17
Prawng Ciyang Ka Bun Coh Kaux
1 Ka daux kawncau Siyiex aliah kaux, pa koe klong aliah mu an tix kaux hoek mai sikah mai aux, ah nin, “Hoek tin mai aux tak jhi maix yaox krax pa prawng pa ciyang ka bun pa coh kaux pa ting pa ngawm piang rawm tom nie,Ref 17:1 Ye 51:13.
2 pa mawh bun pa kieh simiang haktiex khankix lud vao mai nawh, mai hoik kieh kix pa ot ka piang haktiex khankix yoek ka plai rawm plix siiet ceu pa lud vao nawh heue.Ref 17:2 Ye 51:7.
3 Nawh viex aux hu ka daux Khwan Cao ka daux tiagtu. Aux yaox bun tix kaux pa ngawm ka piang totiag pa raoh tix mu, pa naog ceu kaux ceu pa salao ka Siyiex mai pa koe kaing aliah mu mai rung kao mu heue.Ref 17:3 Jhi 13:1.
4 Bun an ceep kraung pa raoh klai mai pa raoh rawt mai nawh jawg ka khao kraung khri Ref 17:4 Ye 51:7.mai siang simaox pa ngawh mai siang pa koe daux jawx khankix mai nawh giex kawk khri daux taix tix pa naog mai ceu pa greeing, pa mawh ceu pa seeing brai pa dex mai pa lud vao nawh heue.
5 Hoik tiiem ceu kaux ka piang dong re nawh yuh nin, “Pa raux pa mox veng Babulon pa ting, pa mawh miex bun coh kaux khankix, mai miex ceu pa greeing cie haktiex.”
6 Aux yaox bun an yoek ka nham pui pa singax singeh khankix mai ka nham pui pa kham mhai sakse son Yesux heue. Yam yaox aux nawh, aux daox deng kah, ka krax pa kied daox deng sigrien sigre heue.
7 Kawncau Siyiex an ah nin ka aux, “Maix lai daox deng ka yuh ka mawx? Aux tak sang krai ka maix grawh grawng ceu pa raux pa mox, pa dex mai bun an mai pa dex mai totiag an, pa koe kaing aliah mu mai rung kao mu, pa pux ka bun an heue.
8 Totiag pa hoik yaox maix an, hoik mawh, mai ang lai mawh, dex sang lih hoek khaing daux, daux pa ang koe dee dieRef 17:8 Dan 7:3; Jhi 11:7. mai hu ka daux pa laux pa laux leeing heue. Pui pa ot ka piang haktiex khankix, pa mawh kix pa ang lai tiiem ti deuh ka ceu kaux kix, tom yam jah ti kaw haktiex, ka daux phuk lai pa im ju,Ref 17:8 Yaog 69:28. yam yaox kix ka totiag an pa hoik mawh mai pa ang lai mawh mai pa tak sang hoek khaix, tak sang daox deng ka heue.
9 In mawh rhawm dee chix keud, pa koe pingnya cuyi heue. Kaing aliah mu an mawh gawng aliah mu pa ngawm bun an kah,
10 mai kix mawh simiang aliah kaux heue. Kix phwan kaux hoik rau mai kawn koe tix kaux mai ang nyang bax hoek tix kaux. Yam hoek nawh, nawh tak lai ot tivud ticu heue.
11 Totiag pa hoik mawh mai pa ang lai mawh an, tokaux nawh kawx, mawh simiang daix kaux tix kaux mai mawh pa neuex mai simiang aliah kaux an heue. Nawh hu ka daux dee laux dee leeing heue.
12 Rung kao mu pa hoik yaox maix an, mawh simiang kao kaux, Ref 17:12 Dan 7:24.pa ang nyang bax pon meung, viang mawh nan kix pon sibrawm giex kaing awm simiang tau mai totiag an, been tix nari heue.
13 Inkix koe rhawm tix mu khaing mai kix tawx sibrawm kix mai sibrawm giex kaing kix ka totiag an heue.
14 Inkix tak sang yuh naing ka kawn Yung mai kawn Yung tak sang pex ka kix, mawh kheu mawh Nawh Cao piang cao, mai Simiang piang simiang heue. Kix pa ot tau mai Nawh Cao, mawh pa hoik kok mai pa hoik laug ti teei mai pa kaux sijax heue.”
15 Nawh baox ah nin ka aux, “Rawm pa hoik yaox maix khankix dee ngawm bun coh kaux an, mawh pui kuceu mai cub pui hun khankix mai pui meung ku meung mai pui pa tang lox sikah kuceu heue.
16 Rung kao mu pa hoik yaox maix an mai totiag an, khankix tak koeng ka bun coh kaux an mai yuh nawh yi pak lawg mai kakaong mai tak sang ih ka nex nawh mai gleeing nawh ka ngu, tom ngua heue.
17 Grawh grawng nawh Siyiex hoik sau jhawm keud ka daux rhawm rhi kix ti sang yuh hawt alo rhawm Nawh mai ti sang koe kix rhawm tix mu khaing mai ti sang tawx meung kix ka totiag an, tom sidah hoik grum mawh gumlox Siyiex khankix heue.
18 Bun pa hoik yaox maix an, mawh veng ting an pa giex kaing ka piang simiang haktiex khankix heue.”