19
1 Khaix ceu an khankix aux mhong awm mawh lox cub pui hun, pa ting pa sinum, ka daux meung raoma pa ah nin, “Haleluya! Krax taoh mai min pakngai mai sibrawm, mawh cie Siyiex ex heue.
2 Pa mawh meh mai pa rahsee mawh krax prawng Nawh Cao heue. Kheu Nawh Cao hoik prawng ka bun ting coh kaux an, pa hoik kieh haktiex seeing brai ka ceu pa lud vao nawh, mai hoik pawk bix nham siliex Nawh khankix, pa lih ka tawm taix nawh heue.”Ref 19:2 Pi 32:43.
3 Kix baox ah, “Haleluya!” Taox ngu nawh haok hu ku ju leeing ju heue.Ref 19:3 Isa 34:10.
4 Kuad song tixnga pon kaux an mai totiag pa im ju pon mu an, goh gup mai krub ka Siyiex pa ngawm ka piang dang ngeung, ah nin, “Amen. Haleluya.”
Pawie Kapaox Kawn Yung
5 Lox lih hoek khaing dang ngeung, pa ah nin. “Can pex pa mawh siliex Nawh khankix mai pex pa lhat ka Nawh Cao khawm pa iak pa ting khankix eue, yaogyaw ka Siyiex ex awx.”Ref 19:5 Yaog 115:13.
6 Aux mhong awm pa mawh lox cub pui haoh hun mai awm lox luah rawm tom nie mai awm lox pa kied ting sinum praix pa ah nin, “Haleluya! Mawh kheu Siyiex ex hoik giex kaing, cao pa ting sibrawm piang khawmuik heue.
7 Kieh ex haing hia mai nied ti gaux rhawm mai tawx min pakngai ka Nawh Cao, mawh kheu hoik hoek bawg yam pa sang teei kawn Yung moeng mai moeng Nawh hoik jawg hoik khre tokaux tix heue.
8 Hoik tawx nawh ceep kraung man rhi pa mhawm, pa pruh mai pa singax singeh, ka tokaux tix. Man rhi pa mhawm an kienie, mawh ceu pa rahsee pa hoik yuh pui pa singax singeh khankix heue.”
9 Nawh ah nin ka aux, tiiem yuh nin, “Kix pa hoik ghaok ka priex bo kapaox kawn Yung, ting bwanson heue.”Ref 19:9 Mat 22:2-3.Nawh baox ah nin ka aux, “Lox inkix mawh lox Siyiex tete heue.”
10 Aux goh gup ka sivoe caong nawh mai krub ka nawh heue. Nawh baox ah nin ka aux, “Maix paw vi yuh nan, Aux mawh paox siliex tau mai maix, mai puxaik khankix pa giex mhai ruk Yesux heue. Krub ka Siyiex awx. Grawh grawng nawh mhai ruk Yesux mawh rhawm khwan, mawh num ka pa krai lox jhai khankix heue.”
Cao Pa Brug Brung Paing
11 Aux yaox hoik baoh raoma.Ref 19:11 Yez 1:1.Jhak heue, lih bleeh brung paing tix mu mai Kaw pa ngawm piang brung an, kok ceu kaux Nawh mawh, “Pa kaux sijax mai pa mawh pa meh.” Nawh prawng ca mai yuh naing ka daux pa rahsee heue.
12 Ngai Nawh mawh rao nguRef 19:12 Dan 10:6. mai ka piang kaing Nawh koe mhok khri tom nie heue. Nawh koe ceu kaux pa hoik tiiem ti deuh, pa ang pui tawng tix kaux kawx lheu khaing tokaux Nawh heue.
13 Nawh ceep kraung pa hoik cub ti ka daux nham mai kok ceu kaux Nawh mawh, “Gumlox Siyiex heue.”
14 Kru naing pa koe ka daux meung raoma khankix, brug brung paing mai ceep kraung man rhi pa mhawm, pa paing mai pa singax mai hawt khaix Nawh heue.
15 Khaing daux jheeh Nawh lih vaig lawm tix kre, sonsang mug ka ceu pui khankix kah Nawh tak sang kwang sang giex kaing kix ka khaox gix rhiem heue.Ref 19:15 Yaog 2:9. Nawh dig ka dee biiet ti teei rawm plix siiet ceu pa song rhawm song rhi Siyiex, pa mawh Cao pa ting sibrawm piang khawmuik heue.Ref 19:15 Isa 63:3; Yol 3:13; Jhi 14:20.
16 Nawh koe ceu kaux pa hoik tiiem ka Piang kraung ceep Nawh mai ka piang ba Nawh yuh nin, Simiang piang simang, mai Cao piang cao.
17 Aux yaox kawncau Siyiex tix kaux cung ka daux singaix mai nawh kok yo lox sinum ah nin ka can sim pa pu sigreung raoma khawmuik, “Hoek mai krawk khrawm paox tix ka priex bo ting Siyiex.
18 Yuh ka mawx sonsang yaox pex ti ih nex simiang khankix mai nex cao giex kaing naing khankix mai nex pui pa ting riang khankix mai nex brung khankix mai nex cao pa brug ka brung khankix mai nex kawn pui khawmuik, khawm pui ploi mai pui pa mawh siliex mai pa iak mai pa ting khankix heue.”Ref 19:17-18 Yez 39:17-20.
19 Aux yaox totiag an mai simiang khankix mai kru naing kix, pa hoik krawk khrawm paox tix sonsang yuh naing ka Kaw pa ngawm ka piang brung an mai ka kru naing Nawh heue.
20 Giex ka totiag an mai ka khawm cao jhai pa ang mawh ang meh an tau mai nawh, pa hoik yuh mhai pa daox am ka sivoe nawh mai pa hoik teei mhai an kix tix pie lhen ka kix pa hoik pon mhai totiag an mai ka kix pa hoik krub ka riang grang nawh heue.Ref 19:20 Jhi 13:1-18. Taing im kiex khawm ra ka daux nhawng ngu pa gleeing ka mhat heue.
21 Teei can pa deuk khankix yum ka vaig kaw pa ngawm ka piang brung an, pa mawh vaig pa lih khaing daux jheeh Nawh mai sim an khawmuik hoik sak ka nex kix heue.