag yo son nawh, yam jhak kix ka taox pa gleeing nawh.
10 Kix tak sang cung dee singai kheu lhat ka krax tug kha nawh ah nin, Eue, eue, veng Babulon pa ting, veng pa ting riang rao eue, ka daux dom tix nari neh, krax prawng ciyang ka maix hoik hoek heue.Ref 18:9-10 Yez 26:16-18.
11 Cao lai geu haktiex khankix, tak yiiem grai mai khi rhawm son nawh, mawh kheu pui tix kaux kawx ang baox liag kraung khrai kix khaix.
12 Pa mawh kraung khrai, khri mai mau mai siang simaox pa ngawh mai siang pa koe ka daux jawx mai man rhi pa mhawm mai man raoh klai mai man pre mai man raoh rawt mai khaox pa sioe baux kuceu mai kraung nga sang kuceu mai kraung khaox pa ngawh kuceu mai kraung tawng lheung mai kraung rhiem, kraung simaox paing,
13 khaox caihung, amomum ceu siging mai ceu nyawng bhawng, sidah bhawng mai lawpan, rawm plix siiet, rawm bee, mawk gaox nghox ca, mawie, yung, brung, ling brung, siliex mai ju kawn pui khankix heue.
14 Plix pa hoik ghoing rhawm maix ka khankix hoik grai hu khaing maix, kraung ceu pa mhawm mai ceu pa mhawm grang khawmuik hoik grai khaing maix mai kawn pui tak ang lai baox deeh yaox khankix tix bawg kawx heue.
15 Cao pa yuh laig geu ceu in khankix, pa hoik mi hoik koe kheu nawh, tak sang cung dee singai kheu lhat ka krax tug kha nawh mai yiiem grai mai khi rhawm tix,
16 ah nin, “Eue, eue, veng ting eue, pa hoik ceep kraung man rhi pa mhawm mai kraung raoh klai mai kraung raoh rawt mai pa jawg ka khao kraung khri mai siang simaox pa ngawh mai siang pa koe daux jawx khankix,
17 ka daux dom tix nari neh, sinngao pa ting nie ding nie dod hoik yuh laux pak lawg heue. Cao giex kaing reu ku kaux mai can pui pa brug reu hu tix dahdah mai pui yuh kaing piang reu khankix mai can kix pa yuh ti ih kaing piang rawm sigrit sigra khawmuik cung dee singai,
18 mai yam jhak kix ka taox ngu pa gleeing nawh, kix kok yo ah nin, veng pa yuh ka mawx, awm ka veng ting an?”
19 Kix ruat phawng tiex ka piang kaing tix mai yiiem riag yo, khi rhawm ti ah nin, “Eue, eue, veng ting eue, dee can pui pa koe reu ka piang rawm sigrit sigra khawmuik, hoik pon ti mi koe ka pa ting cai nawh mau, ka daux dom tix nari neh, hoik yuh nawh laux pak lawg heue.Ref 18:11-19 Yez 27:25-36.
20 RaomaRef 18:20 Ye 51:48. mai pex pui pa singax mai kawncau pa ting, mai cao jhai khankix eue, gaux rhawm rawb nawh heue. Kheu Siyiex hoik pawk bix pex ka nawh heue.”
21 Kawncau Siyiex pa ting riang tix kaux teei ti yaog simaox tix lon pa awm simaox mhaw pa ting mai taing sau ka daux rawm sigrit sigra, ah nin, “Awm an ka veng ting Babulon kawx, tak sang sau riang ti taing nawh lihRef 18:21 Ye 51:63-64. mai pon ang lai yaox nawh khaix heue.Ref 18:21 Yez 26:21.
22 Lox pui pa tah ting mai pui pa ah lox leng lox klao mai pui pa phlu pi lawk leh mai pui pa phlu teettawng khankix, tak ang lai pon ti mhong ka daux maix khaix heue.Ref 18:22 Yez 26:13. Pui pa chix yuh khaix taix, khaix taix pa yuh ka mawx ang ah, tak ang lai pon ti yaox ka daux maix khaix heue. Lox pa krid mhaw, tak ang lai pon ti mhong ka daux maix khaix heue.
23 Riang kawk ngu, tak ang lai pon ti jhan ka daux maix khaix heue. Lox bun krih, sinaw, cao pa yuh kapaox, tak ang lai mhong ka daux maix khaix,Ref 18:22-23 Ye 25:10. grawh grawng nawh cao pa yuh laig geu khankix, hoik mawh pui ting haktiex mai ku meung heue. Hoik pie lhen ka ceu pui khawmuik, ka simeed pa yuh maix heue.
24 Hoik yaox nham cao jhai khankix mai nham pui pa singax singeh khankix mai nham can pui pa hoik phah yum ka piang haktiex khawmuik ka daux maix heue.” Ref 18:24 Ye 51:49.