16
Klong Pa Song Rhawm Siyiex
1 Aux mhong lox pa ting pa sinum khaing daux nyiex bwan pa ah nin ka kawncau Siyiex aliah kaux an, “Pex hu mai prauk klong pa song rhawm song rhi Siyiex aliah mu lih ka piang haktiex awx.”
2 Kawncau Siyiex phao ka tix kaux, hu mai prauk klong cie tix lih ka piang haktiex mai lih mawh muad yia pa lang teung sauxRef 16:2 Lih 9:10. ka piang pui khankix pa koe mhai totiag an mai pa krub ka riang grang nawh heue.
3 Ra kaux tix kaux prauk klong cie tix lih ka daux rawm sigrit sigra mai rawm an lih mawh nham pa awm nham pui pa hoik yum heue. Can ceu pa im ju pa koe ka daux rawm sigrit sigra yum khawmuik heue.
4 Loe kaux tix kaux prauk klong cie tix lih ka daux rawm klawng ting mai ka rawm keut khankix mai rawm khankix lih mawh nham heue.Ref 16:4 Lih 7:17-21.
5 Aux mhong kawncau Siyiex rawm an khankix ah nin, “Kaw Pa Singax Singeh, pa mawh yam in mai pa hoik mawh eue, Maix mawh pa rahsee, mawh kheu hoik prawng ca Maix yuh nin heue.
6 Grawh grawng nawh, kix hoik prauk lih ka nham pui pa singax singeh mai cao jhai khankix mai Maix hoik tawx kix nyaux nham. Kix mawh pa keung tix kham pa yuh nan heue.”
7 Aux mhong khu dee tan ah nin, “Mawh heue, Siyiex, cao pa ting sibrawm piang khawmuik eue, ceu pa prawng ciyang Maix mawh pa mawh meh mai pa rahsee heue.”
8 Pon kaux tix kaux prauk klong cie tix lih ka piang singaix mai tawx sibrawm ka singaix sonsang hax pui khankix ka ngu heue.
9 Pui khankix yaox ti kham pa hax ka ceu pa kied hax sigrien sigre mai kix salao ka ceu kaux Siyiex pa koe sibrawm ka piang preng in khankix mai ang kix doh keud ka phimap tix sonsang yaogyaw ka Nawh Cao heue.
10 Phwan kaux tix kaux prauk klong cie tix lih ka piang dang ngeung totiag an mai meung nawh lih mawh pa faik heue.Ref 16:10 Lih 10:21. Kheu kied saux kix, kix deeh kiied ka dak tix tiru heue.
11 Kix salao ka Siyiex raoma, mawh kheu pa saux kix mai muad pa yia mai ang kix doh keud ka phimap jhawm pa yuh tix heue.
12 Liah kaux tix kaux prauk klong cie tix lih ka daux rawm klawng ting pa mawh rawm klawng ting Yufrethix mai rawm ka daux rawm klawng ting an hit kroh, yuh ka mawx sonsang khre rien tix, son simiang pa sang hoek khaing plak lih singaix khankix heue.Ref 16:12 Isa 11:15-16.
13 Aux yaox khwan pa seeing brai loe mu, pa awm khiiet, lih khaing daux jheeh siyawng an mai khaing daux jheeh totiag an mai khaing daux jheeh cao jhai pa ang mawh ang meh an heue.
14 Grawh grawng nawh kix mawh khwan phicaox khankix, pa yuh mhai pa daox am pa hu ka can simiang haktiex khawmuik, sonsang kraix khrawm kix ti sang yuh naing ka daux singaix pa ting lhaong Siyiex, cao pa ting sibrawm piang khawmuik.
15 Jhak heue, Aux sang hoek awm pui briexRef 16:15 Mat 24:43-44; Luk 12:39-40; Jhi 3:3. kaw pa pau ti jhak mai pa priex ka kraung ceep tix ting bwanson, phan ang mawh nan, ha nawh kox yaox ti hu kakaong mai pui yaox ka pa kaig pa tua nawh heue.
16 Kix kraix khrawm kix tau ka daux dee kok lox Hebrie mawh Amagedon heue.Ref 16:16 2Sim 23:29; 2Been 35:22.
17 Aliah kaux tix kaux prauk klong cie tix lih ka piang bhawm mai lox pa ting pa sinum lih khaing daux nyiex bwan khaing dang ngeung ah nin, “Hoik hoik heue.”
18 Lih mawh pa tuh sah mai lox sikah mai lox pa sinum praix mai lih tok kla reem ting, Ref 16:18 Jhi 8:5; 11:13, 19.pa mawh pa tok kla reem pa kied ting sigrien sigre, pa ang sax tok pa awm an, khaix hoik koe kawn pui piang haktiex heue.
19 Gwieh ka veng ting an mawh loe pak, mai veng cie ceu pui khankix grhup heue. Doh keud ka veng Babulon pa ting ka plak sivoe Simiang Siyiex sonsang tawx kawk rawm plix siiet pa song rhawm song rhi Nawh Cao ka veng an, pa kied lang teung nu heue.Ref 16:19 Isa 51:17.
20 Klawn tiex ku klawn to hu mai gawng khankix kawx ang lai baox yaox ka heue.Ref 16:20 Jhi 6:14.
21 Lih pre pa ting muRef 16:21 Lih 9:23; Jhi 11:19. khaing daux raoma ka piang kawn pui, jhawm cien tix mu pre dex koe kao phwan coi heue. Kawn pui khankix salao ka Siyiex kheu preng pre an. Mawh keu preng pre an mawh pa kied ting sigrien sigre heue.